អ្នកភូមិវើនសៀននៅខេត្តស្ទឹងត្រែង កាត់បន្ថយប្រើប្រាស់ទូកកាណូត ក្រោយតភ្ជាប់ស្ពាន ផ្លូវ

ភូមិវើនសៀនជាភូមិមួយដាច់ស្រយាលឆ្ងាយពីទីក្រុងពិបាកធ្វើដំណើរ ដែលមានចម្ងាយពីទីរួមស្រុកបុរីអូរស្វាយសែនជ័យប្រមាណជាង ២០ គីឡូម៉ែត្រពុំមានផ្លូវស្ពានសម្រាប់ធ្វើដំណើរស្រួលទេ ប្រើប្រាស់តែទូកកាណូតជាមធ្យោបាយធ្វើដំណើរ ឥឡូវបច្ចុប្បន្ននេះ មានផ្លូវមានស្ពានសម្រាប់ធ្វើចរាចរណ៍ទៅមកបានស្រួល។ 

ដោយឡែកកូនក្រមុំពួកគាត់ក៏លែងអេទៀតហើយ ព្រោះមានកំលោះៗ បានមកលេងច្រើននៅថ្ងៃចូលឆ្នាំប្រពៃណីជាតិខ្មែរយ៉ាងច្រើននៅឆ្នាំនេះ។

លោកស្រី ហ៊ី ចាន់ដន មេភូមិវើនសៀនបានលើកឡើងថា ប្រជាពលរដ្ឋរស់នៅតំបន់នេះតាំងពីឆ្នាំ១៩៦០មក មិនដែលមានផ្លូវសម្រាប់ជិះកង់ឬម៉ូតូទេ ប្រើប្រាស់តែទូកកាណូតជាមធ្យោបាយ សម្រាប់ធ្វើដំណើរប្រាស្រ័យទាក់ទងគ្នា និងដឹកជញ្ជូនទំនិញទៅមកប៉ុណ្ណោះ។

លោកស្រីបន្តថា៖ សមិទ្ធផលផ្លូវស្ពានថ្មីនេះជាក្តីសង្ឃឹមរបស់ប្រជាពលរដ្ឋនៅទីជនបទ ដោយសារតែកន្លងមកកសិករយើងផលិតផលកសិកម្មបាន គ្នានទីផ្សារបញ្ជាទិញទេ កូនក្រមុំក៏អេគ្មានអ្នកមកដណ្តឹងដែរ។ ហើយបច្ចុប្បន្នមានផ្លូវមានស្ពានឈ្មួញបរឡានមកទិញដល់ផ្ទះ បានបង្ហាញគុណតម្លៃដែលបានមកពីការអភិវឌ្ឍន៍ ក្រោមការដឹកនាំរបស់រាជរដ្ឋា​ភិបាលយើង។

លោក ផាន់ រ៉ា តំណាងឱ្យប្រជាពលរដ្ឋនៅភូមិនេះដែរ បានសាទរយ៉ាងក្រៃលែង ពេលនៅក្នុងភូមិមានផ្លូវស្ពានល្អបែបនេះ ព្រោះប្រជាពលរដ្ឋស្រូលធ្វើដំណើរបានឆាប់រហ័ស ដូចជាពេលមានជំងឺឈឺថ្កាត់ ទៅមណ្ឌលសុខភាព កូនចៅទៅសាលារៀនក៍ទាន់ពេលវេលា។

លោក លីមីណា អភិបាលស្រុកបុរីអូស្វាយសែនជ័យបានបញ្ជាក់ថា ការសាងសង់ស្ពាន ដោះស្រាយភាពលំបាកនេះ  ដោយប្រើប្រាស់ថវិកាអភិវឌ្ឍន៍ស្រុកសាងសង់ស្ពានឈើក្បាលស្ពានបេតុង តភ្ជាប់ផ្លូវគ្រួសក្រហម ដែលមន្ទីរអភិវឌ្ឍន៍ជនបទបានស្ថាបនា ហើយកាលពីឆ្នាំ២០២១ ដើម្បីឲ្យប្រជាពលរដ្ឋប្រមាណ ៧០០ គ្រួសារបានប្រើប្រាស់ជាប្រយោជន៍សាធារណៈ។

លោកបន្តថា៖ បន្ទាប់ពីបានផ្លូវ ស្ពាននេះតភ្ជាប់គ្នាហើយ រដ្ឋបាលស្រុកមានចក្ខុវិស័យ មួយបន្ថែមទៀត គឺស្ថាបនាផ្លូវតាមជួរមាត់ទន្លេមេគង្គ តភ្ជាប់ទៅកាន់ទឹកដីក្រុងស្ទឹងត្រែង ដើម្បីបានបម្រើមធ្យោបាយដឹកជញ្ជូនកសិផលរបស់ប្រជាកសិករ និងបានជំរុញដល់វិស័យទេសចរណ៍ឱ្យមានការរីកចម្រើមកដល់តំបន់នេះផងដែ។

សូមបញ្ចាក់ថា៖ ស្ពានឈើ នេះមានប្រវែង ៥៥ ម៉ែត្រ ទទឹង៣,៥០ម៉ែត្រ ស្ថាបនាសម្រេចបានលទ្ធផល ៩៥% ហើយសម្រាប់តភ្ជាប់ពីទីប្រជុំជនឃុំអូរស្វាយ ទៅកាន់ភូមិវើនសៀន ក្នុងចម្ងាយផ្លូវជាង២០ គីឡូម៉ែត្រ ដែលបានកាត់បន្ថយទាំងស្រុងពីការប្រើប្រាស់ទូកជាមធ្យោបាយ៕

អត្ថបទ៖ ងិនលីម