ព័ត៌មានជាតិ

រោងចក្រមួយក្នុងខេត្តកំពង់ស្ពឺ ប្រមូលទិញស្វាយកែវរមៀតស្រស់ពី ៧០-១០០ តោនក្នុងមួយថ្ងៃ ច្នៃនាំចេញទៅក្រៅប្រទេស

បានផុស

៦ ខែ មុន

នៅ

ថ្ងៃពុធ ២៧ មីនា ២០២៤

ដោយ

អ្នកគ្រប់គ្រងជាន់ខ្ពស់ផ្នែកធនធានមនុស្សនៃរោងចក្រកែច្នៃ «Kirirom Food Production» នៅខេត្តកំពង់ស្ពឺបានឲ្យ«កម្ពុជាថ្មី» ដឹងថា បច្ចុប្បន្នសហគ្រាសរបស់លោកបានប្រមូលទិញចូលស្វាយកែវរមៀតស្រស់ចន្លោះពី ៧០-១០០ តោនជារៀងរាល់ថ្ងៃ ដើម្បីកែច្នៃនាំចេញទៅលក់នៅក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រមូលទិញស្វាយកែវរមៀតស្រស់ចូលរោងចក្រចន្លោះពី ៧០ ទៅ ១០០តោនក្នុងមួយថ្ងៃ ក្នុងតម្លៃកុងត្រាគឺ ៧០០ រៀល ក្នុងមួយគីឡូក្រាម ហើយតម្លៃនេះមិនប្រែប្រួលបើទោះបីជាស្វាយចុះថ្លៃខ្លាំងឬឡើងថ្លៃជាងនេះបន្តិចបន្តួចក៏ដោយ។

តំណាងរោងចក្រ «Kirirom Food Production» ដែលសុំមិនបញ្ចេញឈ្មោះប្រាប់ថា៖ «សម្រាប់តម្លៃ ៧០០ រៀលក្នុងមួយគីឡូក្រាមគឺទិញចូលពីសហគមន៍កសិកម្ម (អេស៊ី) ដែលរោងចក្របានចុះកុងត្រាជាមួយមាននៅខេត្តចំនួន ៣ រួមមានខេត្តកំពង់ស្ពឺ ដែលមាន ៦ អេស៊ី , ខេត្តកំពង់ឆ្នាំង មាន ៤ អេស៊ី និងខេត្តកំពង់ធំមាន ២ អេស៊ី»។

បើតាមអ្នកគ្រប់គ្រងនៅរោងចក្រនេះ សម្រាប់តម្លៃទូទៅទិញជាមួយកសិករមិនមានកុងតា្រ ទិញចូលចន្លោះពី ៥០០ រៀល ទៅ ៥៨០ រៀល ក្នុងមួយគីឡូក្រាម ដែលតម្លៃនេះក៏អាចប្រែប្រួលទៅតាមទីផ្សារជាក់ស្ដែងផងដែរ។

ពាក់ព័ន្ធទៅនឹងការប្រមូលទិញស្វាយកែវរមៀតស្រស់ចូលក្នុងរោងចក្រចន្លោះពី ៧០ ទៅ ១០០តោន វិលជុំជារៀងរាល់ថ្ងៃ អ្នកគ្រប់គ្រងធនធានមនុស្សនៃរោងចក្រកែច្នៃរូបនេះបានប្រាប់ថា ខាងរោងចក្របានប្រមូលទិញពី ៤ ប្រភពផ្សេងគ្នា ដោយទី១ ប្រជាកសិករដែលមានដំណាំស្វាយ ទី២ អ្នកដែលម៉ៅការដំណាំស្វាយគេធ្វើបានន័យថា ម៉ៅការដំណាំស្វាយ ដើម្បីបានផលដើម្បីយកមកលក់ ទី៣ ពីស្តង់ស្វាយ ទី៤ ទិញពីអេស៊ី និងទី៥ ប្រមូលផលពីចម្ការផ្ទាល់ ព្រោះក្រុមហ៊ុនមានចម្ការដាំដុះដំណាំស្វាយប្រមាណ ៦០០ហិតា ដែលអាចយកមកផ្គត់ផ្គង់ក្នុងរោងចក្រប្រមាណ ១០% ផងដែរ។

«សម្រាប់ស្វាយកែវរមៀតស្រស់ដែលនាំចូលមកក្នុងរោងចក្រ មិនមែនជាប្រភេទស្តង់ដារស្វាយលេខ ១ ឬលេខ ២ នោះទេ ព្រោះប្រភេទស្វាយលេខ ១ និង ២ គឺសម្រាប់នាំចេញទៅកាន់ទីផ្សារអន្តរជាតិ ទាំងស្វាយខ្ចប់ និងស្វាយខៀវ។ សម្រាប់រោងចក្រ នាំចូលប្រភេទស្វាយលេខ ៣ ហើយទំហំអាចទទួលយកបានចន្លោះពី ៣-៤ ស្វាយ ស្មើ ១គីឡូក្រាម»។ ប្រភពបញ្ជាក់បន្ថែម។

ស្វាយកែវរមៀតអាចប្រមូលផលបានពីរដងក្នុងមួយឆ្នាំ គឺចាប់ពីខែកុម្ភៈដល់ខែមិថុនា និងមួយលើកទៀតចាប់ពីខែ តុលា-ធ្នូ។ នៅក្នុងខែចន្លោះពីខែ កុម្ភៈដល់ខែមិថុនា ដែលជារដូវប្រមូលផលស្វាយអាចនឹងមានបញ្ហាចាល់តម្លៃ។ បើតាមអ្នកតំណាងរោងចក្រ ជាធម្មតាទេសម្រាប់តម្លៃស្វាយកែវរមៀតក្នុងរដូវប្រមូលផលនេះនឹងរាងធ្លាក់ថ្លៃបន្តិច ដោយសារតែពលរដ្ឋប្រមូលផលដំណាលគ្នាដែលធ្វើឲ្យបរិមាណស្វាយមានចំនួនកើនឡើង។

លោក ជូ សារឹម ប្រធានការិយាល័យអភិវឌ្ឍន៍សហគមន៍ខេត្តកំពង់ស្ពឺបានឲ្យ «កម្ពុជាថ្មី» ដឹងដែរថា ទីផ្សារស្វាយមានការឡើងចុះ។ បច្ចុប្បន្ននេះស្វាយកែវរមៀតនៅក្នុងខេត្តកំពង់ស្ពឺផ្ទាល់ បានធ្លាក់មកនៅតម្លៃ ៤០០ ទៅ ៤៥០រៀល ក្នុងមួយគីឡូក្រាមសម្រាប់ការនាំចេញ។ ក្នុងនោះមានឈ្មួញកណ្ដាល និងកសិករ ចុះទៅទិញយកដល់ចម្ការ និងកសិករប្រមូលផលដឹកយកទៅដល់រោងចក្រផ្ទាល់ អាចទទួលបាន ៥០០ រៀល ទៅ ៥៥០រៀលក្នុងមួយគីឡូក្រាម។

លោកបន្តថា ជាធម្មតាតាមរោងចក្រកែច្នៃនីមួយៗក្នុងខេត្ត សុទ្ធសឹងតែមានតម្រូវការ និងចំនួនកំណត់ក្នុងការនាំចូល ស្តុកទុកកែច្នៃក្នុងរោងចក្រជាស្វាយដំណាប់ជាផលិតផលសម្រេច និងពាក់កណ្ដាលសម្រេច សម្រាប់នាំចេញទៅកាន់ទីផ្សារក្រៅប្រទេស ដូចជាប្រទេសចិន កូរ៉េ ទៅតាមពេលវេលាសមស្របណាមួយ។

«ស្វាយទើបតែធ្លាក់ចុះតម្លៃនាចុះរដូវប្រមូលផលនេះប៉ុណ្ណោះ ព្រោះកាលពីកំឡុងខែវិច្ឆិកា ដល់ខែកុម្ភៈ តម្លៃស្វាយក្នុងខេត្តមានតម្លៃល្អ ដោយអាចលក់ចេញបានក្នុងតម្លៃចន្លោះពី ៩០០រៀល ទៅដល់ ១២០០រៀល ក្នុងមួយគីឡូក្រាមដែលស្វាយដើមរដូវប្រមូលផលបានល្អ និងមានតម្រូវការទីផ្សារច្រើន។ នេះបើតាមលោក ជូ សារឹម។

ទើបតែឈានមកដល់ចុងខែកុម្ភៈ ដល់ខែមីនា នេះ ស្វាយចាប់ផ្ដើមធ្លាក់ថ្លៃមកនៅចន្លោះពី ៤០០រៀល ទៅ ៥០០រៀលក្នុងមួយគីឡូក្រាម»។

ក្នុងនាមលោក ជាប្រធានការិយាល័យអភិវឌ្ឍន៍សហគមន៍ខេត្តកំពង់ស្ពឺ លោកនៅតែតាមជួយគាំទ្រនិងជំរុញដល់ប្រជាកសិករ ឲ្យដាំដុះស្វាយស្របតាមលក្ខណៈបច្ចេកទេសស្តង់ដារ ដើម្បីអាចទទួលបានតម្រូវការទីផ្សារល្អ ហើយលោកក៏នឹងព្យាយាមស្វែងរកទីផ្សារសំដៅធ្វើយ៉ាងណាជួយឲ្យកសិករមានទីផ្សារល្អប្រសើរ៕