សម្ដេច ហ៊ុន ម៉ាណែត៖ កម្ពុជាគ្មានមហិច្ឆតាទៅបង្កើតសង្គ្រាមជាមួយប្រទេសណាមួយឡើយ

កម្ពុជាគ្មានមហិច្ឆតាទៅបង្កើតសង្ក្រាមជាមួយប្រទេសណាមួយឡើយ ផ្ទុយទៅវិញ កម្ពុជាមានតែខិតខំពង្រឹងទំនាក់ទំនង និងកិច្ចសហប្រតិបត្តិការជាមួយគ្រប់ប្រទេសទាំងអស់។ នេះជាថ្លែងរបស់សម្ដេច ហ៊ុន ម៉ាណែត ចេញពីស្រុកបាទី ខេត្តតាកែវ នាព្រឹកថ្ងៃទី១១ ខែមេសា ឆ្នាំ២០២៤នេះ។

ក្នុងពិធីសម្ពោធកសិដ្ឋានចិញ្ចឹមគោយកទឹកដោះ នាព្រឹកថ្ងៃនេះ សម្ដេចធិបតីនាយករដ្ឋមន្ត្រី ហ៊ុន ម៉ាណែត បានបញ្ជាក់យ៉ាងច្បាស់ៗថា កម្ពុជាគ្មានពេលទៅឈ្លោះជាមួយបរទេសណាឡើយ ព្រោះកម្ពុជា ជាប់ដៃរក្សាសន្តិភាពផ្ទៃក្នុងជាតិខ្លួនឯង ដើម្បីធានាបាននូវការអភិវឌ្ឍដ៏រីកចម្រើនតទៅមុខទៀត។ សម្ដេចធិបតី ថ្លែងដូច្នេះថា៖ «ប្រទេសកម្ពុជា គ្មានបង្កើតសត្រូវជាមួយប្រទេសណាទេ យើងប្រកាន់ជំហរមិត្តជាមួយគ្រប់ប្រទេសទាំងអស់ ហើយគ្មានយកប្រទេសណាជាសត្រូវ​ យើងសហការរស់ជាមួយគ្នាដោយសុខដុមនីយកម្ម»។

សម្ដេចនាយករដ្ឋមន្ត្រី ហ៊ុន ម៉ាណែត បានលើកឡើងថា គោលនយោបាយអន្តរជាតិរបស់កម្ពុជា គឺបង្កើតទំនាក់ទំនងជាមិត្តភាពជាមួយប្រទេសលើពិភពលលោកទាំងអស់ ពោល គឺកម្ពុជាមិនយកប្រទេសណាជាសត្រូវឡើយ។ សម្ដេចធិបតី បញ្ជាក់ថា បច្ចុប្បន្ន កម្ពុជា បាននិងកំពុងខិតខំធ្វើយ៉ាងណាកុំឱ្យតែផ្ទុះសង្គ្រាមផ្ទៃក្នុងខ្លួនឯង ជាការប្រសើរពេកហើយ គ្មានពេលទៅធ្វើសង្ក្រាមជាមួយប្រទេសណាទេ។

សម្ដេចធិបតី គូសបញ្ជាក់ដូច្នេះថា៖ «កម្ពុជា គ្មានមហិច្ឆតា ឬគ្មានគោលបំណងយកប្រទេសខ្លួនឯងទៅសង្គ្រាមជាមួយប្រទេសណា ទោះបីក្នុងសង្គ្រាមការទូត សង្គ្រាមសេដ្ឋកិច្ច ឬមួយសង្គ្រាមប្រដាប់អាវុធ គឺយើងគ្មានទេ មានតែខិតខំពង្រឹងនូវចំណងមិត្តភាពរបស់យើង»។ ដោយឡែក លើបញ្ហាព្រំដែន ត្រូវបានសម្ដេចធិបតី បញ្ជាក់ថា កម្ពុជា បានខិតខំដោះស្រាយដោយសន្តិវិធីជាមួយប្រទេសជិតខាងកម្ពុជា តាមលក្ខណៈបច្ចេកទេស ហើយជាមួយគ្នានេះ កម្ពុជា ក៏បានរួមគ្នាពង្រឹងកិច្ចសហប្រតិបត្តិការទ្វេភាគី ដើម្បីប្រយោជន៍សេដ្ឋកិច្ចរួម ផងដែរ៕