កម្ពុជា ផ្ដល់បទអន្តរាគមន៍គន្លឹះ ក្នុងកិច្ចប្រជុំរដ្ឋមន្រ្តី នៅក្នុងតំបន់និយាយភាសាបារាំង

កម្ពុជា បានផ្ដល់បទអន្តរាគមន៍គន្លឹះមួយចំនួន ដើម្បីសម្រេចបាននូវគោលដៅអភិវឌ្ឍន៍ប្រកបដោយនិរន្តរភាពទី៤ នៅក្នុងតំបន់និយាយភាសាបារាំង ក្នុងកិច្ចប្រជុំរដ្ឋមន្រ្តី CONFEMEN លើកទី៦០។ នេះ បើតាមការផ្ដល់ព័ត៌មាន ពីក្រសួងអប់រំ យុវជន និងកីឡា នៅព្រឹកថ្ងៃទី២៦ ខែមេសា ឆ្នាំ២០២៤ នេះ។

បណ្ឌិត អ៊ុម រម្យណី រដ្ឋលេខាធិការ នៃក្រសួងអប់រំ យុវជន និងកីឡា នារសៀលថ្ងៃទី២៥ ខែមេសា ឆ្នាំ២០២៤ ជាតំណាង បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានចូលរួមកិច្ចប្រជុំរដ្ឋមន្រ្តី CONFEMEN លើកទី៦០ នៅក្នុងតំបន់និយាយភាសាបារាំង” នៅ ទីក្រុងអាប៊ីស្សង់ ប្រទេសកូតឌីវ័រ។

នៅក្នុងកិច្ចប្រជុំនេះ បណ្ឌិត អ៊ុម រម្យណី រដ្ឋលេខាធិការ បានផ្ដល់បទអន្តរាគមន៍គន្លឹះមួយចំនួន ដើម្បីសម្រេចបាននូវគោលដៅអភិវឌ្ឍន៍ប្រកបដោយនិរន្តរភាពទី៤ គឺតម្រូវឱ្យមានយុទ្ធសាស្រ្តដ៏ជាក់លាក់ដែលអាចគ្របដណ្តប់លើការអប់រំចំណេះដឹងទូទៅ ការអប់រំបច្ចេកទេស និងការតម្រង់ទិសឆ្ពោះទៅរកមុខវិជ្ជាវិទ្យាសាស្ត្រ និងបច្ចេកវិទ្យារួមមាន៖ ការទទួលបានការអប់រំពេញលេញ, គុណភាព នៃការអប់រំ, ការអប់រំពេញមួយជីវិត, ការអប់រំ និងបណ្តុះបណ្តាលបច្ចេកទេស និងវិជ្ជាជីវៈ, ការអប់រំផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM), ភាពជាដៃគូ និងកិច្ចសហប្រតិបត្តិការ, ការតាមដាន និងវាយតម្លៃ។

គួរបញ្ជាក់ថា កិច្ចប្រជុំរដ្ឋមន្រ្តី CONFEMEN លើកទី៦០ នេះ មានប្រធានបទ “ការអប់រំចំណេះដឹងទូទៅ ការអប់រំបច្ចេកទេស និងការតម្រង់ទិសឆ្ពោះទៅរកមុខវិជ្ជាវិទ្យាសាស្ត្រ និងបច្ចេកវិទ្យា៖ បញ្ហា យុទ្ធសាស្ត្រ និងទស្សនវិស័យដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពទី៤ នៅក្នុងតំបន់និយាយភាសាបារាំង” (Enseignement général, enseignement technique et orientation vers les filières scientifiques et technologiques : enjeux, stratégies et perspectives pour l’atteinte de l’ODD4 dans l’espace francophone)៕