ព័ត៌មានអន្ដរជាតិ

ម៉ាឡេស៊ី ប្រកាសអាសន្នអាកាសធាតុក្ដៅឡើងដល់កម្រិតកំពូលនៅតំបន់ចំនួន ១០

បានផុស

១០ ខែ មុន

នៅ

ថ្ងៃចន្ទ ២២ មេសា ២០២៤

ដោយ

Chheang

តំបន់ចំនួន ១០ នៅម៉ាឡេស៊ីត្រូវបាននាយកដ្ឋានឧតុនិយមក្នុងប្រទេសប្រកាសពីភាពអាសន្ននៃអាកាសធាតុក្ដៅកម្រិតលេខ ១ ដោយក្នុងនោះមានតំបន់ចំនួន ៨ នឹងទទួលរងនូវរលកកម្ដៅខ្លាំងជាងគេ ។ នេះបើយោងតាមការបង្ហោះផ្សាយនៅលើប្រព័ន្ធបណ្ដាញសង្គមរបស់នាយកដ្ឋានឧតុនិយមម៉ាឡេស៊ីកាលពីថ្ងៃទី២១ ខែមេសាកន្លងទៅ ។

កម្រិតប្រកាសអាសន្ននេះធ្វើឡើង បន្ទាប់ពីអាកាសធាតុនៅតំបន់ទាំងនោះបានកើនឡើងកម្ដៅចន្លោះពី ៣៥ អង្សាសេ ទៅ ៣៧ អង្សាសេ រយៈពេល ៣ ថ្ងៃជាប់ៗគ្នា ។

រលកកម្ដៅនៅម៉ាឡេស៊ីនាពេលកន្លងទៅ បានឆក់យកជីវិតមនុស្សចំនួន ២ នាក់ ដោយសារជំងឺដាច់សរសៃឈាមខួរក្បាល ។ ជនរងគ្រោះដំបូង មានអាយុ២២ឆ្នាំ ស្លាប់នៅរដ្ឋ Pahang កាលពីថ្ងៃទី២ ខែកុម្ភៈ ហើយម្នាក់ទៀតជាកូនក្មេងអាយុ៣ឆ្នាំ ស្លាប់នៅរដ្ឋ Kelantan នៅថ្ងៃទី១ ខែមេសា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើមចមនៃបញ្ហារលកកម្ដៅនេះ បានកើតឡើងពីបាតុភូតធម្មជាតិអ៊ែលនីណូ (El Nino) ដែលជាអ្នកនាំយកអាកាសធាតុក្ដៅហើយស្ងួត មកកាន់ប្រទេសម៉ាឡេស៊ី និងបណ្ដាប្រទេសអាស៊ាន បន្ទាប់ពីមានបម្រែបម្រួលអាកាសធាតុនៅផ្ទៃសមុទ្រ និងខ្យល់លើមហាសមុទ្រប៉ាស៊ីហ្វិក ។ ត្បិតតែបាតុភូតធម្មជាតិនេះ បានអន់ថយបន្តិចក៏ពិតមែន តែវានៅតែបង្កជាការកើនឡើងសីតុណ្ភភាពឲ្យក្ដៅលើសពីកម្រិតមធ្យមនៅជុំវិញសកលលោក ។

ទីភ្នាក់ងារគ្រប់គ្រងគ្រោះមហន្តរាយម៉ាឡេស៊ី បានឲ្យដឹងថា នាយកដ្ឋានសង្គ្រោះនិងអគ្គិភ័យមានគម្រោងផ្ដោតសំខាន់ទៅលើតំបន់ច្រើនជាង ៦៥០ កន្លែងនៅជុំវិញប្រទេស ដើម្បីបង្ការករណីភ្លើងឆេះព្រៃ ។ គម្រោងនេះធ្វើឡើងបន្ទាប់ពីមានករណីឆេះព្រៃប៉ុន្មានកន្លែងនៅក្នុងរដ្ឋ Selangor រដ្ឋ Johor និងរដ្ឋ Sarawak ៕

ដោយ ៖ ឈាង