លោក Macron ថា Trump នឹងចាញ់ឆ្នោត

នៅពេលត្រូវបានសួរថាតើនរណាអាចមានសក្តានុពល សម្របសម្រួលកិច្ចចរចាសន្តិភាពរវាងរុស្ស៊ីនិងអ៊ុយក្រែន? ប្រធានាធិបតីបារាំងលោក Emmanuel Macron បានបង្ហាញពីគំនិតរបស់ខ្លួន ដោយលើកឡើងថា លោក Donald Trump នឹងចាញ់ឆ្នោតហើយមិនអាចចូលកាន់កាប់សេតវិមានដើម្បីត្រួសត្រាយឲ្យមានដំណោះស្រាយចំពោះជម្លោះនោះបានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងបទសម្ភាសជាមួយទូរទស្សន៍ France 2 និង TF1 TV កាលពីថ្ងៃព្រហស្បតិ៍ទី១៤ខែមីនា លោក Macron និយាយថា “ខ្ញុំត្រៀមខ្លួនរួចជាស្រេចសម្រាប់កិច្ចពិភាក្សា នៅពេលណាក៏បាន ប៉ុន្តែយើងត្រូវការអ្នកដែលមានចិត្តស្មោះនិងសន្តិភាពដើម្បីធ្វើរឿងនេះ។ ខ្ញុំសង្ឃឹមថា ពេលវេលានឹងមកដល់ថ្ងៃណាមួយដើម្បីចរចាជាមួយប្រធានាធិបតីរុស្ស៊ី។ ខ្ញុំ​មិន​គិត​ថា លោក​ Donald Trump នឹង​ក្លាយជា​ប្រធានាធិបតី​សហរដ្ឋអាមេរិក​ទេ ព្រោះថា គាត់នឹងចាញ់​”។

ស្របពេលជាមួយគ្នានោះដែរ ប្រធានាធិបតីបារាំង បានហៅទីក្រុងមូស្គូថា “សត្រូវ” ហើយជាថ្មីម្តងទៀត លោក  Macron មិនបដិសេធលទ្ធភាពនៃការដាក់ពង្រាយទ័ពណាតូនៅអ៊ុយក្រែននោះទេ ដោយបញ្ជាក់ឡើងវិញថា ទីក្រុងប៉ារីស ត្រៀមខ្លួនជាស្រេចដើម្បីធ្វើអ្វីដែលចាំបាច់ដើម្បីការពារមិនឲ្យរុស្ស៊ីទទួលជ័យជម្នះ។

ប្រធានាធិបតីបារាំងរូបនេះសង្កត់ធ្ងន់ថា ទោះបច្ចុប្បន្ន មិនទាន់មានការឯកភាពគ្នា បញ្ជូនកងទ័ពជើងគោកលោកខាងលិចដោយផ្ទាល់ទៅអ៊ុយក្រែនក៏ដោយ ប៉ុន្តែរឿងនេះមិនត្រូវទាត់ចោលនោះដែរ ហើយលោកនឹងធ្វើអ្វីគ្រប់យ៉ាង ដើម្បីកុំឲ្យរុស្ស៊ីឈ្នះសង្គ្រាម។

រម្លឹកទៅខែមករា លោក Macron ធ្លាប់និយាយថា លោកនឹងធ្វើការជាមួយអ្នកណាក៏បានឲ្យតែឈ្នះការបោះឆ្នោតនៅសហរដ្ឋអាមេរិក ដោយអះអាងថា “ខ្ញុំតែងមានទស្សនៈដូចគ្នា ខ្ញុំជ្រើសរើសយកមេដឹកនាំដែលប្រជាជនផ្តល់ឲ្យខ្ញុំ”។

សូមបញ្ជាក់ ប្រធានាធិបតីអាមេរិក Joe Biden និងអតីតប្រធានាធិបតី Donald Trump ត្រូវប៉ះគ្នាជាថ្មីក្នុងការបោះឆ្នោតខែវិច្ឆិកា ខណៈការស្ទង់មតិថ្មីៗបង្ហាញថា លោក Trump នាំមុខគូប្រជែងដែលកំពុងកាន់អំណាចចន្លោះពី២ទៅ៩ពិន្ទុ។

ប្រសិនបើជាប់ឆ្នោតឡើងវិញមែន លោក Trump សន្យាថា នឹងបញ្ចប់ជម្លោះអ៊ុយក្រែនក្នុងរយៈពេលត្រឹម២៤ម៉ោង ដោយការដាក់សម្ពាធលើភាគីពាក់ព័ន្ធឲ្យស្វែងរកសន្តិភាព៕

អត្ថបទ៖ សុខ សុវណ្ណ

ចុចអាន៖ លោក Macron ឆ្លើយបែបណារឿងលទ្ធភាពបញ្ជូនទ័ពទៅជួយ អ៊ុយក្រែន