Real Madrid ត្រូវការឈ្នះ១ប្រកួតទៀតដើម្បីគ្រងជើងឯក LaLiga

ក្រុមអធិរាជស Real Madrid កាន់តែខិតជិតក្នុងការគ្រង​ជើងឯកលីគកំពូលអេស្ប៉ាញ (LaLiga) រដូវ​កាល​២០២៣-២៤ ក្រោយនាំមុខក្រុមលេខ២ Girona រហូតដល់១៣ពិន្ទុ គិតត្រឹមសប្ដាហ៍ទី៣៣ ខណៈ​ការ​ប្រកួត​នៅ​សល់​៥​លើក​ទៀត។

ក្រុម Real Madrid ត្រូវការតែ៣ពិន្ទុទៀតប៉ុណ្ណោះ ដើម្បីឈ្នះជើងឯក​លីគ​ LaLiga លើកទី៣៦។ គិតត្រឹមសប្ដាហ៍ទី៣៣ ក្រុម​អធិរាជ​សកំពុងឈរលេខ១​ក្នុង​តារាង​ពិន្ទុ​ បន្ទាប់ពីប្រកួត៣៣លើក ឈ្នះ២៦ ស្មើ៦ ចាញ់១ មាន៨៤ពិន្ទុ ខណៈក្រុមលេខ២ Girona ប្រកួត៣៣លើក ឈ្នះ២២ ស្មើ៥​ ចាញ់៦ មាន៧១ពិន្ទុ។

ការប្រកួត៥លើកចុងក្រោយ Real Madrid ត្រូវការឈ្នះតែ១​ប្រកួត​​ទៀត​​ ដើម្បី​កើន​ដល់៨៧ពិន្ទុ ខណៈក្រុមលេខ២ Girona ​ដែល​មានត្រឹមតែ៧១ពិន្ទុ ទោះ​ឈ្នះ​ទាំង​៥​​ប្រកួត​ចុងក្រោយ​មិន​មាន​ពិន្ទុ​ច្រើន​ជាង​ដែរ។

ការ​ប្រកួត​​សប្ដាហ៍ទី៣៤ ថ្ងៃទី៤ ខែ​ឧសភា Real Madrid ​នឹង​បើកទ្វារកីឡដ្ឋាន Santiago Bernabéu ទទួលក្រុមភ្ញៀវ Cadiz ​​ដែល​កំពុង​ស្ថិត​នៅ​លេខ​ទី១៨ ដូច្នេះ​ហាក់​គ្មាន​អ្វី​ពិបាក​ខ្លាំង​​សម្រាប់ក្រុមម្ចាស់​ផ្ទះ​ក្នុងការស្វែង​រក​៣ពិន្ទុ​ទេ។ ប្រសិនបើ​ពួក​គេ​​ទទួល​បាន​ជ័យជម្នះក្នុងសប្ដាហ៍នេះ ពួកគេនឹងក្លាយជាម្ចាស់ជើងឯកលីគកំពូលប្រទេសអេស្ប៉ាញ​​រដូវ​កាល​នេះ​តែ​​ម្តង។

Real Madrid ជាក្រុម​ទទួល​បាន​ជោគជ័យ​បំផុត​ក្នុង​លីគ​​លីគ​កំពូល​អេស្ប៉ាញ​ LaLiga ​ដោយ​បានឈ្នះ​ជើង​ឯក​​​៣៥​លើក ខណៈក្រុម Barcelona ឈរ​លេខ២ ក្រោយឈ្នះ​២៧លើក និង​ក្រុម Atlético Madrid ឈរ​លេខ​៣ បន្ទាប់​ពី​ការ​ឈ្នះ​១១​លើក៕

អត្ថបទ៖ ផា រតនា