អគ្គនាយកដ្ឋានរដ្ឋបាល និងហិរញ្ញវត្ថុ សម្រួចផែនការសកម្មភាពឆ្នាំ២០២៤-២០២៥

អគ្គនាយកដ្ឋានរដ្ឋបាល និងហិរញ្ញវត្ថុ បានរៀបចំអង្គវិបស្សនាបូកសរុបលទ្ធផលការងារសម្រេចបានឆ្នាំ២០២៣ និងលើកទិសដៅការងារសម្រាប់អនុវត្តឆ្នាំ២០២៤ នៃអង្គភាពក្រោមឱវាទអគ្គនាយកដ្ឋានរដ្ឋបាល និងហិរញ្ញវត្ថុ ក្រោមអធិបតីភាព លោក ទេព ភិយ្យោរិទ្ធ អគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ ដែលប្រព្រឹត្តទៅចាប់ពីថ្ងៃទី២៦ ដល់ថ្ងៃទី២៧ ខែមេសា ឆ្នាំ២០២៤ នៅសណ្ឋាគារសុខា ខេត្តព្រះសីហនុ។ នេះបើតាមការផ្ដល់ព័ត៌មាន ពីក្រសួងអប់រំ យុវជន និងកីឡា នៅរសៀលនេះ។

អង្គវិបស្សនាត្រូវបានរៀបចំឡើងក្នុងគោលបំណងបីសំខាន់គឺ៖ ១. ពិនិត្យសមិទ្ធិផលសម្រេចបានក្នុងឆ្នាំ២០២៣ ២. សម្រួចផែនការសកម្មភាពឆ្នាំ២០២៤-២០២៥ របស់នាយកដ្ឋាននីមួយៗដើម្បីគាំទ្រការធ្វើកំណែទម្រង់វិស័យអប់រំ និង ៣. បង្កឱកាសសម្រាប់ការជួបជុំ និងបង្កើនភាពស្និទ្ធស្នាលរវាងអង្គភាពក្រោមឱវាទអគ្គនាយកដ្ឋានរដ្ឋបាល និងហិញ្ញវត្ថុ។

ក្នុងឱកាសនោះ លោក ទេព ភិយ្យោរិទ្ធ ស្នើអង្គភាពនីមួយពិនិត្យ និងសម្រួចទិសដៅការងារធ្វើយ៉ាងណា ឱ្យស្របតាមកំណែទម្រង់អាទិភាពក្រសួងអប់រំ យុវជន និងកីឡា។ លោកអគ្គនាយក បានអំពាវនាវអង្គភាពនីមួយៗប្រេីប្រាស់បច្ចេកវិទ្យាឌីជីថល ដេីម្បីជួយពន្លឿន និងបង្កេីនប្រសិទ្ធភាពការងារ។

លោកអគ្គនាយក ក៏បានគូសបញ្ជាក់ពីវិធានការគន្លឹះ នៃស្ដង់ដាសាលារៀនគំរូ ដែលដាក់ចេញដោយអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត និងក្រសួងអប់រំ យុវជន និងកីឡា ដើម្បីពង្រឹងគុណភាពគ្រឹះស្ថានសិក្សារដ្ឋដែលក្នុងនោះមានដូចជា៖ ទី១. ការពង្រឹងអភិបាលកិច្ចសាលារៀន ទី២. ការពិនិត្យ កែសម្រួល រៀបចំកម្មវិធីសិក្សា និងសកម្មភាពក្រៅម៉ោងសិក្សា ទី៣. ការយកចិត្តទុកដាក់លើសុខភាពរបស់សិស្ស ទី៤. ការជំរុញ និងលើកទឹកចិត្តការចូលរួមរបស់មាតា បិតា និងសហគមន៍ក្នុងការអប់រំ ទី៥. ការអប់រំឌីជីថល ទី៦. ការបង្កើតមជ្ឈមណ្ឌលឧត្ដមសិក្សានៅគ្រឹះស្ថានឧត្ដមសិក្សា ទី៧. ការកសាងប្រព័ន្ធ និងការអភិវឌ្ឍសមត្ថភាព ទី៨. ការអភិវឌ្ឍការអប់រំកាយ និងកីឡា។

គួរបញ្ជាក់ថា អង្គវិបស្សនាមានការអញ្ជើញចូលរួមដោយ អគ្គនាយក អគ្គនាយករង ប្រធានអង្គភាព បុគ្គលិកអប់រំសរុបចំនួន ៣០១ នាក់។ ក្នុងដំណើរការអង្គវិបស្សនា មានការធ្វើបទបង្ហាញ ស្ដីពី ការបូកសរុបកាងារសម្រេចបាន និងលើកទិសដៅសម្រាប់អនុវត្តបន្ត ដោយតំណាងអង្គភាពនីមួយៗ៕