Gabriel Barbosa ជាប់​បម្រាម២ឆ្នាំពាក់ព័ន្ធការធ្វើតេស្តសារធាតុហាមឃាត់

ខ្សែប្រយុទ្ធក្រុម Flamengo និងអតីតកីឡាករជម្រើសជាតិប្រេស៊ីល Gabriel Barbosa ត្រូវបានកាត់ទោសឲ្យជាប់បម្រាមរយៈពេល២ឆ្នាំ ពីបទក្លែងបន្លំប្រឆាំង និងការធ្វើតេស្ត​សារធាតុហាមឃាត់។

ខ្សែ​ប្រយុទ្ធ​វ័យ២៧ឆ្នាំ​ ​ដែល​ធ្លាប់បង្ហាញខ្លួនជាមួយក្រុមជម្រើស​ជាតិ​ប្រេស៊ីល​ចំនួន១៨ប្រកួត ​ត្រូវ​បាន​ជាប់​បម្រាម​២ឆ្នាំ​ពាក់​ព័ន្ធ​​នឹង​បាល់​ទាត់​ បន្ទាប់​ពី​ការ​សម្រេច​របស់​តុលាការ​កាល​ពី​ថ្ងៃ​ចន្ទ។ Barbosa មានឈ្មោះក្រៅថា Gabigol ត្រូវបានគេរកឃើញថា មានចេតនាធ្វើឲ្យមានការលំបាកក្នុងការ​ធ្វើ​តេស្ត​សារធាតុហាមឃាត់ ទោះបីជាលទ្ធផល​អវិជ្ជមានក៏ដោយ។

Gabigol ជាកីឡាករតែម្នាក់គត់ ដែលពន្យារពេលធ្វើតេស្តប្រឆាំងនឹងសារធាតុហាមឃាត់ កាលពីថ្ងៃទី៨ ខែមេសា ឆ្នាំ២០២៣ មួយ​ថ្ងៃ​មុន​ការ​ប្រកួត។ នៅពេលធ្វើការពិនិត្យនោះ រូបគេត្រូវបានគេរកឃើញថាមិនអើពើនឹងនីតិវិធី និងការណែនាំ ហើយមិនបានគោរពឲ្យតម្លៃក្រុមការងារដែលពាក់ព័ន្ធលើកិច្ចការងារនេះ។

លទ្ធផលនៃការកាត់ក្ដីលើ Gabriel Barbosa ក្នុងន័យអនុវត្តការកាត់ទោសព្យួររយៈពេល២ឆ្នាំ រហូតដល់ខែមេសាឆ្នាំ២០២៥ ត្រូវបានសម្រេច ក្នុងនោះ៥សំឡេងគាំទ្រឲ្យមានការកាត់ទោស និង៤សំឡេងគាំទ្រឲ្យមានការលើកលែងទោស។

កីឡាករ Gabigol គ្រោងនឹងប្តឹងឧទ្ធរណ៍ការសម្រេចនេះ។ ទោះបីជាយ៉ាងណាក៏ដោយ រូបគេអាចត្រូវបានកាត់ទោសឱ្យកាន់តែធ្ងន់ធ្ងរ ជាពិសេសេការផ្តន្ទាទោសចំពោះការក្លែងបន្លំប្រឆាំងនឹងធ្វើតេស្ដសារធាតុហាមឃាត់ ហើយការអនុវត្តផ្តន្ទាទោសអតិបរមារយៈពេល៤ឆ្នាំ៕

ប្រែសម្រួល៖ ផា រតនា
ប្រភព៖ Goal