ថែសុខភាព ខណៈការប្រែប្រួលអាកាសធាតុឡើងដល់ ៤៦​ អង្សាសេ​ មិនធ្លាប់មាននៅកម្ពុជា​

វេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យ ក្រសួងសុខាភិបាល បានឱ្យដឹង នៅថ្ងៃទី១ ខែឧសភា ឆ្នាំ២០២៤ នេះថា នៅកម្ពុជាពេលនេះ​ គឺអាកាសធាតុបានប្រែទៅជាក្តៅបំផុតមិនធ្លាប់មានពីមុន និងសូមបងប្អូនមានការប្រុងប្រយ័ត្នខ្ពស់លេីសុខភាព​ ដែលអាចនឹងមានការដួលសន្លប់​ ឬលេះលាស់ដោយខ្វះជាតិទឹកក្នុងខ្លួនជាដេីម។

វេជ្ជបណ្ឌិត ឱ វណ្ណឌីន បានបង្ហាញថា ការប្រែប្រួលអាកាសធាតុ​នាពេលនេះ​ គឺជាការពិត​ហេីយ ខណៈកំដៅបានកេីនឡេីងអាចដល់​ ៤៦​ អង្សាសេ​ ដោយលោស្រីស្នេីសូមឱ្យប្រជាពលរដ្ឋ​ យកចិត្តទុកដាក់ខ្ពស់ក្នុងការការពារសុខភាពផ្ទាល់ខ្លួនឱ្យបានត្រឹមត្រូវ តាមការណែនាំរបស់ក្រសួងសុខាភិបាលដែលបានចេញផ្សាយជូនសាធារណជនរួចហេីយ​ ដែលអាចស្វែងរកមេីលបានតាមទំព័រហ្វេសប៊ុករបស់ក្រសួងបាន។

វេជ្ជបណ្ឌិត ឱ វណ្ណឌីន លើកឡើងថា អ្វីដែលសំខាន់នៅពេលនេះ​ គឺមិនត្រូវស្ថិតនៅក្រោមពន្លឺថ្ងៃក្តៅខ្លាំងនេះក្នុងរយៈពេលយូរពេក​ ដែលនាំឱ្យរលាកស្បែក​ បែកញេីសខ្លាំងពេកធ្វេីឱ្យខ្វះជាតិទឹកក្នុងខ្លួន​ សរីរាង្គកាយមិនអាចទ្រាំទ្របានដែលអាចឱ្យលេះលាស់​ ដង្ហក់​ ឬដួលសន្លប់​ ហេីយគាំងបេះដូងស្លាប់ជាដេីម។ ត្រូវរកទីតាំងម្លប់ជ្រក​ បេីនៅក្រៅផ្ទះ​ ឬអគារ​ រកកន្សែង​ ឬក្រម៉ាជ្រលក់ទឹកគ្រប់ដណ្តប់ខ្លួន​ ឧស្សាហ៍បាញ់ទឹកនៅជុំវិញខ្លួន​ ពិសាទឹកស្អាតឱ្យបានគ្រប់គ្រាន់ពី​ ២-៣ លីត្រក្នុងមួយថ្ងៃ​។

វេជ្ជបណ្ឌិត ឱ វណ្ណឌីន បញ្ជាក់បន្ថែមថា សូមកុំពិសាភេសជ្ជៈផ្អែមដែលធ្វេីឱ្យកំដៅខ្លួនបុគ្គលកេីនថែមក្នុងពេលដែលក្តៅខ្លាំងនេះ​ និងត្រូវប្រេីសម្លៀកបំពាក់ស្រាលស្តេីង​ ដៃវែង​ ពាក់មួកការពារកំដៅថ្ងៃ​ អាចប្រេីឡូស្យុងការពារកំដៅថ្ងៃ​ ឬប្រេីឆ័ត្របាំងកំដៅថ្ងៃ។ បេីនៅក្នុងផ្ទះ​ ឬអគារ​ អាចប្រេីកង្ហា​ ឬម៉ាស៊ីនត្រជាក់​ កាត់បន្ថយកំដៅ។ ចៀសវាងការបរិភោគផ្អែមពេក​ ប្រៃពេក​ ឬខ្លាញ់ពេក​៕