៣ ប្រទេសនៅ អាស៊ាន ក្លាយជាមុខព្រួញទេសចរណ៍ល្បីៗទាំង ១០ របស់ ចិន

ប្រទេសចំនួន ៣ ប្រចាំនៅតំបន់អាស៊ានដែលមានដូចជា ថៃ សិង្ហបុរី និងវៀតណាមស្ថិតក្នុងចំណោមគោលដៅទេសចរណ៍ដ៏ពេញនិយមបំផុតចំនួន ១០ របស់អ្នកដំណើរចិន ក្នុងអំឡុងពេលថ្ងៃឈប់សម្រាប់នៃទិវាពលកម្មរយៈពេល ៥ របស់ប្រទសចិនដែលទើបតែបញ្ចប់កាលពីចុងសប្ដាហ៍ ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី៧ ខែឧសភាកន្លងទៅ ។

ដោយផ្អែកលើទិន្នន័យនៃការកក់ជើងហោះហើរនៅក្នុងវេទិកាចិន Qunar បានឲ្យដឹងថា ប្រទេសថៃគឺជាមុខព្រួញដ៏ពេញនិយមបំផុតសម្រាប់ទេសចរចិនហោះទៅលេងកម្សាន្ត បន្ទាប់មកគឺប្រទេសជប៉ុន ម៉ាឡេស៊ី កូរ៉េខាងត្បូង សិង្ហបុរី ឥណ្ឌូណេស៊ី វៀតណាម សហរដ្ឋអាមេរិក ហ្វីលីពីន និងអូស្ត្រាលី ។

ទន្ទឹមនោះ ទិន្នន័យពីវេទិកាអនឡាញ Ctrip ក៏បានបង្ហាញផងដែរថា ការកក់ជើងហោះហើរសម្រាប់ប្រទេសថៃ និងម៉ាឡេស៊ីមានសន្ទុះកើនឡើងជាង ៣០ ភាគរយ និងកើនទ្វេដងសម្រាប់ប្រទេសសិង្ហបុរី ចំណែកប្រទេសវៀតណាមស្ថិតក្នុងបញ្ជីនៃទិសដៅវិស្សមកាលដែលពេញនិយមបំផុតសម្រាប់ភ្ញៀវទេសចរចិន ក្នុងអំឡុងពេលថ្ងៃឈប់សម្រាកដែលគេស្គាល់ថា “សប្តាហ៍មាស” នៅក្នុងប្រទេសចិន ។

ស្របពេលជាមួយគ្នានេះ ចំនួន​ភ្ញៀវ​ទេសចរ​ចិន​ដែលហោះទៅលេងនៅ​វៀតណាម​ហាក់បង្ហាញសញ្ញាប្រសើរឡើង ក្នុង​រយៈពេល​ប៉ុន្មាន​ខែ​ចុង​ក្រោយ​នេះ ខណៈគិតត្រឹមពេលនេះ ប្រទេសវៀតណាមទាក់ទាញភ្ញៀវទេសចរចិនជាង ១.២ លាននាក់ ពោលគឺជិត ៦០ ភាគរយនៃតួលេខសរុបកាលពីឆ្នាំមុន ។

គួរបញ្ជាក់ថា កាលពីឆ្នាំមុនប្រទេសថៃបានឈានដល់គោលដៅទេសចរណ៍ចំនួន ២៨ លាននាក់ ស្របពេលមុខព្រួញសម្រាប់ឆ្នាំ ២០២៤ នេះវិញ រដ្ឋាភិបាលបានកំណត់ទិសដៅការមកលេងកម្សាន្តរបស់អ្នកទេសចរជាង ៣៤ លាននាក់ ខណៈវៀតណាមកើបបានភ្ញៀវទេសចរបរទេសចំនួន ១២.៦ លាននាក់កាលពីឆ្នាំមុន ឬប្រហែល ៧០ ភាគរយនៃកម្រិត មុនរោគរាតត្បាតកូវីដ ១៩ ហើយនៅឆ្នាំនេះ វៀតណាមដាក់​គោលដៅ​ ១៨ ​លាននាក់ ​៕

ដោយ ៖ សុខ ជីវ័ន្ត

ចុចអាន ៖ តាំងពីចប់សង្ក្រាន្តមក ថៃ ធ្ងន់ធ្ងរខ្លាំងដោយសារកូវីដ ឯអ្នកស្លាប់ ក៏មានច្រើនទៅៗ