សម្តេចធិបតី ហ៊ុន ម៉ាណែត កោតសរសើរដល់យុវជន ដែលខិតខំផលិតមាតិកា លើកស្ទួយវប្បធម៌ខ្មែរ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងកោតសរសើរដល់បងប្អូនប្រជាពលរដ្ឋខ្មែរ ជាពិសេសយុវជន ដែលបានចំណាយទាំងថវិកា ពេលវេលា និងកម្លាំងកាយចិត្ត ខិតខំផលិតមាតិកានានាដើម្បីលើកស្ទួយ និងរក្សាវប្បធម៌ខ្មែរគ្រប់ទម្រង់។

នាឱកាសអញ្ជើញជាអធិបតី “ ពិសាអាហារសាមគ្គី និងបំពាក់គ្រឿងឥស្សរិយយសជូនលោកគ្រូ អ្នកគ្រូ សិល្បករ សិល្បការិនី ” នៅរាជធានីភ្នំពេញ នៅថ្ងៃទី ២៥ ខែមេសានេះ សម្តេចធិបតី ហ៊ុន ម៉ាណែត បានលើកឡើងថា មានប្រជាពលរដ្ឋខ្មែរជាច្រើនដែលមានទឹកចិត្តខ្លួនឯងបង្កើតមាតិកានានា ផ្សព្វផ្សាយពីវប្បធម៌ខ្មែរ។ សម្តេចធិបតី ថ្លែងយ៉ាងដូច្នេះថា៖«យើងមានប្រជាពលរដ្ឋខ្មែរច្រើនណាស់ ជាពិសេសយុវជន ដែលមានឆន្ទៈទឹកចិត្តធ្វើខ្លួនឯង អ្នកខ្លះមានធនធានខ្លួនឯងធ្វើប៉ុន្មានបានប៉ុណ្ណឹង ដើម្បីផលិត និងជួយនូវវិស័យសិល្បៈវ ប្បធម៌របស់យើង  ហើយនេះគឺជាស្មារតីល្អណាស់ ហើយខ្ញុំសូមធ្វើការកោតសរសើរចំពោះទឹកចិត្តពលរដ្ឋខ្មែរ ជាពិសេសយុវជនដែលខំប្រឹងធ្វើទាំងនេះ»​។

បន្ថែមពីនេះ សម្តេចធិបី សម្តែងការរីករាយជាខ្លាំងនៅពេលឃើញបងប្អូនប្រជាពលរដ្ឋ បានចូលរួមលេងល្បែងប្រជាប្រិយខ្មែរយ៉ាងច្រើនកុះករ និងគ្រប់ទីកន្លែងនាឱកាសបុណ្យចូលឆ្នាំប្រពៃណីខ្មែរ ដែលទើបតែបញ្ចប់ទៅកាលពីពេលថ្មីៗនេះ។ សម្តេចធិបតី មានប្រសាសន៍ថា៖« ខ្ញុំសប្បាយចិត្តនិងមានការរំភើប ពេលឃើញការចូលរួមពលរដ្ឋខ្មែរលេងល្បែងប្រជាប្រិយខ្មែរគ្រប់កន្លែងទាំងអស់ មិនមែនតែអ្វីដែលរាជ ធានី-ខេត្តរៀបចំនោះទេ គឺនៅតាមបណ្តាលស្រុក ក្រុង គឺមានការរៀបចំជំរុញការលេងល្បែងប្រជាប្រិយឡើងវិញ»។

សម្តេចធិបតី បានគូសរំលេចទៀតថា សកម្មភាពទាំងនេះគឺជាឆន្ទៈផុសផុល ហើយគឺជាសញ្ញាវិជ្ជមាន និងជាកត្តាចាំបាច់នៅក្នុងការថែរក្សាវប្បធម៌ ការគាំទ្រ និងការអនុវត្តជាប្រចាំ ដោយបន្ថែមថា ការថែរក្សាវប្បធម៌មិនមែនជាកាតព្វរបស់នរណាម្នាក់នោះទេ គឺជាកាតព្វរបស់យើងទាំងអស់គ្នា៕