រុស្ស៊ី បាញ់កម្ទេចរថភ្លើងដឹកសព្វាវុធណាតូ ទៅឲ្យអ៊ុយក្រែន

ដូចការព្រមានអ៊ីចឹង ពេលនេះកងកម្លាំងរុស្ស៊ី បានបើកការវាយប្រហារលើរថភ្លើងមួយគ្រឿងដែលកំពុងដឹកសម្ភារយោធារបស់អង្គការណាតូ ទៅឲ្យអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិរុស្ស៊ី បានប្រកាសក្នុងសេចក្តីថ្លែងការណ៍ដែលផ្សាយដោយ RT កាលពីថ្ងៃសុក្រទី២៦ខែមេសាថា ការវាយប្រហារនេះកើតឡើងនៅតំបន់ Udachnoye ក្នុង​សាធារណរដ្ឋ​ប្រជាមានិត Donetsk ដោយប្រើយន្តហោះ មីស៊ីល និងកាំភ្លើងធំដើម្បីបាញ់លើគោលដៅ។ 

​សេចក្តីប្រកាសដដែលនោះបន្តថា “យោធានិងគ្រឿងសឹកនៃកងអង្គភាពមេកានិកទី៦៧របស់អ៊ុយក្រែន ក៏ត្រូវវាយប្រហារផងដែរ ខណៈពេលកំពុងរៀបចំដាក់គ្រឿងសឹកលើរថភ្លើងនៅទីក្រុង Balakleya ក្នុងតំបន់ Kharkov របស់អ៊ុយក្រែន”។

លើសពីនេះ ក្នុងរយៈពេល២៤ម៉ោងចុងក្រោយ កងកម្លាំងរុស្ស៊ីក៏បានបំផ្លាញកាំភ្លើងធំ M777 ផលិតដោយអាមេរិកចំនួន៥គ្រឿង, កាំភ្លើងធុនស្រាល១០៥មិល្លីម៉ែត្រ M102 របស់អាមេរិកចំនួន២គ្រឿង, រ៉ាដា AN/TPQ-50 របស់អាមេរិកមួយគ្រឿង, កាំភ្លើងធំ FH-70 របស់អង់គ្លេសមួយគ្រឿង និងគ្រឿងសឹកផ្សេងទៀតជាច្រើនផងដែរ។

គេចាំមិនភ្លេចទេ រុស្ស៊ីបានព្រមានម្តងហើយម្តងទៀតថា ការដែលបរទេសផ្តល់សព្វាវុធ ទៅឲ្យទីក្រុងកៀវ នឹងមិនអាចរារាំងទីក្រុងមូស្គូ ពីការសម្រេចបាននូវគោលដៅយោធារបស់ខ្លួនបានឡើយ ផ្ទុយទៅវិញ វាមានតែអូសបន្លាយការប្រយុទ្ធ និងអាចបង្កើនហានិភ័យនៃការប្រឈមមុខដាក់គ្នាដោយផ្ទាល់រវាងរុស្ស៊ី និងណាតូប៉ុណ្ណោះ។

យោងតាមការបញ្ជាក់ពីមន្ត្រីនៅទីក្រុងមូស្គូ, ការផ្តល់សព្វាវុធ ការចែករំលែកព័ត៌មានសម្ងាត់ និងការបណ្តុះបណ្តាលកងទ័ពអ៊ុយក្រែន មានន័យថា ប្រទេសលោកខាងលិច បានក្លាយជាភាគីជាក់ស្តែងនៃជម្លោះនេះរួចបាត់ទៅហើយ។

ទោះបីជាយ៉ាងណាក៏ដោយ លំហូរនៃជំនួយលោកខាងលិចជួយដល់អ៊ុយក្រែន បានថយចុះគួរឲ្យកត់សម្គាល់ក្នុងរយៈពេលប៉ុន្មានខែថ្មីៗនេះ ខណៈសភាអាមេរិក នៅតែមើលមុខគ្នាមិនចំពាក់ព័ន្ធជំនួយតម្លៃ៦១ពាន់លានដុល្លារ ដែលនឹងត្រូវផ្តល់ទៅឲ្យទីក្រុងកៀវ៕

អត្ថបទ៖ សុខ សុវណ្ណ

ចុចអាន៖ សម្ព័ន្ធមិត្តរុស្ស៊ី ថា ជោគវាសនាពិភពលោក គឺត្រូវកំណត់នៅ អ៊ុយក្រែន