ពិសោធន៍វប្បធម៌កម្ពុជា រៀបចំទីតាំង ៣ សម្រាប់អ្នកចង់ហាត់របាំប្រជាប្រិយ និងក្បាច់បុរាណខ្មែរ

ពិសោធន៍វប្បធម៌កម្ពុជា (ពវក) ដែលជាភ្នាក់ងារផ្តល់សេវាផ្នែកសិល្បៈ និងវប្បធម៌នៃប្រទេសកម្ពុជា បានរៀបចំ សិក្ខាសាលារបាំប្រចាំសប្តាហ៍ និង សិក្ខាសាលារបាំតាមសំណើ នៅក្នុងរាជធានីភ្នំពេញ ក្រុងសៀមរាប និងក្រុងបាត់ដំបង ដើម្បីផ្តល់ឱកាសដល់សាធារណជន ដែលមានបំណងចង់រៀនរបាំប្រជាប្រិយ និងរបាំក្បាច់បុរាណខ្មែរ ទទួលបានឱកាស ហាត់រៀន។ នេះបើតាមការផ្សព្វផ្សាយឱ្យដឹងពី ពិសោធន៍វប្បធម៌កម្ពុជា (Cultural Experiences Cambodia) ។

តាមរយៈសិក្ខាសាលារបាំប្រចាំសប្តាហ៍ សាធារណជនដែលមានបំណងចង់ហាត់រៀន អាចជ្រើសម៉ោងហាត់ និងរបាំជាច្រើន ដែលបច្ចុប្បន្ន មានបង្កាត់បង្រៀនតែថ្ងៃសៅរ៍ និងអាទិត្យ រៀងរាល់សប្តាហ៍ រយៈពេល ១ ម៉ោង និង ៣០ នាទី សម្រាប់មនុស្សធំនិងកុមារ ដែលមានបំណងចង់រៀនរបាំ តែមិនមានពេលវេលាច្រើន។

ដោយឡែក ចំពោះសិក្ខាសាលារបាំតាមសំណើ គឺជាការរៀន ដែលពិសោធន៍វប្បធម៌កម្ពុជា រៀបចំជូនជាពិសេស ទៅតាមការស្នើរសុំរៀន ទៅតាមអ្វីដែលពិសោធន៍វប្បធម៌កម្ពុជា អាចផ្តល់ជូនបាន ដែលរួមមាន របាំប្រជាប្រិយ របាំប្រពៃណី និងរបាំក្បាច់បុរាណខ្មែរ។

បើតាមពិសោធន៍វប្បធម៌កម្ពុជា របាំប្រជាប្រិយ គឺមាន រាំក្បាច់, រាំវង់ចង្វាក់បី, រាំវង់ចង្វាក់បួន, សារ៉ាវ៉ាន់, ឡាំលាវ, ចូកកំពឹស, ម៉ាឌីហ្សន់, ឆា ឆា ឆា, និងទ្វីស ។ ចំណែកឯរបាំប្រពៃណី គឺមាន របាំឆៃយ៉ាំ, របាំគោះអង្រែ, របាំគោះត្រឡោក, របាំកន្សែងស្នេហ៍, របាំនេសាទ, របាំក្ងោកប៉ៃលិន, របាំក្រមាខ្មែរ, របាំគែន ។ ដោយឡែក របាំក្បាច់បុរាណខ្មែរ គឺមាន របាំភួងនារី, របាំជូនពរ, របាំនារីជាជួរ, របាំទិវាប្រពៃ, របាំបុប្ផាលោកីយ៍ ។

គួរបញ្ជាក់ថា ពិសោធន៍វប្បធម៌កម្ពុជា (ពវក) គឺជាភ្នាក់ងារផ្តល់សេវាផ្នែកសិល្បៈនិងវប្បធម៌ នៃប្រទេសកម្ពុជា។ ចំពោះទីតាំងរៀបចំសិក្ខាសាលារបាំនេះដែរ គឺមាននៅទីតាំងចំនួន ០៣ រួមមាន៖
១. រាជធានីភ្នំពេញ : ការិយាល័យអង្គការសិល្បៈខ្មែរអមតៈ
២. ក្រុងសៀមរាប : មជ្ឈមណ្ឌលបេតិកភណ្ឌវត្តរាជបូណ៌
៣. ក្រុងបាត់ដំបង : ភូមិរំចេក ៥, សង្កាត់រតនៈ

ប្រភពដដែល បញ្ជាក់ដែរថា តម្លៃចុះឈ្មោះហាត់រៀន គឺ ៥ដុល្លារ សម្រាប់កុមារ និងមនុស្សធំ។ ចំណែកឯព័ត៌មានលម្អិត អាចទាក់ទងទៅកាន់ ពិសោធន៍វប្បធម៌កម្ពុជា ដោយផ្ទាល់៕