ត្រឹម ២ពាន់រៀល! ទេសចរជាតិ អាចចូលទស្សនាស្វែងយល់ នៅសារមន្ទីរធម្មជាតិសកល ទឹកដីខេត្តព្រះវិហារ

ដ្បិត ប្រាសាទព្រះវិហារ ជាភាពល្បីរន្ទឺនៃការស្វែងយល់ប្រវត្តិសាស្ត្រកម្ពុជា តែស្រុកទេសចរណ៍មួយនេះ ក៏មានសារមន្ទីរមួយផ្សេងទៀត ដែលទេសចរជាតិ និងអន្តរជាតិ អាចទៅទស្សនា និងស្វែងយល់ពីប្រវត្តិសាស្ត្រខ្មែរបាន នោះគឺ សារមន្ទីរធម្មជាតិសកល សម្តេចតេជោហ៊ុន សែន ព្រះវិហារ ។

បើតាមមន្ទីរទេសចរណ៍ ខេត្តព្រះវិហារ សារមន្ទីរនេះ នឹងបើកទទួលភ្ញៀវចាប់ពីម៉ោង ៧:៣០ នាទីព្រឹក រហូតដល់ម៉ោង ៤:៣០នាទីល្ងាច។ ចំណែកឯតម្លៃសំបុត្រចូលទស្សនា គឺចំណាយត្រឹមតែ ២ពាន់រៀល ប៉ុណ្ណោះសម្រាប់ភ្ញៀវជាតិ និងតម្លៃ ៣ ដុល្លារ សម្រាប់ភ្ញៀវបរទេស។

គួរឱ្យដឹងដែរថា សារមន្ទីរធម្មជាតិសកល សម្តេចតេជោហ៊ុន សែន ព្រះវិហារ ជាការផ្តួចផ្តើមឡើយដោយសម្តេចតេជោ ហ៊ុន សែន កាលនៅជាប្រមុខរាជរដ្ឋាភិបាលកម្ពុជា ក្នុងគោលបំណង កសាងសារមន្ទីរមួយ ដែលឆ្លុះបញ្ចាំងអំពីអារ្យធម៌ ដ៏រុងរឿងរបស់ខ្មែរសម័យបុរាណ ហើយព្រមទាំងបង្ហាញអំពីជីវិតសហគមន៍ជនជាតិភាគតិចកួយ និងភាពសម្បូរបែបនៃបរិស្ថានធម្មជាតិ។

សារមន្ទីរនេះ ​មានទីតាំងស្ថិតនៅក្នុងភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ ជាសារមន្ទីរដែលផ្តើម កសាងឆ្នាំ២០០៩ ដោយរាជរដ្ឋាភិបាល សហការជាមួយអង្គការយូនីស្កូ និងសប្បុរសជននានា និងត្រូវសម្ពោធដាក់ឱ្យ ប្រើប្រាស់ជាផ្លូវការ នៅថ្ងៃទី២០ ខែមីនា ឆ្នាំ២០១៨ ហើយបើកដំណើរការឱ្យភ្ញៀវទេសចរ ចូលទស្សនា នៅថ្ងៃទី០១ ខែឧសភា ឆ្នាំ២០១៨៕