ព័ត៌មានជាតិ
កំពង់ផែទេសចរណ៍ខេត្តកំពតកំពុងជ្រើសរើសក្រុមហ៊ុនប្រតិបត្តិករ គ្រោងដាក់ឲ្យប្រើប្រាស់ជាផ្លូវការនៅចុងឆ្នាំ ២០២៤
កំពង់ផែទេសរណ៍ខេត្តកំពតដែលបានបញ្ចប់ការសាងសង់នៅឆ្នាំ ២០២២ កំពុងឈានទៅជ្រើសរើសក្រុមហ៊ុនប្រតិបត្តិករ និងគ្រោងដាក់ឲ្យប្រើប្រាស់ជាផ្លូវការនៅចុងឆ្នាំ ២០២៤។ នេះបើតាមលោក ប៉េង ពោធិ៍នា រដ្ឋមន្រ្តីក្រសួងសាធារណការនិងដឹកជញ្ជូនបញ្ជាក់នៅក្នុងកម្មវិធីកិច្ចពិភាក្សាពិសេសមួយ រៀបចំឡើងដោយក្រសួងសាធារណការនិងដឹកជញ្ជូន ដោយមានការសម្របសម្រួលពីអង្គភាពអ្នកនាំពាក្យរាជរដ្ឋាភិបាល។

លោក ប៉េង ពោធិ៍នា បានបញ្ជាក់ថា កំពង់ផែទេសចរណ៍ខេត្តកំពតបានបញ្ចប់ការសាងសង់នៅឆ្នាំ២០២២ ប៉ុន្តែមិនទាន់បើកឲ្យដំណើរការជាផ្លូវការ ដោយសារមិនទាន់បានជ្រើសរើសក្រុមហ៊ុនប្រតិបត្តិករគ្រប់គ្រងបាននៅឡើយ។
យោងតាមកិច្ចព្រមព្រៀងហិរញ្ញប្បទានរវាងរាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី តម្រូវឲ្យមានការដេញថ្លៃជាសាធារណៈ ស្របតាមក្របខ័ណ្ឌភាពជាដៃគូររវាងរដ្ឋនិងឯកជន ដោយត្រូវជ្រើសរើសក្រុមហ៊ុនវិនិយោគឯកជនដែលមានទុនវិនិយោគ និងបទពិសោធគ្រប់គ្រាន់ធ្វើជាប្រតិបត្តិករកំពង់ផែនេះ។
លោក ប៉េង ពោធិ៍នា បានបញ្ជាក់ថា បច្ចុប្បន្នរដ្ឋាភិបាលកំពុងបិទបញ្ចប់នីតិវិធីជ្រើសរើសក្រុមហ៊ុនប្រតិបត្តិករ គ្រោងនឹងចុះហត្ថលេខាលើកិច្ចព្រមព្រៀងជាមួយក្រុមហ៊ុនវិនិយោគក្នុងត្រីមាសទីពីរឆ្នាំ ២០២៤ និងដាក់ឲ្យដំណើរការបណ្ដោះអាសន្នក្នុងត្រីមាសទីបីឆ្នាំ ២០២៤ មុនឈានដាក់ឲ្យប្រើប្រាស់ជាផ្លូវការនៅចុងឆ្នាំ ២០២៤។
ដើម្បីធានាឲ្យកំពង់ផែមានសុវត្ថិភាពល្អមាននិរន្តរភាព សម្រាប់នាវាគ្រប់ប្រភេទធ្វើចរាចរណ៍ដោយរលូន រាជរដ្ឋាភិបាលតម្រូវឲ្យក្រុមហ៊ុនប្រតិបត្តិករកំពង់ផែអនុវត្តភារកិច្ចចាំបាច់មួយចំនួន ដូចជាការជីកបូមស្តារផ្លូវទឹកឲ្យបានធំទូលាយ ការសិក្សាបន្ថែមលើបច្ចេកទេសនាវាចរណ៍ ការបំពាក់ឧបករណ៍សញ្ញាជំនួយនាវាចរណ៍ និងការវិនិយោគមួយចំនួនលើហេដ្ឋារចនាសម្ព័ន្ធសុវត្ថិភាពកំពង់ផែ ដើម្បីធានាបានថាកំពង់ផែនេះក្លាយជាកំពង់ផែទេសចរណ៍អន្តរជាតិពេញលេញ ស្របតាមបទដ្ឋានបច្ចេកទេសជាតិនិងអន្តរជាតិ។
ជុំវិញបញ្ហាកំពង់ផែទេសចរណ៍ខេត្តកំពតដែលសាងសង់រួចមិនទាន់ដាក់ឲ្យដំណើរការ លោក ស៊ុន ចាន់ថុល ឧបនាយករដ្ឋមន្រ្តី អនុប្រធានទីមួយក្រុមប្រឹក្សាអភិវឌ្ឍកម្ពុជា និងជាអតីតរដ្ឋមន្រ្តីក្រសួងសាធារណការនិងដឹកជញ្ជូនបានបញ្ជាក់ថា កំពង់ផែទេសចរណ៍ខេត្តកំពតមិនមែនធ្វើហើយបោះបង់ចោលនោះទេ ប៉ុន្តែដោយសារមាននីតិវិធីតាមកិច្ចព្រមព្រៀងវិនិយោគ។
«គេបានដាក់ដេញថ្លៃតាមនីតិវិធីឲ្យផ្នែកឯកជនមកគ្រប់គ្រង។ ផ្នែកឯកជនមានចក្ខុវិស័យចង់ឲ្យកប៉ាល់យក្សធំៗចូលប្រើប្រាស់កំពង់ផែនេះបាន ដែលទាល់តែត្រូវស្តារប្រឡាយឲ្យបានធំ។ បើថាសាងសង់រួចបោះបង់ចោលគឺអត់ទេ»។ លោក ស៊ុន ចាន់ថុល បញ្ជាក់បន្ថែម។
បើតាមលោក ស៊ុន ចាន់ថុល បច្ចុប្បន្នកប៉ាល់តូចៗអាចចេញចូលបានជាធម្មតា បើទោះបីកំពង់ផែមិនទាន់ដាក់ឲ្យដំណើរការជាផ្លូវការក៏ដោយ។

កំពង់ផែទេសចរណ៍ខេត្តកំពតបានចាប់ដំណើរការសាងសង់នៅឆ្នាំ ២០១៨ និងបញ្ចប់នៅឆ្នាំ ២០២២ ដោយចំណាយទឹកប្រាក់ជា ១៨ លានដុល្លារអាមេរិកជាថវិកាកម្ចីពីធនាគារអភិវឌ្ឍន៍អាស៊ី។
កំពង់ផែបម្រើផ្នែកទេសចរណ៍ដ៏ធំនៅក្នុងខេត្តកំពតនេះ មានទីតាំងជាប់ដងព្រែកជាប់ដៃសមុទ្រ ស្ថិតក្នុងស្រុកទឹកឈូ ចម្ងាយជាង ៦ គីឡូម៉ែត្រ ពីក្រុងកំពត ដែលសាងសង់ឡើងលើផ្ទៃដីទំហំជាង ៤ហិកតា។
តាមរយៈកំពង់ផែទេសចរណ៍ខេត្តកំពត នឹងដើរតួនាទីសំខាន់សម្រាប់ជំរុញកំណើនសេដ្ឋកិច្ចជាតិ តាមរយៈសម្របសម្រួលពាណិជ្ជកម្មជាតិនិងអន្តជាតិ ការទាក់ទាញអ្នកទេសចរ ការបង្កើតការងារដល់ពលរដ្ឋនិងការតភ្ជាប់កំពង់ផែក្នុងប្រទេសទៅប្រទេសក្នុងតំបន់និងអន្តរជាតិ។
បើតាមក្រសួងសាធារណការនិងដឹកជញ្ជូន បច្ចុប្បន្នមានកំពង់ផែនិងចំណតផែសរុប ១១៩ កន្លែង ក្នុងនោះកំពង់ផែអន្តរជាតិមានចំនួន ២ កន្លែង ដែលមានកំពង់ផែស្វយ័តភ្នំពេញ (កំពង់ផែទឹកសាប) និងកំពង់ផែស្វយ័តខេត្តព្រះសីហនុ (កំពង់ផែសមុទ្រ)។ កំពង់ផែនិងចំណតផែនៅតាមដងទន្លេមានចំនួន ៨៨ កន្លែង និងនៅតាមឆ្នេរសមុទ្រមានចំនួន ៣១ កន្លែង៕

-
សន្តិសុខសង្គម៥ ថ្ងៃ ago
ភ្លៀងមួយមេធំ លាយឡំនឹងខ្យល់កន្ត្រាក់ បណ្ដាលឱ្យរលំដើមឈើសង្កត់លើរថយន្តមួយគ្រឿង
-
ជីវិតកម្សាន្ដ៥ ថ្ងៃ ago
តារាប្រុសល្បីឈ្មោះក្នុងវិស័យថតស្ពតពាណិជ្ជកម្ម ប៉ែន ចាន់សិទ្ធ ទទួលមរណភាពដោយរាគាពាធ
-
ជីវិតកម្សាន្ដ៤ ថ្ងៃ ago
Model ដែលរងសម្តីមិនសមរម្យពី MC កីឡាម្នាក់ ចេញមកតបថា ការសុំទោសនោះមិនពេញលេញ
-
សន្តិសុខសង្គម១ សប្តាហ៍ ago
Update៖ អគ្គិភ័យឆេះនៅជិតស្ពានជ្រោយចង្វារ មានទារកពីរនាក់បាត់បង់ជីវិត
-
ព័ត៌មានអន្ដរជាតិ២ ថ្ងៃ ago
យន្តហោះចម្បាំងកូរ៉េខាងត្បូង ច្រឡំដៃទម្លាក់គ្រាប់បែក៨គ្រាប់ លើទីតាំងពលរដ្ឋរស់នៅ
-
ព័ត៌មានអន្ដរជាតិ៣ ថ្ងៃ ago
ឈ្លោះគ្នាពេញសភាស៊ែប៊ី មានទាំងគប់គ្រាប់បែកផ្សែង ធ្វើឲ្យសមាជិកសភាម្នាក់ដាច់សរសៃឈាមខួរក្បាល
-
សន្តិសុខសង្គម១ សប្តាហ៍ ago
Update ៖ ដឹងមូលហេតុ ដែលអគ្គិភ័យឆាបឆេះបណ្ដាលឱ្យក្មេងប្រុសស្រី២នាក់ស្លាប់
-
ព័ត៌មានអន្ដរជាតិ២ ថ្ងៃ ago
អាល្លឺម៉ង់ ប្រកាសថា សព្វាវុធដែលខ្លួនបម្រុងទុកសម្រាប់ជួយអ៊ុយក្រែន គឺយកចេញអស់ពីឃ្លាំងហើយ