កីឡា

ក្រោយជួយវិសាខាឈ្នះជើងឯក គួន ម៉ុម បន្តផ្តោតលើព្រឹត្តិការណ៍ធំមួយទៀត

បានផុស

១០ ខែ មុន

នៅ

ថ្ងៃចន្ទ ២៩ មេសា ២០២៤

ដោយ

ក្រុមបាល់ទះវិសាខាបានឈ្នះជើងឯកពានរង្វាន់ Special Volleyball Cup ឆ្នាំ២០២៤ វិញ្ញាសា៤ទល់៤ បន្ទាប់ពីបានឈ្នះក្រុមក្រសួងកីឡាបាល់ទះមហាផ្ទៃ (B) ដោយលទ្ធផល ៣-១ ក្នុងវគ្គផ្តាច់ព្រ័ត្រកាលពីយប់ថ្ងៃទី២៨ ខែមេសា នៅវិមានពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួន ម៉ុម កីឡាករឆ្នើមរបស់វិសាខា បានលើកឡើងថា ការឈ្នះជើងឯកពានរង្វាន់នេះប្រៀបដូចជាការលុបបំបាត់ភាពចង្រៃដែលវិសាខាខកខានពីរលើកកន្លងមក។ វិសាខាបានបាត់បង់ពានរង្វាន់ធំពីរគឺឆ្នាំ២០២៣បានចាញ់ក្រុមស្នងការដ្ឋាននគរបាលខេត្តព្រះសីហនុ នៅវគ្គផ្តាច់ព្រ័ត្រ ពានរង្វាន់ ស សុខា ដោយលទ្ធផល ២-៣ និងដើមឆ្នាំ២០២៤ ពួកគេបានចាញ់ ក្រុមបញ្ជាការដ្ឋានអង្គរក្ស វគ្គផ្តាច់ព្រ័ត្រ លីគបាល់ទះកំពូលកម្ពុជារដូវកាលដំបូងដោយលទ្ធផល ២-៣។

បន្ទាប់ពីចប់ព្រឹត្តិការណ៍បាល់ទះ Special Volleyball Cup ក្រុមវិសាខាមានភារកិច្ចសំខាន់មួយទៀតគឺចូលរួមប្រកួតពានរង្វាន់ Win+ Streak Volleyball Invitational (WSVI) នៅកោះតៃវ៉ាន់ ចាប់ពីថ្ងៃទី២៩ ខែឧសភា រហូតដល់ថ្ងៃទី២ ខែមិថុនា ឆ្នាំ២០២៤ ដែលមាន៨ក្រុមចូលរួម។

តាមការឲ្យដឹងពីលោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទាត់កម្ពុជា ដែលជាមន្ត្រីរបស់ក្លិបបាល់ទះវិសាខាបានឲ្យដឹងថា លោកគ្រោងនាំចូលកីឡាករលំដាប់ពិភពលោកដើម្បីពង្រឹងវិសាខាត្រៀមទៅប្រកួតនៅកោះតៃវ៉ាន់។ ពានរង្វាន់តៃវ៉ាន់គឺជាការអញ្ជើញពីក្លិបនៅទីនោះ ដូច្នេះការចុះឈ្មោះកីឡាករចូលរួមប្រកួតដោយសេរី និងមិនកំណត់កម្រិតតំបន់អាស៊ី ឬពិភពលោកទេ។

ពាក់ព័ន្ធនឹងចំណុចនេះដែរ គួន ម៉ុម បានប្រាប់ថា ៖«សម្រាប់ដំណឹងនេះពិតប្រាកដ ប៉ុន្តែមិនទាន់ដឹងថា ពួកគាត់អាចមកដល់ថ្ងៃណា។ ឮដំណឹងថា កីឡាករបារាំង លំដាប់ A របស់បារាំងមក។ បើបានពួកគាត់មកតាមការគ្រោងទុក ខ្ញុំសង្ឃឹម១០០ថា ក្រុមវិសាខានឹងឡើងវគ្គផ្តាច់ព្រ័ត្រ»៕