សម្ដេច ហ៊ុន ម៉ាណែត៖ អំឡុងពេលវិបត្តិកូវីដ-១៩ បានបង្ហាញទិដ្ឋភាពសំខាន់ ​២ ក្នុងវិស័យសុខាភិបាល

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា នៅក្នុងអំឡុងពេលនៃវិបត្តិនៃជំងឺកូវីដ-១៩ បានបង្ហាញនូវទិដ្ឋភាពសំខាន់ចំនួន ​២ នៅក្នុងវិស័យសុខាភិបាល។ ការលើកឡើងនេះ ធ្វើឡើងនៅក្នុងពិធីបិទសន្និបាតបូកសរុបការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់ក្រសួងសុខាភិបាល នៅរសៀលថ្ងៃទី ១៩ ខែមីនានេះ។

សម្ដេចធិបតី ហ៊ុន ម៉ាណែត បានថ្លែងថា វិបត្តិនៃជំងឺកូវីដ-១៩ បានបង្ហាញនូវទិដ្ឋភាពសំខាន់ចំនួន ​២ នៅក្នុងវិស័យសុខាភិបាល។ ទី១. ក្នុងដំណាក់កាលនៃការរីករាលដាលជំងឺកូវីដ-១៩ បានបង្ហាញឲ្យអំពីសមត្ថភាពជាក់ស្ដែងរបស់គ្រូពេទ្យ និងមន្ត្រីសុខាភិបាលរបស់កម្ពុជា នៅទូទាំងប្រទេស។ ទី២. ក្នុងវិបត្តិនៃជំងឺកូវីដ-១៩ ក៏បានបង្ហាញនូវកម្រិត និងបញ្ហាកង្វះខាតមួយចំនួន ដែលកម្ពុជាបានប្រឈមពាក់ព័ន្ធនឹងវិស័យសុខាភិបាលនេះ។

សម្ដេចធិបតី ហ៊ុន ម៉ាណែត បានថ្លែងបន្តថា «អញ្ចឹងវិបត្តិជំងឺកូវីដ-១៩នេះ ឲ្យយើងឃើញ ២ ទាំងចំណុចខ្លាំង ប៉ុន្តែពេលជាមួយគ្នាក៏ឃើញនូវចំណុចខ្វះខាត ដែលយើងដាក់ទិសដៅនៅក្នុងការពង្រឹងនៅក្នុងអាណត្តិទី ៧នេះ»។

សម្ដេចនាយករដ្ឋមន្ត្រី បានបញ្ជាក់ដែរថា វិធានគន្លឹះមួយក្នុងរាជរដ្ឋាភិបាល អាណត្តិទី ៧នេះ គឺការពង្រឹងវិស័យសុខាភិបាល ដោយផ្អែកទៅលើមូលដ្ឋានសំខាន់ៗមួយចំនួន។ ក្នុងនោះ ក៏មានមូលដ្ឋានដែលកើតចេញពីស្ថានភាពនៃវិបត្តិជំងឺកូវីដ-១៩ ផងដែរ៕