ពលរដ្ឋនាំគ្នាសម្រុកចូលក្នុងព្រៃកាប់រំលំដើមសំរង នៅតំបន់អូរចាដង់យ៉ល ខេត្តរតនគិរី

ប្រជាពលរដ្ឋជាច្រើននាក់ ដែលនាំគ្នាទៅរកអាស្រ័យផលផ្លែសំរងបានឲ្យដឹងថា នាពេលថ្មីៗនេះ មានជនជាតិវៀតណាមជាច្រើននាក់ បានសម្រុកចូលក្នុងទឹកដីខ្មែរដោយខុសច្បាប់តាមច្រករបៀងមួយចំនួន តាមបន្ទាត់ព្រំដែនក្នុងភូមិសាស្ត្រទឹក​ដីស្រុកតាវែង និងស្រុកអណ្តូងមាស ដើម្បីចូលមករំលំដើមសំរងព្រៃ ធ្វើសកម្មភាពទាំងយប់ ទាំងថ្ងៃ ដើម្បីយកផ្លែដឹកចូលទៅប្រទេសវៀតណាម។

ប្រជាពលរដ្ឋស្នើសុំឲ្យអាជ្ញាធរខេត្តរតនគិរី ជួយទប់ស្កាត់ជនជាតិវៀតណាម ដែលចូលកាប់រំលំដើមសំរង រើសយកផ្លែ នៅក្នុងតំបន់អូរចាដង់យ៉ល ក្នុងភូមិសាស្ត្រតំបន់កន្ទុយនាគ។

ប្រជាពលរដ្ឋបានប្រាប់អ្នកសារព័ត៌មានថា ការចូលកាប់ដើមសំរង រើសយកផ្លែនេះដែរ អាចមកពីភាពធូររលុងរបស់អាជ្ញាធរសមត្ថកិច្ច។

ប្រជាពលរដ្ឋប្រាប់ថា កន្លែងខ្លះជនជាតិខ្មែរ ជាអ្នកកាប់រំលំ និងកន្លែងខ្លះទៀតជនជាតិវៀតណាមជាអ្នកកាប់រំលំ ដោយប្រើរណាយន្តទំនើប មិនឭសំលេងមកក្រៅ។ មិនតែប៉ុណ្ណោះជនជាតិវៀតណាម ជាអ្នកប្រមូលទិញក្នុងព្រៃរួចដឹកឆ្លងដែនកាត់ តាមប៉ុស្តិ៍កន្ទុយនាគ ដែលទីផ្សារនៅប្រទេសវៀតណាមកំពុងត្រូវប៉ាន់យ៉ាងខ្លាំង។

ទាក់ទងបញ្ហាជនជាតិវៀតណាមសម្រុកចូលមកកាប់រំលំដើមសំរង បំផ្លាញធនធានធម្មជាតិនៅចំណុចអូរចាដង់យ៉ល រហូតដល់តំបន់កន្ទុយនាគ សារព័ត៌មានយើងកាលពីថ្ងៃទី១១ ខែមេសា ឆ្នាំ២០២៤ បានទាក់ទងទៅលោក ស៊ូ សិរី អភិបាលរងខេត្ត និងជាអ្នកនាំពាក្យសាលាខេត្តរតនគិរី បានបញ្ជាក់ថា រដូវប្រមូលផលផ្លែសំរ៉ង ប្រជាពលរដ្ឋខ្មែរ ទៅបេះនិងអង្រួនរើសយកផ្លែ។

ប៉ុន្តែជនជាតិវៀតណាមចូលមកពួកគាត់ជាឈ្មួញកណ្តាលទិញទៅលក់បន្ត លោកមិនបានបញ្ជាក់ប្រាប់ថា តើជន​ជាតិវៀតណាម ដែលចូលមកដីខ្មែរខុសច្បាប់នោះ ត្រូវច្បាប់ ឬខុសច្បាប់យ៉ាងណានោះទេ។

គួរបញ្ជាក់ផងដែរថា កន្លងទៅថ្មីៗនេះ មានជនជាតិវៀតណាមចំនួន២៦នាក់ និងគ្រឿងចក្រជាច្រើនគ្រឿង ធ្វើសកម្មភាព​ជីករ៉ែមាសនៅភូមិសាស្ត្រស្រុកតាវែង «កន្ទុយនាគ» ត្រូវបានកម្លាំងសមត្ថកិច្ចចម្រុះធ្វើការបង្ក្រាប លុះរដូវប្រមូលផលផ្លែ​សំរង មានជនជាតិវៀតណាមចូលមកតំបន់នេះ ដោយគ្មានការត្រួតពិនិត្យពីសមត្ថកិច្ចប្រចាំការទីនោះឡើយ៕

អត្ថបទ៖ វុទ្ធ ឦសាន