ខ្យល់ព្យុះដ៏សាហាវនៅអាហ្វ្រិកខាងត្បូង បក់បំប៉ើងរថយន្តធ្លាក់ពីលើស្ពាន ផុយៗ

វីដេអូដ៏រន្ធត់ផ្សាយលើគេហទំព័រ Daily Mail បានថតជាប់រថយន្តចំនួន២គ្រឿង ត្រូវខ្យល់ព្យុះដ៏សាហាវ បក់បំប៉ើងធ្លាក់ពីលើស្ពានឆ្លងផ្លូវហាយវ៉េ N1 ចម្ងាយជាង ៦០ម៉ែត្រ ពីទីក្រុង Cape Town ក្នុងប្រទេសអាហ្វ្រិកខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីចុងសប្តាហ៍កន្លងទៅ ស្របពេលដែលតំបន់ជាច្រើននៅភាគខាងត្បូងប្រទេសអាហ្វ្រិកខាងត្បូង ត្រូវរងការវាយប្រហារដោយព្យុះ ខណៈខ្យល់បក់ខ្លាំងក៏បោកបំប៉ើងដំបូងអគារ និងផ្តួលរំលំដើមឈើដួលពេញផ្លូវបង្កជាគ្រោះថ្នាក់ផងដែរ។

ក្នុងហេតុការណ៍ទីមួយ រថយន្តដឹកទំនិញ ត្រូវបានខ្យល់បក់បោកធ្លាក់ពីស្ពាន ខណៈដែលរថយន្តផ្សេងទៀតនៅលើផ្លូវ កំពុងតែទប់ទល់នឹងកម្លាំងខ្យល់។

ចំណែកឯហេតុការណ៍ទីពីរ រថយន្តមួយគ្រឿងទៀត ត្រូវបានខ្យល់បក់ប៉ើងដូចសំឡី ធ្លាក់ពីលើស្ពាន ទោះប្រឹងតស៊ូជាមួយព្យុះយ៉ាងណាក៏ដោយ។

ទោះបែបនេះក្តី យោងតាមប្រភពព័ត៌មានពីអាជ្ញាធរអាហ្វ្រិកខាងត្បូង, គ្មាននរណាម្នាក់បាត់បង់ជីវិតក្នុងគ្រោះថ្នាក់នេះឡើយ ពោលគឺត្រឹមរងរបួសប៉ុណ្ណោះ។ 

ហេតុការណ៍ខាងលើកើតឡើងជាងមួយសប្តាហ៍ បន្ទាប់ពីមនុស្សចំនួន៤៥នាក់ បានស្លាប់ក្នុងគ្រោះថ្នាក់រថយន្តក្រុងធ្លាក់ស្ពានកម្ពស់៥០ម៉ែត្រ ចូលជ្រោះ ក្នុងខេត្ត Limpopo ភាគឦសានប្រទេសនេះ ប៉ុន្តែមានកុមារី​អាយុ៨​ឆ្នាំ​ ម្នាក់គត់ដែលនៅរស់ គ្រាន់តែរបួសធ្ងន់។

ចំពោះហេតុការណ៍នោះ តាមការផ្សាយរបស់ទូរទស្សន៍រដ្ឋអាហ្រ្វិកខាងត្បូង SABC បានឲ្យដឹងថា អ្នកជិះរថយន្តទាំងអស់ គឺ​ជា​អ្នក​ធ្វើ​ធម្មយាត្រា ​ធ្វើ​ដំណើរ​ពី​រដ្ឋធានី Gaborone របស់​ប្រទេសបុតស្វាណា ទៅចូលរួមពិធី​បុណ្យ Easter ក្នុង​ទីក្រុង Moria។

រថយន្តបានបាត់បង់ការគ្រប់គ្រង ហើយធ្លាក់ស្ពានឆ្លងភ្នំ Mmamatlakala ដែលតភ្ជាប់តំបន់ Mokopane និង Marken ស្ថិតនៅចម្ងាយប្រហែល ៣០០គីឡូម៉ែត្រ ភាគខាងជើងទីក្រុង Johannesburg។

ប្រទេសអាហ្រ្វិកខាងត្បូង មានមនុស្សស្លាប់តាមដងផ្លូវជាង១២ ៤០០នាក់ក្នុងឆ្នាំ ២០២២ ខណៈសមាគមរថយន្តនៃប្រទេសអាហ្រ្វិកខាងត្បូង បានហៅការស្លាប់ដោយគ្រោះថ្នាក់ចរាចរណ៍ថាជា “វិបត្តិជាតិ” ហើយជំរុញរដ្ឋាភិបាល ពង្រឹង​ច្បាប់​ចរាចរណ៍​ឲ្យ​បាន​ល្អ​ប្រសើរ៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ រថយន្តក្រុងធ្លាក់ជ្រោះនៅអាហ្វ្រិកខាងត្បូង ស្លាប់មនុស្ស៤៥នាក់ រស់តែកុមារីអាយុ៨ឆ្នាំម្នាក់