WHO រកឃើញថា បច្ចុប្បន្ន ក្មេងស្រីផឹកស្រាច្រើនជាងក្មេងប្រុស

អង្គការសុខភាពពិភពលោក ​(WHO) បានរកឃើញថា បច្ចុប្បន្ន មានក្មេងស្រីផឹកស្រាច្រើនជាងក្មេងប្រុសទៅទៀត ពោលគឺទូទាំងពិភពលោក មានកុមារអាយុ១៥ឆ្នាំប្រមាណ៥៧% បានសេពគ្រឿងស្រវឹង ហើយក្នុងនោះមាន៥៩%ជាក្មេងស្រី និង៥៦%ជាក្មេងប្រុស។ នេះបើតាមការចុះផ្សាយរបស់ CNA នៅថ្ងៃព្រហស្បតិ៍ទី២៥ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើគិតនៅអាយុ១៥ឆ្នាំ, មានក្មេងស្រី៣៨%និយាយថា ពួកគេផឹកស្រាដល់ថ្នាក់ស្រវឹងយ៉ាងហោចណាស់ម្តងក្នុងរយៈពេល៣០ថ្ងៃ ខណៈក្មេងប្រុសមានតែ ៣៦%ប៉ុណ្ណោះ។

យោងតាមស្ថាប័ន WHO ប្រចាំអឺរ៉ុប, ការរកឃើញទាំងនេះ បានបង្ហាញយ៉ាងច្បាស់ ពីតម្រូវការជាបន្ទាន់ឲ្យមានវិធានការគោលនយោបាយល្អប្រសើរជាងមុន ដើម្បីការពារកុមារនិងយុវជនពីគ្រោះថ្នាក់ដែលបណ្តាលមកពីគ្រឿងស្រវឹង”។

មិនមែនត្រឹមគ្រឿងស្រវឹងទេ, WHO ក៏បង្ហាញក្តីកង្វល់ជាពន់ពេកផងដែរ ចំពោះក្មេងជំទង់ដែលកំពុងជក់បារីអេឡិចត្រូនិក ក្នុងអត្រាដ៏គួរឲ្យព្រួយបារម្ភ។ ប្រហែល៣២%នៃកុមារអាយុ១៥ឆ្នាំ បានប្រើប្រាស់បារីអេឡិចត្រូនិច ក្នុងនោះមាន២០% បានជក់ម្តង ក្នុងរយៈពេល៣០ថ្ងៃ។

សូមបញ្ជាក់ថា របាយការណ៍អំពីការសេពគ្រឿងស្រវឹងនិងជក់បារីអេឡិចត្រូនិក គឺផ្អែកលើទិន្នន័យស្ទង់មតិរួមគ្នាពីមនុស្សប្រមាណ ២៨០ ០០០នាក់អាយុ១១ដល់១៥ឆ្នាំ នៅអឺរ៉ុប អាស៊ីកណ្តាល និងកាណាដា។

នាយកប្រចាំតំបន់របស់ WHO លោក Hans Kluge បាននិយាយក្នុងសេចក្តីថ្លែងការណ៍មួយថា “ការប្រើប្រាស់សារធាតុគ្រោះថ្នាក់ដ៏ទូលំទូលាយបែបនេះ ក្នុងចំណោមកុមារនៅប្រទេសជាច្រើនទូទាំងតំបន់អឺរ៉ុប និងលើសពីនេះ គឺជាការគំរាមកំហែងសុខភាពសាធារណៈយ៉ាងធ្ងន់ធ្ងរ ជាទីបំផុត”។

ស្របពេលជាមួយគ្នានោះដែរ លោក Kluge បានអំពាវនាវឲ្យមានការយកពន្ធខ្ពស់ រឹតត្បិតលើការលក់គ្រឿងស្រវឹងនិងបារីអេឡិចត្រូនិកដល់កុមារ ក៏ដូចការផ្សាយពាណិជ្ជកម្មផងដែរ៕

អត្ថបទ៖ សុខ សុវណ្ណ

ចុចអាន៖ ស្រាបៀ ABC Reserve ពង្រីកគំរូកំប៉ុងជាមួយទម្រង់វែងថ្មី