ថៃ កំពុងប្រារព្ធពិធីបុណ្យសង្ក្រាន្តចូលឆ្នាំថ្មីក្រោមមេឃក្ដៅចង់ខ្លោច

ប្រជាពលរដ្ឋថៃកំពុងសប្បាយអបអរជាមួយនឹងការប្រារព្ធពិធីបុណ្យសង្ក្រាន្តចូលឆ្នាំថ្មីនៅក្រោមអាកាសធាតុដ៏ក្ដៅចង់ខ្លោចរហូតដល់ ៤១ អង្សាសេ ខណៈរលកកម្ដៅនេះទៀតសោតនឹងអូសបន្លាយពេលហូតដល់ថ្ងៃចន្ទសប្ដាហ៍ក្រោយឯណោះ ។ នេះបើយោងតាមការចុះផ្សាយដោយកាសែត Bangkok Post នៅថ្ងៃទី១៣ ខែមេសានេះ ។

លោក Surajit Jit-areerat មកពីនាយកដ្ឋានឧតុនិយមបាននិយាយនៅថ្ងៃសៅរ៍នេះថា លក្ខខណ្ឌអាកាសធាតុក្តៅនឹងបន្តរហូតដល់សប្តាហ៍ក្រោយ ជាពិសេសថ្ងៃចុងក្រោយនៃពិធីបុណ្យសង្ក្រាន្តចូលឆ្នាំថ្មីអាចក្ដៅបែកផ្សែង បន្ទាប់ពីផ្នែកជាច្រើនរបស់ប្រទេសបានជួបព្យុះរដូវក្តៅកាលពីពេលថ្មីៗនេះ ។

ស្របពេលជាមួយគ្នានេះ នាយកដ្ឋានកំពុងរំពឹងថា សីតុណ្ហភាពនៅក្នុងទីតាំងមួយចំនួន រួមទាំងរាជធានីបាងកកផងដែរនោះ អាចកើនឡើងដល់ ៤១ អង្សាសេ ឬក៏លើសនេះក្នុងអំឡុងបុណ្យចូលឆ្នាំថ្មីនេះ ហើយនាយកដ្ឋានថែមទាំងបានព្រមានប្រជាជនកុំឲ្យនៅខាងក្រៅយូរពេក ។

មែនទែនទៅ ថ្ងៃ​សង្ក្រាន្តចូល​ឆ្នាំថ្មីគឺចំ​ថ្ងៃ​សៅរ៍ ទី១៣ ខែមេសានេះ ប៉ុន្តែ​ខេត្ត​មួយ​ចំនួន​រួម​ទាំង​ទីក្រុង Hat Yai បាន​ចាប់​ផ្តើម​លេងបាញ់​ទឹក​រួចទៅ​ហើយតាំងតែពី​យប់​ថ្ងៃ​ព្រហស្បតិ៍មកម្ល៉េះ ខណៈក្រសួងទេសចរណ៍ និងកីឡាបានចាប់ផ្តើមពិធីលេងបាញ់ទឹកទ្រង់ទ្រាយធំនៅទីក្រុងបាងកកកាលពីពាកកណ្ដាលសប្ដាហ៍កន្លងទៅ ហើយនឹងបន្តរហូតដល់ថ្ងៃចន្ទ ទី១៥ ខែមេសា ។

គួរបញ្ជាក់ថា ថៃនឹងរៀបចំពិធីបុណ្យសង្ក្រាន្តចូលឆ្នាំថ្មីជាប្រពៃណីរយៈពេល ៣ ថ្ងៃ ពោលពីថ្ងៃទី១៣ ដល់ថ្ងៃទី១៥ ខែមេសា ប៉ុន្តែប្រទេសនេះនឹងប្រព្រឹត្តជាលក្ខណៈសង្រ្កាន្តពិភពលោកនៅទូទាំងប្រទេសរយៈពេល ២១ ថ្ងៃឯណោះ រាប់ចាប់ពីថ្ងៃទី១ ដល់ថ្ងៃទី២១ ខែមេសា ក្នុងគោលបំណងស្ដារមុខមាត់វិស័យទេសចរណ៍ ខណៈត្រឹម ៣ ខែដំបូងនៃឆ្នាំ ២០២៤ នេះ ថៃទាក់ចិត្តភ្ញៀវទេសចរបរទេសចំនួន ៩.៤ លាននាក់កើបចំណូលបាន ៤៥៤.៦ ពាន់លានបាត ប្រមាណ ១២.៤ ពាន់លានដុល្លារអាមេរិក ៕

ដោយ ៖ សុខ ជីវ័ន្ត

ចុចអាន ៖ ស្វាមីរបស់អតីតសេដ្ឋិនី វៀតណាម ដែលរងទោសប្រហារជីវិត ក៏មិនរួចខ្លួនដែរ