ខេត្តចំនួន៦ គ្មានគ្រោះថ្នាក់ចរាចរណ៍ពេលបុណ្យចូលឆ្នាំខ្មែរ ត្រូវបានសម្ដេចធិបតី ផ្ដល់រង្វាន់លើកទឹកចិត្ត

ខេត្តចំនួន៦ បានរកឃើញថា មិនមានគ្រោះថ្នាក់ចរាចរណ៍សោះក្នុអំឡុងពេលនៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំនេះ។ ជាការលើកទឹកចិត្តដល់ខេត្តទាំង៦នេះ សម្ដេចធិបតី ហ៊ុន ម៉ាណែត បានប្រកាសផ្ដល់រង្វាន់ ដោយក្នុង១ខេត្តៗ ទទួលបានថវិកាចំនួន២០០លានរៀល និងភេសជ្ជៈ១ពាន់កេស។

ខេត្តចំនួន៦ ដែលមិនមានគ្រោះថ្នាក់ចរាចរណ៍ ហើយទទួលបានការកោតសរសើរពីសម្តេចធិបតី ហ៊ុន ម៉ាណែតនោះ រួមមានខេត្តត្បូងឃ្មុំ ព្រៃវែង កោះកុង ប៉ៃលិន កំពង់ឆ្នាំង និងខេត្តមណ្ឌលគិរីផង។ ការប្រកាសផ្ដល់រង្វាន់របស់សម្តេចធិបតី បានធ្វើឡើងនៅក្នុងកិច្ចប្រជុំពេញអង្គគណៈរដ្ឋមន្រ្តី នៅថ្ងៃសុក្រ ទី២៦ ខែមេសា ឆ្នាំ២០២៤នេះ នៅវិមានសន្តិភាព។

គួរជម្រាបថា ការផ្តល់រង្វាន់នេះ ជាការឆ្លើយតបចំពោះការសន្យារបស់សម្តេចធិបតី ហ៊ុន ម៉ាណែត កន្លងទៅ ដោយសម្តេចធិបតី បានប្រកាសថា​ នឹងផ្តល់រង្វាន់សម្រាប់ខេត្តណា ដែលមិនមានគ្រោះថ្នាក់ចរាចរក្នុងឱកាសបុណ្យចូលឆ្នាំថ្មី៕