សេដ្ឋកិច្ច

សេដ្ឋកិច្ច ឡាវ លូតលាស់ជាលំដាប់ ដោយសារការនាំចេញថាមពលអគ្គិសនី

បានផុស

១១ ខែ មុន

នៅ

ថ្ងៃព្រហស្បតិ៍ ១៤ មីនា ២០២៤

ដោយ

ប្រទេសឡាវសម្រេចបាននូវកំណើនពាណិជ្ជកម្មប្រចាំឆ្នាំរបស់ខ្លួនគួរកត់សម្គាល់ ដោយបានកើនទៅដល់ទំហំទឹកប្រាក់លើសពី ១៥.៥ ពាន់លានដុល្លារអាមេរិក ។ នេះបើតាមការចុះផ្សាយរបស់សារព័ត៌មាន Laotian Times ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យដែលបញ្ចេញដោយបណ្តាញពាណិជ្ជកម្មឡាវបានបង្ហាញថា មានកំណើន ៣.៥ ភាគរយ បើធៀបនឹងឆ្នាំមុនៗ ទៅលើទំហំទឹកប្រាក់នាំចេញ និងនាំចូលពេញមួយឆ្នាំ ២០២៣ ។ ក្នុងនោះតម្លៃនាំចេញស្មើនឹងទឹកប្រាក់ ៨ ពាន់លានដុល្លារអាមេរិក មានកំណើន ៣.៥ ភាគរយកើនឡើងជាងឆ្នាំ ២០២២ និងសរុបតម្លៃនាំចូលមានទំហំទឹកប្រាក់ជាង ៧ ពាន់លានដុល្លារ ដែលមានកំណើនជាងឆ្នាំមុនៗប្រមាណ ៥ ភាគរយ ។

សម្រាប់ប្រភេទការនាំចេញធំៗនាំមុខគេប្រចាំឆ្នាំ ២០២៣ នោះ គឺជាប្រភពថាមពលអគ្គិសនីក្នុងទឹកប្រាក់ប្រមាណ២.៣៨២ ពាន់លានដុល្លារ និងទី២ គឺដុំមាសប្រមាណ ៧០៣ លានដុល្លារ ទី៣ គឺក្រដាស និងផលិតផលក្រដាសប្រមាណ ៤៦៧ លានដុល្លារ រ៉ែមាសក្នុងទំហំទឹកប្រាក់ ៤២៥ លានដុល្លារ និងរ៉ែដែក ៤១១ លានដុល្លារ ដែលផលិតផលនាំចេញទាំងនេះ រួមចំណែកសំខាន់ក្នុងសេដ្ឋកិច្ចពាណិជ្ជកម្មឡាវ ។

ដោយឡែក ប្រេងមាស៊ូត ជាទំនិញនាំចូលសំខាន់ជាងគេ ក្នុងទំហំតម្លៃ ៩៥២ លានដុល្លារ ទី២ បរិក្ខារមេកានិច តម្លៃ៦០៦ លានដុល្លារ មធ្យោបាយធ្វើដំណើរក្នុងទំហំតម្លៃ ៥៨០ លានដុល្លារ ផលិតផលដែក និងដែកថែប ៤៥១ លានដុល្លារ ប្រេងឥន្ធនៈ ៤២៨ លានដុល្លារ ដែលសរុបទំនិញទាំងនេះបង្ហាញថា ប្រទេសឡាវពឹងផ្អែកច្រើនលើផលិតផលសម្រេចសម្រាប់សេដ្ឋកិច្ច និងអភិវឌ្ឍប្រទេស ។

សម្រាប់ការនាំចេញថាមពលអគ្គិសនី ជំរុញឲ្យទំហំពាណិជ្ជកម្មឡាវកើនឡើង ដែលជាផ្នែកសំខាន់មួយរុញតួនាទីប្រទេសគ្មានព្រំដែនសមុទ្រមួយនេះជាទីផ្គត់ផ្គង់ថាមពលស្អាត និងចីរភាពទៅកាន់ប្រទេសឯទៀតក្នុងតំបន់ និងបង្ហាញពីកំណើនតម្រូវការសំខាន់នៃថាមពលកើតឡើងវិញ ឬថាមពលស្អាតក្នុងតំបន់អាស៊ីអាគ្នេយ៍ផងដែរ ។

ដោយឡែក ក្នុងក្របខណ្ឌដៃគូពាណិជ្ជកម្ម ប្រទេសជិតខាង គឺប្រទេសថៃបានក្លាយជាប្រទេសដៃគូនាំចេញដ៏សំខាន់របស់ឡាវ ក្នុងទំហំទឹកប្រាក់ ២.៨ ពាន់លានដុល្លារតាមពីក្រោយដោយប្រទេសចិន វៀតណាម អូស្រ្តាលី និងកម្ពុជា ។ ទន្ទឹមនោះ ថៃក៏ជាប្រទេសនាំមុខគេដែលឡាវនាំផលិតផលទំនិញចូលវិញផងដែរ ក្នុងទំហំទឹកប្រាក់ ៣.៣ ពាន់លាន តាមពីក្រោយដោយ ចិន វៀតណាម សហរដ្ឋអាមេរិក និងជប៉ុន ។

តែយ៉ាងណា សម្រាប់ថ្ងៃអនាគត ប្រទេសចិនកំពុងពង្រឹង និងរៀបចំខ្លួនឲ្យក្លាយជាតំណែងដៃគូពាណិជ្ជកម្មមុខគេរបស់ឡាវ ។ តាមប្រភពព័ត៌មានក្នុងស្រុកឡាវក៏បានបង្ហាញដែរថា ប្រទេសចិនបានវិនិយោគប្រមាណ ១៧ គម្រោងក្នុងទឹកសរុបជិត ១ ពាន់លានដុល្លារអាមេរិកកសម្រាប់ដើមឆ្នាំ ២០២៤ នេះដើម្បីចាក់គ្រឹះពង្រឹងទំនាក់ទំនងពាណិជ្ជកម្មកាន់តែរឹងមាំរវាងប្រទេសអាស៊ីទាំងពីរនេះ ៕