កីឡា

លន បញ្ញា ប្រាប់ថា យប់មិញបើប្រឹងវ៉ៃតាំងពីទឹក១ រូបគេនឹងសន្លប់ម្តងទៀត

បានផុស

៩ ខែ មុន

នៅ

ថ្ងៃចន្ទ ១ មេសា ២០២៤

ដោយ

កីឡាករគុនខ្មែរ លន បញ្ញា បានធ្លាយកំណត់ត្រាជ័យជម្នះជាង៣ឆ្នាំរបស់ខ្លួនដោយជើងខ្លាំង ឡៅ ចិត្រា ក្នុងការប្រកួតដណ្តើមខ្សែក្រវាត់គុនខ្មែរដែលមានប្រាក់រង្វាន់១ម៉ឺនដុល្លារអាមេរិកនៅយប់ថ្ងៃទី៣១ ខែមីនា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការតស៊ូគ្នា៥ទឹកពេញ ឡៅ ចិត្រា បានវាយកណ្តាប់ដៃឲ្យអាជ្ញាកណ្តាលរាប់ លន បញ្ញា ៨ម្តងក្នុងទឹកទី២ ប៉ុន្តែនៅទឹកទី ៤ និង៥ លន បញ្ញា ហាក់មានសន្ទុះចិត្តវ៉ៃលះជាង៣ទឹកដំបូង។ ការប្រកួតនេះ រូបគេហាក់ដូចជាចាញ់ច្រាប ឡៅ ចិត្រា តែម្តងសម្រាប់ពីរបីទឹកដំបូង ដោយសាររូបគេធ្លាប់ចាញ់សន្លប់ម្តងកាលពីឆ្នាំ២០១៩។

បរាជ័យនេះ លន បញ្ញា ទទួលបានប្រាក់លើកទឹកចិត្ត៥ពាន់ដុល្លារអាមេរិក ខណៈ ឡៅ ចិត្រា ទទួលបានខ្សែក្រវាត់ដែលមានប្រាក់រង្វាន់១ម៉ឺនដុល្លារអាមេរិក។

លន បញ្ញា បាននិយាយថា ៖«ខ្ញុំពិតជាសោកស្តាយខ្លាំងមែនទែនដែលកំណត់ត្រាមិនធ្លាប់ចាញ់រយៈពេល៣ឆ្នាំត្រូវបានបញ្ចប់។ នៅទឹកទី១ដល់៣ ខ្ញុំមិនសូវបានវ៉ៃទេ ដោយសារប្រុងប្រយ័ត្នខ្លាំង ពីព្រោះអាវុធរបស់ ឡៅ ចិត្រា ធ្ងន់។ ប្រសិនបើខ្ញុំខំប្រឹងវ៉ៃតាំងពីទឹកទី១ ខ្ញុំប្រហែលជាសន្លប់ម្តងទៀតដោយសារអាវុធគាត់ខ្លាំង»។

ជាមួយគ្នានេះ លន បញ្ញា បានសូមអភ័យទោសពីអ្នកគាំទ្រដែលខ្លួនធ្វើមិនបានល្អ ឬប្រកួតដែលមិនបានផ្តល់ការពេញចិត្តសម្រាប់អ្នកគាំទ្រ ប៉ុន្តែរូបគេបានខិតខំប្រឹងប្រែងអស់ពីសមត្ថភាព។

កាលពីឆ្នាំ២០១៩ លន បញ្ញា ធ្លាប់ចាញ់សន្លប់ក្រោមផ្លែកែងរបស់ ឡៅ ចិត្រា ក្នុងការប្រកួតវគ្គផ្តាច់ព្រត្រដណ្តើមខ្សែក្រវាត់មាសនៅសង្វៀន PNN ដែលពេលនោះ ឡៅ ចិត្រា ទទួលបានប្រាក់រង្វាន់១ម៉ឺនដុល្លារ៕

អត្ថបទ៖ វីរបុត្រ