អាជ្ញាធរជាតិអប្សរា បានធ្វើកំណាយនៅមុខប្រាសាទបាយ័ន ក៏ប្រទះឃើញអណ្តើកថ្មដ៏ធំ១កប់ក្នុងដី

កម្លាំងអង្គភាពនគរបាលការពារបេតិកភណ្ឌប្រចាំតំបន់អង្គរ ផ្នែកនីតិវិធី និងកម្លាំងប៉ុស្តិ៍ការពារទី១០ សហការជាមួយភ្នាក់ងារអាជ្ញាធរជាតិអប្សរ បានចុះទៅប្រាសាទបាយ័ន ស្ថិតនៅភូមិរហាល សង្កាត់នគរធំ ក្រុង/ខេត្តសៀមរាប ដើម្បីធ្វើការប្រគល់ទទួលរូបអណ្ដើក ចំនួន០១ ធ្វើពីថ្មភក់ មានទំហំបណ្តោយ៥៧សង់ទីម៉ែត្រ ទទឹង៤៣សង់ទីម៉ែត្រ និងកម្រាស់២១សង់ទីម៉ែត្រ ដែលក្រុមគម្រោងអាជ្ញាធរជាតិអប្សរា បានកំណាយរកឃើញត្រង់ចំណុច កណ្តាលស្រះទឹកខាងកើតឆៀងខាងជើង ក្នុងជម្រៅដី១,៥០ម៉ែត្រ ។

វត្ថុបុរាណខាងលើនេះ លោក ស្រ៊ុន តិច មន្ត្រីបច្ចេកទេសក្រុមគម្រោងអាជ្ញាធរជាតិអប្សរា បានប្រគល់ឲ្យលោក ឈូក សុម៉ាឡា មន្ត្រីចុះបញ្ជីសារពើភណ្ឌនៃអាជ្ញាធរជាតិអប្សរា យកទៅរក្សាទុកនៅ សារមន្ទីរជាតិព្រះនរោត្តមសីហនុ-អង្គរ។

ដោយឡែក លោក ឡុង កុសល អគ្គនាយករងអាជ្ញាធរជាតិអប្សរា បានមានប្រសាសន៍ឲ្យដឹងនៅព្រឹកថ្ងៃទី២៣ខែមេសាឆ្នាំ២០២៤នេះថា កិច្ចការងារនេះគឺអាជ្ញាធរជាតិអប្សរា បានស្ដារស្រះទឹកចំនួនពីរនៅមុខប្រាសាទបាយ័នទៅតាមទ្រង់ទ្រាយដើមកាលពីសតវត្សទី១២ឡើងវិញ។ អ្វីដែលបាត់បង់នាពេលកន្លងមក អាជ្ញាធរជាតិអប្សរានឹងប្រឹងប្រែងស្រាវជ្រាវស្វែងរកទម្រង់ដើមមកវិញនាសតវត្សរ៍ទី២១នេះ។ មិនត្រឹមតែប៉ុណ្ណឹងទៀតសោត យើងគួរតែស្វែងយល់ ពីតួនាទីរបស់ទឹកស្រះឬមួយក៏ត្រពាំងផ្សេងៗដែលបុព្វបុរសបន្សល់ទុក មានសារសំខាន់យ៉ាងណា សម្រាប់អភិវឌ្ឍន៍ទីក្រុងបុរាណនាជំនាន់នោះ៕

ដោយ៖ជុន កុសល