រដ្ឋបាលខេត្តស្ទឹងត្រែង ប្រកាសរដូវបិទនេសាទ ចាប់ពីដើមខែឧសភា នេះ

រដ្ឋបាលខេត្តស្ទឹងត្រែង បានជូនដំណឹងដល់សាធារណជន និងអ្នកនេសាទទាំងអស់ថា វដូវបិទនេសាទក្នុងដែននេសាទខេត្តស្ទឹងត្រែង នឹងចាប់អនុវត្តពីថ្ងៃទី១ ខែឧសភា ដល់ថ្ងៃទី៣០ ខែកញ្ញា រៀងរាល់ឆ្នាំ។ នេះបើយោងតាមសេចក្តីដូនដំណឹងរបស់រដ្ឋបាលខេត្តស្ទឹងត្រែង នាពេលថ្មីៗនេះ។

ក្នុងលិខិតជូនដំណឹង រដ្ឋបាលខេត្តស្ទឹងត្រែង បញ្ជាក់ថា ក្នុងអំឡុងពេលបិទនេសាទនេះ គឺមិនអនុញ្ញាតឱ្យធ្វើការនេសាទដោយឧបករណ៍មងគ្រប់ប្រភេទ សំដៅដើម្បីការពារត្រីមេពូជក្នុងអំឡុងពេលបង្កកំណើតខ្ពស់នេះ។ ទន្ទឹមគ្នានេះដែរ ត្រូវបញ្ឈប់ជាបន្ទាន់នូវការប្រើឧបករណ៍ឆក់ សារធាតុពុល និងគ្រឿងផ្ទុះ ដែលជាប្រភេទឧបករណ៍នាំឱ្យវិនាស អន្តរាយដល់ធនធានជលផល និងមច្ឆាជាតិយ៉ាងធ្ងន់ធ្ងរបំផុត។

យ៉ាងណាមិញ ទោះបីជាក្នុងរដូវបិទនេសាទក៏ដោយ ប្រជានេសាទនៅតែអាចធ្វើការនេសាទបាន ដោយប្រើនូវឧបករណ៍នេសាទជាលក្ខណៈគ្រួសារដូចជា សៃយ៉ឺន លប សំណាញ់ សន្ទូចផ្លែមួយ អង្រុត ចាន់ តុម ទ្រូ កញ្ច្រែងដងត្រី និងឧបករណ៍មួយចំនួនទៀតដែលច្បាប់អនុញ្ញាត សម្រាប់ផ្គត់ផ្គង់ជីវភាពគ្រួសារប្រចាំថ្ងៃ។

ជាមួយគ្នានេះ រដ្ឋបាលខេត្តស្ទឹងត្រែង សង្ឃឹមយ៉ាងមុតមាំថា សាធារណជន និងអ្នកនេសាទទាំងអស់នឹងអនុវត្ត តាមសេចក្តីជូនដំណឹងនេះប្រកបដោយការទទួលខុសត្រូវ។ ជាពិសេស ប្រជានេសាទទាំងអស់ត្រូវចងចាំ និងអនុវត្តតាម យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ឱ្យបានខ្ជាប់ខ្ជួនដើម្បីចូលរួមថែរក្សា ការពារ និងប្រើប្រាស់នូវធនធានមច្ឆាជាតិឱ្យបានគង់វង្សសម្រាប់កូនចៅជំនាន់ក្រោយៗទៀត៕