ព័ត៌មានជាតិ

តំបន់អារ៉ែង ផ្តើមមានទំនប់បង្ហៀរឆ្លងដងស្ទឹងប្រវែងជិត១០០ម៉ែត្រ

បានផុស

៦ ខែ មុន

នៅ

ថ្ងៃពុធ ២០ មីនា ២០២៤

ដោយ

កោះកុង ៖ អាជ្ញាធរស្រុកថ្មបាំង រដ្ឋបាលឃុំជំនាប់ និងឃុំថ្មដូនពៅ បានរួមគ្នាបញ្ចេញកញ្ចប់ថវិកាកសាងទំនប់បង្ហៀរទឹកមួយកន្លែងឆ្លងដងស្ទឹងឆាយអារ៉ែងប្រវែងជិត១០០ម៉ែត្រ ទទឹង៦ម៉ែត្រ ដើម្បីសម្រួលចរាចរណ៍អំឡុងរដូវវស្សាឱ្យកាន់តែមានសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វត្តមានទំនប់បង្ហៀរទឹកឆ្លងដងស្ទឹងតំបន់អារ៉ែង ផ្តើមបណ្តើរបំពេញតួនាទីរបស់ខ្លួនចម្លងពលរដ្ឋ និងអ្នកទេសចរពីត្រើយម្ខាងទៅត្រើយម្ខាងទៀត ក្រោយអាជ្ញាធរទម្លាក់កញ្ចប់ថវិកាមូលនិធិរួមគ្នាកសាងទំនប់ដ៏មានសារៈសំខាន់នេះឡើង។

លោក ឃុត មាន អភិបាលរងស្រុកថ្មបាំង បានឱ្យដឹងកាលពីថ្ងៃទី១៩ ខែមីនា ឆ្នាំ២០២៤ថា ទំនប់បង្ហៀរទឹកប្រវែងជិត១០០ម៉ែត្រ ទទឹង៦ម៉ែត្រ និងបាតខាងក្រោមទំនប់មានទទឹង៩ម៉ែត្រ ដោយវាអាចសម្រួលផ្នែកគមនាគមន៍តាមសេចក្តីការចង់បានរបស់ប្រជាពលរដ្ឋរស់នៅក្នុងឃុំជំនាប់ ឃុំថ្មដូនពៅ ពិសេសអ្នកទេសចរតែម្តង។

លោកអភិបាលរងស្រុកថ្មបាំង បន្ថែមថា ប្រជាពលរដ្ឋ និងសាធារណជន នឹងលែងបារម្ភពីធ្វើដំណើរឆ្លងកាត់ស្ទឹងដងមុនទៀតហើយ បើធៀបនឹងការជិះទូកដអំឡុងរដូវវស្សាមានចរន្តទឹកហូរខ្លាំងងាយនឹងគ្រោះថ្នាក់ជាយថាហេតុ។

ទំនប់ខាងលើនេះ បានផ្តល់សុវត្ថិភាព ព្រមទាំងចំណេញពេលវេលាច្រើនដល់គ្រប់អ្នកដែលបានឆ្លងកាត់ទៅមក មិនថាតែដឹកជញ្ជូនផលកសិកម្ម ដំណើរកម្សាន្តពីទៅឃុំជីផាតរហូតដល់ផ្លូវជាតិលេខ៤៨ឃុំអណ្តូងទឹក ស្រុកបូទូមសាគរ។

លោក ហ៊ីង ហេង និងលោក ឈិន សារិទ្ធ ជាពលរដ្ឋរស់នៅក្នុងឃុំថ្មដូនពៅ ស្រុកថ្មបាំង បានសម្តែងការពេញចិត្តនៅពេលមានទំនប់បង្ហៀរទឹកឆ្លងស្ទឹងអារ៉ែងនេះ ព្រោះវាជាតម្រូវការចង់បានយូរឆ្នាំមកហើយ ទើបតែទទួលបានពេលនេះប៉ុណ្ណោះ។

តំណាងប្រជាពលរដ្ឋដដែលថា ពេលមិនទាន់មានទំនប់នេះ មិនសុវត្ថិភាពធ្វើដំណើរឆ្លងកាត់ស្ទឹងនោះទេតាមរយៈជិះទូកដអំឡុងពេលវេលា ចំណែកឯរដូវប្រាំងមានជង្ហុកតូចធំមានរថយន្តតូចធំ ម៉ូតូ និងកង់ពិបាកធ្វើដំណើរផងដែរ។ លោក ហ៊ីង ហេង និងលោក ឈិន សារិទ្ធ ក៏រំពឹងថា ទំនប់នឹងផ្តល់អត្ថប្រយោជន៍សម្រាប់ពលរដ្ឋអាចឆ្លងកាត់បានយ៉ាងងាយស្រួលមិនថាយប់ថ្ងៃ និងខែវស្សា ឬខែប្រាំង។ ជាក់ស្តែងទិន្នផលដែលបង្កបង្កើនបានដឹកជញ្ជូនទៅលក់នៅទីផ្សារបានឆាប់រហ័ស ហើយចំនួនភ្ញៀវអ្នកទេសចរក៏កើនទៅតាមនោះដែរ៕

អត្ថបទ ៖ សិរីវឌ្ឍនៈ