ព័ត៌មានជាតិ
ហាងឆេងស្វាយទុំតាមផ្សារនៅខេត្តបាត់ដំបង! បើផ្លែធំល្អអាចលក់បានដល់ ៤៥០០ រៀលក្នុងមួយគីឡូ
នៅតាមបណ្តាទីផ្សារនានាក្នុងក្រុងបាត់ដំបង គេសង្កេតឃើញស្វាយទុំកែវរមៀតមានដាក់លក់ជាហូរហែនិងនៅតាមទីផ្សារតាមស្រុកមួយចំនួនក៏មានលក់ជាច្រើនផងដែរ ហើយតម្លៃមិនដូចគ្នានោះទេ។ កន្លែងខ្លះថ្លៃ កន្លែងខ្លះថោកសមរម្យ កន្លែងខ្លះថ្លៃគុណជាពីរក៏មាន ខណះដែលអ្នកលក់លើកហេតុផលតម្លៃអាស្រ័យទៅលើទំហំនិងគុណភាពរបស់ផ្លែស្វាយ ខណៈក៏មានប្រជាពលរដ្ឋដែលចូលចិត្តទិញយកទៅបរិគោគតាមតម្រូវការ។
![](https://www.kampucheathmey.com/wp-content/uploads/2024/04/photo1712039409.jpeg)
កំពុងឈរចិតស្វាយទុំបរិភោគជាមួយបាយត្រីងៀត លោកស្រី ចាន់នី ក្នុងវ័យ ៤២ ឆ្នាំ រស់នៅសង្កាត់ រតនះ ក្រុងបាត់ដំបងបានឲ្យដឹងថា លោកស្រីទើបមកពីផ្សារទិញម្ហូបផ្សេងៗ ហើយដោយសារតែកូនៗរបស់អ្នកស្រីចូលចិត្តស្វាយទុំញាំជាមួយបាយ ទើបលោកស្រីទិញស្វាយទុំកែវរមៀតបានចំនួន ០៣ គីឡូក្រាម ដោយក្នុង ១ គីឡូក្រាមតម្លៃ ២៥០០ រៀល បើគិតជាចំនួនផ្លែបានចំនួន ៧ ផ្លែ។
លោកស្រីថា «តម្លៃប៉ុណ្នឹងខ្ញុំគិតថាអត់ថ្លៃទេ»។ ស្រ្តីរូបនេះបន្តថា ក្រុមគ្រួសារលោកស្រីចូលចិត្តបរិភោគស្វាយទុំជាមួយបាយណាស់ ជូនកាល ១ អាទិត្យ ៣ ដង បើអស់រដូវស្វាយគឺម្នាស់ទុំ។
![](https://www.kampucheathmey.com/wp-content/uploads/2024/04/photo1712039409-4-768x1024.jpeg)
ក្នុងសកម្មភាពកំពុងដកលុយចេញពីកាបូបអាប់ឲ្យអតិថិជន បណ្តើរឆ្លៀតប្រាប់កម្ពុជាថ្មីបណ្តើរ លោកស្រី ផានិត ជាអាជីវករលក់ស្វាយនៅក្នុងផ្សារ ១៣ មករា ក្នុងក្រុងបាត់ដំបងប្រាប់ថា នៅពេលដល់រដូវស្វាយទុំ តែងលក់រាល់រដូវកាលមិនដែលខកខានទេ។
ស្វាយដែលអ្នកស្រីដាក់លក់នេះគឺជាដំណាំផ្ទាល់ខ្លួន ដែលបានដាំជាកូនចម្ការនៅលើដីភូមិ។ ទាក់ទងតម្លៃ លោកស្រីប្រាប់ថា បើសិនផ្លែធំតម្លៃលក់បានចន្លោះពី ២ ៥០០ ដល់ ៣ ០០០ រៀលក្នុង ១ គីឡូក្រាម។ បើផ្លែតូចល្មមលក់បានពីចន្លោះ ១ ៥០០ រៀលទៅ ២ ០០០ រៀល។
មុខរបរលក់ស្វាយទុំប្រចាំរដូវ ស្រ្តីជាអាជីវករូបនេះបានបេះបន្ទុំលក់រាល់រដូវកាល គ្រាន់បានថវិកាទ្រទ្រង់ជីវភាពគ្រួសារពីមួយឆ្នាំដល់មួយឆ្នាំ ដោយមិនបានលក់បន្តដល់អ្នកផ្សេងនោះទេ។
អ្នកស្រី ផានិតប្រាប់ថា ដំណាំស្វាយ ដែលអ្នកស្រីបានដាំក្នុងដីភូមិ បានជួយដោះបន្ទុកសេដ្ឋកិច្ចគ្រួសារអ្នកស្រីបានយ៉ាងច្រើន ទាំងការបរិភោគប្រចាំថ្ងៃទាំងថ្លៃសិក្សារបស់កូនៗ ដែលអាចដោះស្រាយបានយ៉ាងសមរម្យដូចគេដូចឯងដែរ។ អ្នកស្រីថា ឲ្យតែដល់រដូវស្វាយទុំអ្នកស្រីលក់នៅតែទីផ្សាររហូត ដល់លក់ស្វាយអស់ទើបទំនេរ។ អ្នកស្រីបន្តថា ការលក់ដូរមិនជាហត់អីទេ ពេលខ្លះក៏សប្បាយចិត្តក្នុងការលក់ដាច់ច្រើន ពេលខ្លះក៏លក់សល់ តែក៏មិនមានការខាតបង់លុយកាក់អីដែរ បើទោះបីសល់ព្រោះដាំដោយខ្លួនឯង។
ដំណាំស្វាយ គឺជាផលិផលទំនៀមទម្លាប់របស់ខ្មែរ តែងនិយមបរិភោគដែលមិនអាចខ្វះបានទាំងផ្លែ ចាស់ ខ្ចី ទុំ ជាពិសេសផ្លែទុំភាគច្រើន ប្រជាជនយកធ្វើជាអាហារជាមួយត្រីងៀត ដែលជាទម្លាប់ពីដូនតា។ យ៉ាងណាមិញ មិនមានតួលេខណាមួយរកឃើញថា ការនិយមបរិភោគស្វាយទុំរបស់ប្រជាជនខ្មែរមានការថយនោះទេ។
![](https://www.kampucheathmey.com/wp-content/uploads/2024/04/photo1712039409-3-768x1024.jpeg)
បើតាមពលរដ្ឋប្រាប់ថា ស្វាយទុំដល់រដូវកៀកចូលឆ្នាំពិបាករកទិញ ហើយតម្លៃក៏ថ្លៃគួរសមដែរ។ តម្លៃស្វាយទុំបានចុះជាងដើមដៃ នៅសល់តែជាង ១ គីឡូក្រាមចន្លោះពី ១៥០០ រៀលទៅ ២០០០ រៀលប៉ុណ្ណោះ សម្រាប់តាមទីផ្សារនានាក្នុងក្រុង តែកន្លែងខ្លះក៏មានលក់ក្នុងតម្លៃ ៣០០០ ទៅ ៤០០០ រៀលផងដែរ ក្នុង១គីឡូក្រាម។
នៅក្នុងស្រុកមោងឫស្សី លោកស្រី ធីម អាជីករលក់ស្វាយទុំមួយរូបបានប្រាប់ថា ស្វាយទុំកែវរមៀតអាចលក់បានក្នុងតម្លៃចន្លោះពី ៣ ៥០០ រៀលទៅ ៤៥០០រៀលក្នុង១គីឡូក្រាម។
ស្រ្តីរូបនេះបានប្រាប់ថា លោកស្រីបានដើរទិញតាមភូមិ ក្នុង១គីឡូក្រាមចន្លោះពី ៣០០ ទៅ ៤០០ រៀល ដើម្បីយកមកបន្ទុំលក់បន្ត ដែលក្នុង១គីឡូក្រាមលក់បានចន្លោះពី ៣៥០០ រៀលទៅ ៤៥០០ រៀល។
លោកស្រី គឹមហន រស់នៅភូមិរំចេក៤ សង្កាត់រតនះ ក្រុងបាត់ដំបង ក្នុងដំណើរមកពីភ្នំពេញបានឈប់តាមផ្លូវពេលមកដល់ស្រុកសង្កែ អ្នកស្រីបានទិញផ្លែស្វាយទុំផ្ញើអ្នកផ្ទះចំនួន ៤ គីឡូក្រាម ដោយក្នុង ១ គីឡូក្រាមតម្លៃ ៣៥០០ រៀល បើផ្លែណាធំល្អ១គីឡូក្រាម ៤៥០០ រៀល ប្រហាក់ប្រហែលតម្លៃនៅក្នុងស្រុកមោងឫស្សីផងដែរ។
![](https://www.kampucheathmey.com/wp-content/uploads/2024/04/photo1712039409-2-1024x768.jpeg)
![](https://www.kampucheathmey.com/wp-content/uploads/2024/04/photo1712039409-1-1024x768.jpeg)
ទាក់ទិន្ននិងទិន្នផលផ្លែស្វាយនេះ បើយោងតាមរបាយការណ៍ពីមន្ត្រីនៃមន្ទីរកសិកម្មខេត្តបាត់ដំបងបានបង្ហាញថា ខេត្តបាត់ដំបងបាននាំចេញផ្លែស្វាយស្រស់ នៅតាមច្រកព្រំដែនចំនួន ២ គឺច្រកព្រំដែន អូរអន្លក់ និងច្រកដូង ក្នុងស្រុកកំរៀង ក្នុងនោះច្រក អូរអន្លក់ ក្នុង ១ ថ្ងៃនាំចេញផ្លែស្វាយស្រស់ចំនួន ១៥ តោន និង ច្រកដូង នាំចេញបាន ១០០ តោនក្នុង១ ថ្ងៃ ហើយបើគិតត្រឹម ថ្ងៃទី៣១ ខែមិនា ឆ្នាំ២០២៤ បរិមាណកសិផលផ្លែស្វាយដែលបាននាំចេញសរុប ១៥,៩៩៥ តោន៕
អត្ថបទ៖ សៅ សារិទ្ធ
-
សន្តិសុខសង្គម៤ ថ្ងៃ ago
ជនដៃដល់ បាញ់មនុស្ស២នាក់ស្លាប់ នៅបុរីប៉េងហួត មានគោរម្យងារជា ឧកញ៉ា
-
KPT+៧ ថ្ងៃ ago
ប្រវត្តិដ៏គួរឱ្យចាប់អារម្មណ៍របស់ វត្តចំណាស់ទាំង ៧ ក្នុងខេត្តបាត់ដំបង
-
សន្តិសុខសង្គម៤ ថ្ងៃ ago
សមត្ថកិច្ច ចាប់បានបុរសដែលបាញ់មនុស្ស២នាក់ឱ្យស្លាប់ និងរបួស នៅបុរីប៉េងហ៊ួតបឹងស្នោ
-
សន្តិសុខសង្គម៤ ថ្ងៃ ago
Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ
-
ព័ត៌មានជាតិ៣ ថ្ងៃ ago
សមាគមឧកញ៉ា នឹងស្នើបញ្ចប់ងារឧកញ៉ាពីឈ្មោះ ស្រី ស៊ីណា ក្រោយបាញ់ឱ្យមនុស្សស្លាប់
-
អត្ថាធិប្បាយ៤ ថ្ងៃ ago
សមត្ថកិច្ចប្រើពេល៣ម៉ោង ក្របួចកឧកញ៉ាប្រើកាំភ្លើងផ្ដាច់ជីវិតគូរស្នេហ៍មួយគូរ
-
KPT+១ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ១ សប្តាហ៍ ago
ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ ប្រកាសបើកការដ្ឋាននៅថ្ងៃ ១៧ មិថុនា នេះ