រន្ទះបាញ់ចំស្រ្តី ៣ នាក់ ​កំពុង​បេះស្វាយ​ សំណាង​មិន​ប៉ះពាល់​ដល់ជីវិត

ស្ត្រី​ ៣ នាក់​បានរងគ្រោះដោយសាររន្ទះបាញ់ ខណះកំពុងបេះផ្លែស្វាយកាលពីថ្ងៃទី ៦ ខែឧសភា ឆ្នាំ២០២៤ វេលាម៉ោង​​ជាង ៣ រសៀល ស្របពេលមានភ្លៀងធ្លាក់មួយមេលាយឡំផ្គររន្ទះ បណ្តាលឲ្យរងរបួសធ្ងន់ តែសំណាងល្អមិនប៉ះពាល់អាយុជីវិត។

សមត្ថកិច្ចប្រាប់ថា ស្ត្រីរងគ្រោះទាំង ៣ នាក់ក្នុងនោះមាន ១-ឈ្មោះ ហាច ធី ភេទស្រី អាយុ ១៦ ឆ្នាំ មានទីលំនៅ ភូមិ​តាស្តា ឃុំ តាស្តា ស្រុកសំពៅលូន ខេត្តបាត់ដំបង។ ២-ឈ្មោះ ព្រុំ គីម៉ើយ ភេទស្រី អាយុ ៨ ឆ្នាំ មានទីលំនៅ ភូមិត្រពាំព្រលិត ឃុំសន្តិភាព ស្រុកសំពៅលូន ខេត្តដំបង។ ៣-ឈ្មោះ ឡុច ស្រីពៅ ភេទស្រី អាយុ ៤៨ ឆ្នាំ មានទីលំនៅ ភូមិតាស្តា ឃុំតាស្តា ស្រុកសំពៅលូន ខេត្តបាត់ដំបង។

បើតាមពលរដ្ឋ ស្ត្រីរងគ្រោះទាំង ៣ បានសន្លប់ ក្រោយពីរន្ទះបានបាញ់ចំនួន ២ គ្រាប់ ហើយត្រូវបានបញ្ជូនភ្លាមៗទៅ សង្រ្គោះនៅមន្ទីរពេទ្យភូមិភាគ ៥ ក្នុងស្រុកសំពៅលូន ហើយបច្ចុប្បន្នមានអាការះដឹងខ្លួនរួចផុតគ្រោះថ្នាក់ហើយ។

ប្រភពពលរដ្ឋ​អះអាងថា៖​ «នេះប្រហែលជាសំណាងទើបបានផុតពីគ្រោះដល់ជីវិត។ បើមានរន្ទះបាញ់ចំ​ហើយកម្រមានជីវិតណាស់ សូម្បីសត្វគោងាប់រាប់សិបក្បាលបើបានបាញ់ចំ។ តែនេះបាញ់ចំនួនដល់ទៅ ២ គ្រាប់ នៅមានសុវត្ថិភាពជីវិត ពិតជាកម្រណាស»។

ជុំវិញករណីរន្ទះនេះ ខាងមន្ត្រីជំនាញពន្យល់ថា រន្ទះនឹងកើតមានឡើង នៅពេលដែលបន្ទុកអគ្គិសនីអវិជ្ជមាន (-) បានប្រទះនឹងបន្ទុកវិជ្ជមាន (+) ទាញចូលគ្នា ភ្ជាប់ចរន្ដអគ្គិសនី បង្កើតទៅជាភ្លើងជះពន្លឺ មួយពព្រិចភ្នែក ដែលមើលទៅអាចគិតថា បាញ់ពីមេឃមកផ្ទៃខាងក្រោម ប៉ុន្តែគ្រាន់តែភ្ជាប់បន្ទុកអគ្គិសនី និងពេលដែលប៉ះគ្នាបណ្ដាលឲ្យបញ្ចេញជាភ្លើងចរន្ដភ្លឺខ្លាំងប៉ុណ្ណោះ គឺបាញ់ពីផ្នែកខាងក្រោម។

បច្ចុប្បន្ន ព្រោះបច្ចេកវិទ្យាកាន់តែទំនើប បង្គោលអង់តែននៃក្រុមហ៊ុនផ្គត់ផ្គង់សេវាទូរគមនាគមន៍ តែងបំពាក់ឧបករណ៍បញ្ចៀសររន្ទះ ដែលនេះជាមូលហេតុដែលករណីរន្ទះបាញ់តែងតែកើតមានតាមតំបន់វាល ទើបបង្កឲ្យមានរន្ទះតែម្តង ស្របជាមួយប្រភពដីដែលមានសណ្ឋានខ្ពស់ ហើយមានចំហាយក្តៅខ្លាំងទើបបង្កជារន្ទះតែម្តង៕

អត្ថបទ៖ សៅ សារិទ្ធ