ព័ត៌មានអន្ដរជាតិ

ក្រុមគាំទ្រដោយអ៊ីរ៉ង់ បាញ់រ៉ុកកែតពីអ៊ីរ៉ាក់ វាយប្រហារមូលដ្ឋានទ័ពអាមេរិក នៅស៊ីរី

បានផុស

៩ ខែ មុន

នៅ

ថ្ងៃចន្ទ ២២ មេសា ២០២៤

ដោយ

តាមសេចក្តីរាយការណ៍របស់ Reuters កាលពីថ្ងៃអាទិត្យទី២១ខែមេសា មូលដ្ឋានកងទ័ពរបស់អាមេរិកនៅ ស៊ីរី ត្រូវបានកំណត់គោលដៅដោយគ្រាប់រ៉ុកកែត បាញ់ចេញពីប្រទេសអ៊ីរ៉ាក់ ប៉ុន្តែមិនទាន់មានសេចក្តីរាយការណ៍ជាក់លាក់ថាតើ បណ្តាលឲ្យមនុស្សស្លាប់និងរបួសឬក៏អត់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេដឹងថា កងជីវពលដែលគាំទ្រដោយអ៊ីរ៉ង់ បានបាញ់រ៉ុកកែតនិងបញ្ជូនយន្តហោះគ្មានមនុស្សបើក ទៅប្រឆាំងកងកម្លាំងអាមេរិកនៅមជ្ឈិមបូព៌ា ជាង១៥០លើក ចន្លោះខែតុលាឆ្នាំមុន ដល់ដើមឆ្នាំ២០២៤ ប៉ុន្តែក្រុមសកម្មប្រយុទ្ធនេះ បានផ្អាកវាយប្រហារលើទីតាំងយោធារបស់សហរដ្ឋអាមេរិកនៅក្នុងតំបន់វិញ តាំងពីខែកុម្ភៈមកម្ល៉េះ ក្រោយពេលទីក្រុងវ៉ាស៊ីនតោន បើកការសងសឹកតាមអាកាស ប្រឆាំងគោលដៅជាច្រើននៅក្នុងប្រទេសអ៊ីរ៉ាក់និងស៊ីរី។

ទីភ្នាក់ងារព័ត៌មាន Reuters រាយការណ៍ថា ការវាយប្រហារសងសឹកកាលពីថ្ងៃអាទិត្យ គឺផ្តើមចេញពីទីក្រុង Zummar ភាគពាយព្យប្រទេសអ៊ីរ៉ាក់ ដោយប្រើប្រាស់នូវរ៉ុកកែតដែលបំពាក់លើរថយន្ត។

ហេតុការណ៍នេះកើតឡើងចំពេលជម្លោះមជ្ឈិមបូព៌ា កំពុងឆេះរាលដាលខ្លាំងរវាងគូសត្រូវក្នុងតំបន់ ហើយវាកើតឡើងមួយថ្ងៃ បន្ទាប់ពីការបំផ្ទុះដ៏សាហាវនៅប៉ុស្តិ៍បញ្ជាការយោធាអ៊ីរ៉ាក់ភាគខាងជើងទីក្រុងបាកដាដ។

ការផ្ទុះនោះ ត្រូវគេរាយការណ៍ថា បានសម្លាប់សមាជិកម្នាក់នៃកងអង្គភាពចល័តអ៊ីរ៉ាក់ (PMU) ខណៈមនុស្សចំនួន៨នាក់ផ្សេងទៀតរងរបួស។

ទោះបីជាយ៉ាងណាក៏ដោយ មន្ត្រីយោធាអាមេរិកនិងអ៊ីស្រាអែល សុទ្ធតែចេញមុខបដិសេធ ជាប់ពាក់ព័ន្ធនឹងរឿងនេះ ខណៈកងទ័ពអ៊ីរ៉ាក់និយាយថា មិនមានយន្តហោះគ្មានមនុស្សបើក ឬយន្តហោះចម្បាំងនៅក្នុងដែនអាកាសជុំវិញប៉ុស្តិ៍បញ្ជាការនោះទេ នៅពេលផ្ទុះ។

អំពើហិង្សានេះទៀតសោត បានពុះកញ្ជ្រោលខ្លាំងបន្ទាប់ពីអ៊ីរ៉ង់និងអ៊ីស្រាអែល បាញ់តទល់ដាក់គ្នាពេញមួយសប្តាហ៍ ដោយការបាញ់ទម្លាក់យន្តហោះគ្មានមនុស្សបើកនិងមីស៊ីលកាលពីថ្ងៃទី១៣ ខែមេសា របស់អ៊ីរ៉ង់ គឺជាការសងសឹកចំពោះការទម្លាក់គ្រាប់បែកកាលពីថ្ងៃទី១ ខែមេសា លើស្ថានកុងស៊ុលរបស់ខ្លួនក្នុងប្រទេសស៊ីរី ដែលបានសម្លាប់មនុស្សចំនួន១៦នាក់ ក្នុងនោះមានទាំងឧត្តមសេនីយ៍អ៊ីរ៉ង់ ២ រូបនិងមន្ត្រី ៥ រូបផ្សេងទៀតផងដែរ៕

អត្ថបទ៖ សុខ សុវណ្ណ

ចុចអាន៖ ទីក្រុងអ៊ីរ៉ង់ ដែលអ៊ីស្រាអែល បាញ់សងសឹក គឺមានរោងចក្រនុយក្លេអ៊ែរ