ឧត្តមសេនីយ៍ឯក ហ៊ុន ម៉ានិត ជំរុញឱ្យទ័ពពិសេស បន្តស្រាវជ្រាវជំនាញថ្មីៗបន្ថែមទៀត ដើម្បីបង្កើនសមត្ថភាព

មេបញ្ជាការរងកងទ័ពជើងគោក ​ឧត្តមសេនីយ៍ឯក ហ៊ុន ម៉ានិត បានជំរុញឱ្យយោធិននៃបញ្ជាការដ្ឋានទ័ពពិសេស ត្រូវបន្តសិក្សាស្រាវជ្រាវចំណេះជំនាញថ្មីៗបន្ថែមទៀត ដើម្បីបង្កើនសមត្ថភាព និងឆ្លើយតបតាមសភាពការណ៍សង្គមជាក់ស្តែង។

ក្នុងពិធីបិទ និងបើកវគ្គហ្វឹកហ្វឺនរបស់យោធិននៃបញ្ជាការដ្ឋានទ័ពពិសេស នៅសាលាហ្វឹកហ្វឺនទ័ពពិសេសតេជោសែន ឱរ៉ាល់ ខេត្តកំពង់ស្ពឺ នាថ្ងៃទី១០ ខែមេសា ឆ្នាំ២០២៤ ឧត្តមសេនីយ៍ឯក ហ៊ុន ម៉ានិត អគ្គនាយកនៃអគ្គនាយកដ្ឋានស្រាវជ្រាវចារកិច្ច និងជាមេបញ្ជាការរងកងទ័ពជើងគោក បានសម្ដែងការអបអរសាទរដល់សិក្ខាកាមទាំងអស់ដែលបានបញ្ចប់វគ្គហ្វឹកហ្វឺន និងសិក្ខាកាមថ្មី ដែលត្រូវចូលរួមវគ្គហ្វឹកហ្វឺន ជាបន្តបន្ទាប់លើជំនាញផ្សេងៗ រួមមាន ឆត្រយោង ឆត្រយោងបញ្ជា ប្រឆាំងភេរវកម្ម បើក-ជួសជុលអូប័រ និងឯកទេសមុជទឹក។

ឧត្តមសេនីយ៍ឯក ហ៊ុន ម៉ានិត ចាត់ទុកការហ្វឹកហ្វឺនទាំងនេះ គឺការកសាង និងអភិវឌ្ឍន៍ធនធានមនុស្សលើវិស័យការពារជាតិ បង្កើនសមត្ថភាពកងទ័ពពិសេសរបស់កម្ពុជា ក្នុងការប្រយុទ្ធ ការចូលរួមទប់ស្កាត់ឧក្រិដ្ឋកម្មផ្សេង និងបដិវត្តន៍ពណ៌ ជាពិសេសប្រឆាំងភេរវកម្ម ហើយធានាដល់ការថែរក្សាសុខសន្តិភាព។ លោកឧត្តមសេនីយ៍ឯក បន្តថា ភាពជោគជ័យនាថ្ងៃនេះ អាស្រ័យដោយការដឹកនាំរបស់អង្គភាព សាមីខ្លួនឯង មានភាពស្មោះត្រង់ តស៊ូ ឆន្ទៈ និងភាពអង់អាច ក៏ដូចជាការគាំទ្រពីក្រុមគ្រួសារ និងការជំរុញលើកទឹកចិត្តពីយោធាចារ្យ ជាពិសេសកត្តាសាមគ្គីភាពរបស់កងទ័ព។

ឧត្តមសេនីយ៍ឯក ហ៊ុន ម៉ានិត បានបង្ហាញក្ដីសង្ឃឹមយ៉ាងមុតមាំថា «កងទ័ពពិសេសរបស់យើង នឹងបន្តហ្វឹកហាត់ជាប្រចាំ បន្តសិក្សាស្រាវជ្រាវនូវចំណេះជំនាញថ្មីៗ ដើម្បីបង្កើនសមត្ថភាពរបស់ខ្លួន ឆ្លើយតបទាន់ពេលវេលា និងមានប្រសិទ្ធភាពនូវសភាពការណ៍ជាក់ស្តែង»។ បន្ថែមពីនេះ ឧត្តមសេនីយ៍ឯក ហ៊ុន ម៉ានិត ក៏បានណែនាំឱ្យយោធិនទាំងអស់ជៀសឱ្យឆ្ងាយពីគ្រឿងញៀនទាំងពួង ដោយរួមគ្នាលុបបំបាត់គ្រឿងញៀន៕