របួសមនុស្សជាង១០នាក់ ក្នុងហេតុការណ៍គ្រោះថ្នាក់ចរាចរណ៍នៅចំណោតយាយម៉ៅ ពេជ្រនិល

សេចក្តីរាយការណ៍ព័ត៌មានបឋមបានឱ្យដឹងនារសៀលថ្ងៃទី២៥ ខែមេសា ឆ្នាំ២០២៤ នេះ មានរថយន្តសណ្តោងរ៉ឺម៉ក ១គ្រឿង ដឹកខ្សាច់ពេញបានរអិលថយក្រោយបង្កឱ្យមានគ្រោះថ្នាក់ចរាចរណ៍ប៉ះរថយន្តជាច្រើនគ្រឿង បណ្តាលឱ្យមានមនុស្សជាង១០នាក់រងរបួស ខណៈពេលបើកឡើងចំណោតជ្រោះលោកយាយម៉ៅពេជ្រនិលមិនរួច។

តាមប្រភពព័ត៌មាន បានឱ្យដឹងថា ហេតុការណ៍គ្រោះថ្នាក់រថយន្តធន់ធំរអិលថយក្រោយនេះ បានកើតឡើងនៅរសៀលថ្ងៃទី២៥ ខែមេសា ឆ្នាំ២០២៤ ត្រង់ចំណុចចំណោតលោកយាយម៉ៅពេជ្រនិល ផ្លូវជាតិលេខ៤ ចន្លោះគីឡូម៉ែត្រលេខ (១០២-១០៣) ស្ថិតក្នុងភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។

តាមរបាយការណ៍បឋម បានឱ្យដឹងថា ក្នុងហេតុការណ៍រថយន្តរអិលធ្លាក់ចំណោតលោកយាយម៉ៅពេជ្រនិលខាងលើបណ្តាលឱ្យមានមនុស្សបួសធ្ងន់ និងស្រាលសរុបចំនួន១២នាក់។ ក្រោយពេលកើតហេតុ សមត្ថកិច្ចនគរបាលស្រុកភ្នំស្រួច បានចុះទៅអន្តរាគមន៍ជួយសង្គ្រោះអ្នករបួសបញ្ជូនទៅកាន់មន្ទីរពេទ្យភ្លាមៗ និងបានសម្រួលចរាចរជូនអ្នកដំណើរឆ្លងកាត់ផ្លូវជាតិលេខ៤ផងដែរ។

នៅចំពោះមុខសមត្ថកិច្ចជំនាញកំពុងធ្វើការវាស់វែង និងរកមធ្យោបាយដើម្បីស្ទូចរថយន្តដែលជួបគ្រោះចេញពីផ្លូវ ដើម្បីយកទៅរក្សាទុក និងកសាងសំណុំរឿងតាមនិតិវិធីច្បាប់៕

អត្ថបទ៖ ភួង រដ្ឋា