នគរបាលជំនាញខេត្តព្រះវិហារ ឃាត់ខ្លួនបុរសម្នាក់ដែលលបបាញ់សម្លាប់សត្វក្របីពលរដ្ឋងាប់អស់ ២ក្បាល

បុរសម្នាក់លបបាញ់សម្លាប់សត្វក្របីរបស់ពលរដ្ឋបណ្ដាលឱ្យងាប់ចំនួន ២ក្បាល ដោយសារខឹងនឹងសត្វក្របីចូលស៊ីដំណាំ ត្រូវបានកម្លាំងនគរបាលជំនាញស្រុករវៀង ឃាត់ខ្លួនទៅតាមបណ្តឹងជនគ្រោះ។

សមត្ថកិច្ចបានឱ្យដឹងថា កម្លាំងប៉ុស្ដិ៍នគរបាលរដ្ឋបាលរតន: ស្រុករវៀង ខេត្តព្រះវិហារ បានទទួលពាក្យបណ្ដឹងពីប្រជាពលរដ្ឋម្នាក់ មុខរបរជាកសិករ រស់នៅភូមិកេរ ឃុំរតន: ស្រុករវៀង កាលពីថ្ងៃទី១៨ ខែមេសា ឆ្នាំ២០២៤ បានប្ដឹងពីករណីសត្វក្របីចំនួន ២ក្បាល ងាប់នៅក្បែរចម្ការ ស្ថិតក្នុងភូមិកេរ ឃុំរតន: ស្រុករវៀង ខេត្តព្រះវិហារ កាលពីថ្ងៃទី១៥ ខែមេសា ឆ្នាំ២០២៤ ពីសំណាក់ជនមិនស្គាល់អត្តសញ្ញាណ ។

ក្រោយពីទទួលបានពាក្យបណ្ដឹងនោះ កម្លាំងសមត្ថកិច្ចនគរបាលជំនាញព្រហ្មទណ្ឌស្រុករវៀង បានបើការស៊ើបអង្កេត និងស្រាវជ្រាវ រហូតឈានដល់ការឃាត់ខ្លួនជនសង្ស័យជាមុខសញ្ញាបាញ់សម្លាប់សត្វក្របី២ ក្បាលនោះ។ សមត្ថកិច្ចបន្តថា ជនសង្ស័យនោះមានឈ្មោះ ហេង ចេតនា ហៅ ចែវ ភេទ ប្រុស អាយុ ៥៤ឆ្នាំ មុខរបរកសិករ រស់នៅភូមិកេរ ឃុំរតន: ស្រុករវៀង ខេត្តព្រះវិហារ។ នៅពេលឃាត់ខ្លួនជនសង្ស័យ សមត្ថកិច្ចក៏បានធ្វើការដកហូតអាវុធអាការ៤៧ ចំនួន ១ដើម បង់២ និងក្បាលគ្រាប់ចំនួន២ ដែលពាក់ព័ន្ធករណីបាញ់សម្លាប់សត្វក្របី។

នៅពេលឃាត់ខ្លួនជនសង្ស័យបានឆ្លើយសារភាពថា ខ្លួនពិតជាបានប្រើប្រាស់អាវុធអាការបាញ់សម្លាប់សត្វក្របីរបស់ប្រជាពលរដ្ឋប្រាកដមែន មូលហេតុខឹងសត្វក្របីនោះចូលស៊ីដំណាំក្នុងចំការរបស់គាត់ជារៀងរាល់ថ្ងៃ។

យោងតាមពាក្យបណ្ដឹង និងចម្លើយសារភាពរបស់ជនសង្ស័យពាក់ព័ន្ធបទល្មើសជាក់ស្តែង បច្ចុប្បន្នកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តព្រះវិហារ បានកសាងសំណុំរឿងបញ្ជូនទៅសាលាដំបូងខេត្តដើម្បីចាត់តាមច្បាប់៕

ដោយ៖ ជុន កុសល