ព័ត៌មានជាតិ

ប.ស.ស កំពុងរៀបចំគម្រោងស្នើសុំជំនួយពីជប៉ុនសម្រាប់អភិវឌ្ឍន៍ប្រព័ន្ធបច្ចេកវិទ្យាគមនាគមន៍ និងព័ត៌មាន

បានផុស

១០ ខែ មុន

នៅ

ថ្ងៃពុធ ២៤ មេសា ២០២៤

ដោយ

បេឡាជាតិសន្តិសុខសង្គម(ប.ស.ស) បាននិងកំពុងរៀបចំគម្រោងស្នើសុំជំនួយពីរាជរដ្ឋាភិបាលជប៉ុនសម្រាប់អភិវឌ្ឍន៍ប្រព័ន្ធបច្ចេកវិទ្យាគមនាគមន៍ និងព័ត៌មាន(ICT) របស់ ប.ស.ស ឱ្យកាន់តែប្រសើរឡើងបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំពិភាក្សាស្តីពី “ការស្នើសុំជំនួយអភិវឌ្ឍន៍ផ្លូវការ ដើម្បីអភិវឌ្ឍន៍ប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) របស់ ប.ស.ស ជាមួយក្រុមហ៊ុន HITACHI” កាលពីរសៀលថ្ងៃទី ២៣ មេសា លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស តំណាង លោក ម៉េង ហុង អគ្គនាយក ប.ស.ស ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា កិច្ចប្រជុំនេះរៀបចំឡើងក្នុងគោលបំណងដើម្បីពិភាក្សា និងត្រួតពិនិត្យវឌ្ឍនភាព នៃដំណើរការស្នើសុំជំនួយអភិវឌ្ឍន៍ផ្លូវការ (ODA) របស់រាជរដ្ឋាភិបាល នៃប្រទេសជប៉ុន សម្រាប់អភិវឌ្ឍន៍ប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) របស់ ប.ស.ស។

តាមរយៈកិច្ចប្រជុំនេះ លោកបណ្ឌិតអគ្គនាយករង ប.ស.ស សង្ឃឹមយ៉ាងមុតមាំថា នឹងទទួលបាននូវចំណេះដឹងបច្ចេកទេស និងធាតុចូលសំខាន់ៗ សម្រាប់ជាគន្លឹះក្នុងការរៀបចំមធ្យោបាយ និងយុទ្ធសាស្ត្រ ដើម្បីសម្របសម្រួលដំណើរការស្នើសុំគម្រោងជំនួយអភិវឌ្ឍន៍ផ្លូវការ (ODA) សម្រាប់អនុវត្តគម្រោង HAPPINESS ស្ដីពី ប្រព័ន្ធ ICT របស់ ប.ស.ស ប្រកបដោយជោគជ័យ និងមានប្រសិទ្ធភាព។

គួរបញ្ជាក់ថា ក្រៅពីបង្ហាញអំពីវឌ្ឍនភាព នៃដំណើរការស្នើសុំជំនួយអភិវឌ្ឍន៍ផ្លូវការ (ODA) ពីរាជរដ្ឋាភិបាលជប៉ុន ដើម្បីអភិវឌ្ឍន៍គម្រោង HAPPINESS ស្តីពី ប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) របស់ ប.ស.ស លោកបណ្ឌិត ហេង សុផាន់ណារិទ្ធ ក៏បានលើកយកចំណុចសំខាន់ៗ ចំនួន ២ មកធ្វើជារបៀបវារៈមកពិភាក្សាក្នុងកិច្ចប្រជុំ ក្នុងនោះរួមមាន ការពិនិត្យ និងពិភាក្សាលើវិសាលភាពរបស់គម្រោង និងតម្រូវការចាំបាច់នានារបស់ប្រព័ន្ធ និងជំហានបន្ទាប់ និងការងារពាក់ព័ន្ធផ្សេងៗ៕

អត្ថបទ ៖ សំអឿន