ប៉ូលិស មីយ៉ាន់ម៉ា បញ្ជូនជនសង្ស័យឆបោកតាមអនឡាញជាង ៣៥០ នាក់ទៅ ចិន

ប៉ូលិសមីយ៉ាន់ម៉ាបានបញ្ជូនជនជាតិចិនចំនួន ៣៥២ នាក់ដែលជាប់សង្ស័យលើករណីក្លែងបន្លំ និងធ្វើសកម្មភាពឆបោកតាមអនឡាញទៅកាន់ប្រទេសកំណើតវិញ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Xinhua កាលពីថ្ងៃទី៣ ខែមេសាកន្លងទៅ ។

ចាប់តាំងពីប៉ូលិសមីយ៉ាន់ម៉ា និងចិនដាក់ចេញប្រតិបត្តិការព្រួតដៃគ្នាជាលើកដំបូងនៅតំបន់ Muse ភាគខាងជើងប្រទេសមីយ៉ាន់ម៉ាមក ប៉ូលិសបានចាប់ខ្លួនជនសង្ស័យសរុបចំនួន ៨០៧ នាក់ដែលជាប់ពាក់ព័ន្ធនឹងករណីក្លែងបន្លំ និងឆបោកឆ្លងព្រំដែន ខណៈក្នុង​ចំណោម​នោះ មាន ៣៥២ ​នាក់​ជា​ជនជាតិ​ចិន ចំណែក ​៤៥៥ ​នាក់ទៀត​ជា​ពលរដ្ឋ​មី​យ៉ាន់​ម៉ា ។

ទន្ទឹមនោះ ក្នុងចំណោមជនសង្ស័យជនជាតិចិនដែលត្រូវបានចាប់ខ្លួន មាន ២១ នាក់កំណត់មុខសញ្ញាជាសមាជិកដ៏សំខាន់នៃក្រុមឆបោកតាមអនឡាញ និង ៥១ នាក់ជាជនសង្ស័យរត់គេចខ្លួនដោយខុសច្បាប់ ។ លើសពីនេះ វត្ថុតាងដែលទាក់ទងនឹងឧក្រិដ្ឋកម្មមួយចំនួនធំដូចជា កុំព្យូទ័រ ទូរស័ព្ទដៃ និងស្គ្រីបឆបោកក៏ត្រូវបានរឹបអូសផងដែរ ក្នុងអំឡុងប្រតិបត្តិការមួយនេះ ។

គួរបញ្ជាក់ថា ចាប់តាំងពីឆ្នាំ ២០២៣ មក ជនជាតិចិនចំនួន ៤៨,០០០ នាក់ដែលជាប់សង្ស័យលើករណីក្លែងបន្លំ និងឆបោកតាមអនឡាញត្រូវបានបញ្ជូនចេញពីប្រទេសមីយ៉ាន់ម៉ាទៅកាន់ប្រទេសចិន ខណៈក្រសួងសន្តិសុខសាធារណៈរបស់ចិន (MPS) ក៏បានជំរុញឲ្យបុគ្គលដែលពាក់ព័ន្ធនឹងករណីបោកប្រាស់តាមអនឡាញ គួរតែលើកទង់ ស សុំចុះចូលជាមួយអាជ្ញាធរភ្លាមៗ ដើម្បីអាចសម្រាលទោសទណ្ឌក្នុងការដោះស្រាយសំណុំរឿងក្ដីរបស់ពួកគេ ៕

ដោយ ៖ សុខ ជីវ័ន្ត

ចុចអាន ៖ UNICEF ថា ឆ្នាំមុនជនរងគ្រោះ ដោយសារគ្រាប់មីននៅ មីយ៉ាន់ម៉ា កើនឡើង មួយគុណនឹងពីរ