រកឃើញ មេរោគអុតស្វាបំប្លែងខ្លួន នៅអាហ្វ្រិក បង្កការភ័យខ្លាចផ្ទុះរាតត្បាតជាសកល

មេរោគ​អុតស្វាបំប្លែងខ្លួន ត្រូវ​បាន​រក​ឃើញ​នៅ​​ទីក្រុង​មួយ ក្នុង​សាធារណរដ្ឋ​ប្រជាធិបតេយ្យ​កុងហ្គោ នៃទ្វីបអាហ្វ្រិក ជាហេតុបង្កការភ័យខ្លាចផ្ទុះការឆ្លងរាតត្បាតថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ Daily Mail កាលពីថ្ងៃអង្គារទី១៦ខែធ្នូ, មេរោគនេះ គឺក្លាយពីមេរោគដើមដ៏សាហាវដែលគេឲ្យឈ្មោះថា clade 1 mpox ប៉ុន្តែបានវិវឌ្ឍខ្លួន ឆ្លងកាន់តែខ្លាំង ជាពិសេសអាចគេចផុតពីប្រព័ន្ធភាពស៊ាំបានយ៉ាងងាយស្រួលទៀតផង។

មេរោគបំប្លែងថ្មីនេះ ត្រូវបានរកឃើញក្នុងតំបន់រុករករ៉ែដ៏ក្រីក្រ Kamituga ហើយដោយសារតែទីនោះ មានមនុស្សរស់នៅច្រើននិងកង្វះអនាម័យ ទើបធ្វើឲ្យគេបារម្ភថា វាអាចនឹងផ្ទុះការឆ្លងរាតត្បាត ខណៈបច្ចុប្បន្ន មានការឆ្លង១០៨ករណីហើយ។

ស្របពេលជាមួយគ្នានោះដែរ ក្រុមអ្នកស្រាវជ្រាវ បានអំពាវនាវឲ្យចាត់វិធានការជាបន្ទាន់ ដើម្បីទប់ស្កាត់ការឆ្លងរាលដាលមេរោគ និងចៀសវាងការផ្ទុះឡើងជាសកល។

ពួកគេបញ្ជាក់ថា “ដោយសារតែសាធារណរដ្ឋ​ប្រជាធិបតេយ្យ​កុងហ្គោ មានប្រវត្តិផ្ទុះជំងឺអុតស្វា ដូចនេះ យើងសូមជំរុញឲ្យមានសកម្មភាពយ៉ាងឆាប់រហ័ស នៅតាមបណ្តាប្រទេសទាំងឡាយ និងសហគមន៍អន្តរជាតិ ដើម្បីទប់ស្កាត់ការរីករាលដាលមេរោគជាសកល”។

កម្មករជីករ៉ែនិងអ្នករកស៊ីផ្លូវភេទ តែងតែធ្វើដំណើរចេញចូលប្រទេសជិតខាង ហើយក្រុមអ្នកជំនាញបារម្ភថា បើមានការរីករាលដាលមេរោគទ្រង់ទ្រាយធំមែន ហេដ្ឋារចនាសម្ព័ន្ធថែទាំសុខភាពក្នុងតំបន់ដ៏អន់ខ្សោយនេះ ច្បាស់ជាមិនអាចទប់ទល់បានឡើយ។

សូមបញ្ជាក់ថា ជំងឺអុតស្វា គឺបង្កការរាតត្បាតជាអន្តរជាតិក្នុងឆ្នាំ២០២២ ដោយពេលនោះ វាបានរីករាលដាលដល់ជាង១០០ប្រទេស និងសម្លាប់មនុស្សរាប់រយនាក់។

យោង​តាម​អង្គការ​សុខភាព​ពិភពលោក,​ រោគសញ្ញា​នៃ​ជំងឺ​អុតស្វា​រួម​មាន​ គ្រុន​ក្ដៅ ហើម​កូន​កណ្ដុរ និង​កន្ទួល​មាន​ពង​បែក​នៅ​លើ​ស្បែក​។ ជា​ទូទៅ កន្ទួល​ទាំង​នេះ​ចេញ​នៅ​លើ​ផ្ទៃ​មុខ បាត​ដៃ និង​បាត​ជើង ប៉ុន្តែ​ក៏​អាច​រាលដាល​ដល់​ប្រដាប់​ភេទ ភ្នែក​ និង​មាត់​ផង​ដែរ​។

ជំងឺអុតស្វា ឆ្លងតាមរយៈការប៉ះពាល់ស្និទ្ធនឹងអ្នកជំងឺ និងការមានទំនាក់ទំនងផ្លូវភេទជាមួយអ្នកមានវិជ្ជមានជំងឺនេះជាដើម៕

អត្ថបទ៖ សុខ សុវណ្ណ

ចុចអាន៖ កម្ពុជា រកឃើញជំងឺអឹមផក ឬ ជំងឺអុតស្វា ករណីទី១២ នៅភ្នំពេញ