ស្នងការខេត្តបន្ទាយមានជ័យ កំពុងស្រាវជ្រាវករណីអធិការរងក្រុងប៉ោយប៉ែត យកលុយពលរដ្ឋជិត២ម៉ឺនដុល្លាររត់ការចូលក្របខណ្ឌ

បន្ទាប់ពីមានការបង្ហោះចែកចាយនៅលើបណ្ដាញសង្គមពាក់ព័ន្ធនឹងលោកវរសេនីយ៍ទោ សន ធឿន អធិការរងក្រុងប៉ោយប៉ែត ដែលយកលុយចំនួន១៨០០០ដុល្លារ ពីពលរដ្ឋដើម្បីរត់ការចូលក្របខណ្ឌនគរបាលជាតិ ស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២០ ខែមីនា ឆ្នាំ២០២៤នេះ បានបំភ្លឺថា ករណីនេះស្នងការដ្ឋាននគរបាលខេត្តនឹងស្រាវជ្រាវអោយបានគ្រប់ជ្រុងជ្រោយ ដើម្បីចាត់ការតាមនីតិវិធី។

យោងតាមសេចក្ដីបំភ្លឺរបស់អ្នកនាំពាក្យស្នងការដ្ឋាននគរបាលខេត្តបន្ទាយមានជ័យ លោកវរសេនីយ៍ទោ សន ធឿន ពិតជាមានតួនាទីជា អធិការរងនៃអធិការដ្ឋាននគរបាល ក្រុងប៉ោយប៉ែត ពិតប្រាកដមែន។ ចំពោះខ្លឹមសារដែលបានបង្ហោះចែកចាយនៅលើបណ្ដាញហ្វេសប៊ុក ពាក់ព័ន្ធនឹងការយកលុយពីពលរដ្ឋចំនួន១៨០០០ពាន់ដុល្លារដើម្បីរត់ការចូលក្របខណ្ឌនគរបាលជាតិនោះ ស្នងការនគរបាលខេត្តនឹងស្រាវជ្រាវអោយបានគ្រប់ជ្រុងជ្រោយ ដើម្បីចាត់ការតាមនីតិវិធី។

តាមការបញ្ជាក់របស់អ្នកនាំពាក្យស្នងការដ្ឋាននរបាលខេត្តបន្ទាយមានជ័យ ស្នងការខេត្តបានទទួលរបាយការណ៍ស្តីអំពីភាពអសកម្មការងារដោយមិនដឹងមូលហេតុរបស់លោកវរសេនីយ៍ទោ សន ធឿន និងបានធ្វើលិខិតអញ្ជើញអោយមកបំភ្លឺចំនួន២លើក ប៉ុន្តែសាមីខ្លួនមិនបានមកបំភ្លឺតាមការអញ្ជើញរបស់ស្នងការនគរបាលខេត្តឡើយ។

សូមជម្រាបថា កាលពីថ្ងៃទី១៩ ខែមីនា ឆ្នាំ២០២៤ មានគណនីហ្វេសប៊ុកមួយបានសរសេរបង្ហោះចែកចាយថា «ជំរាបសួរលោកវរសេនីយ៍ទោ សន ធឿន អធិការរងក្រុងប៉ោយប៉ែត តើលោកសុខសប្បាយជាទេ? ប្រជាពលរដ្ឋរងគ្រោះផ្តល់ព័ត៌មានមកថា លោកវរសេនីយ៍ទោ យកលុយគាត់ ១៨០០០ដុល្លារ ដោយសន្យាថារត់ការយកកូនគាត់ចូលបំរើក្របខណ្ឌនគរបាលជាតិ។ ឥលូវរត់ការមិនបាន មិនអោយលុយគាត់វិញ ហើយដេញគាត់អោយទៅប្តឹងដល់ណាប្តឹងទៅ?

ទោះបីយ៉ាងណា ពាក់ព័ន្ធករណីនេះស្នងការនគរបាលខេត្តបន្ទាយមានជ័យ នៅមិនទាន់មានចំណាត់ការយ៉ាងណានៅឡើយនោះទេ ចំពោះមន្ត្រីនគរបាលក្រុងប៉ោយប៉ែតរូបនោះ ដោយរង់ចាំកម្លាំងជំនាញស្រាវជ្រាវបន្តសិន៕

អត្ថបទ៖ សុខុម