សហគមន៍​កសិកម្មគំរូ​មួយ​ នៅស្រុកភ្នំព្រឹកផលិតបន្លែ​សុវត្ថិភាព​​មួយ​ថ្ងៃ​បានជាង ១៥០០ គីឡូក្រាមលក់ចែកចាយលើទីផ្សារ

សហគមន៍កសិកម្មពន្លឺថ្មីពេជ្រចិន្តា បង្កើតឡើងផ្តើមពីការសហការរួមគ្នាជាក្រុមជាមួយប្រជាកសិករក្នុងមូលដ្ឋានក្នុងអំឡុង​ឆ្នាំ២០០៩ មានទីតាំងស្ថិតក្នុងភូមិ ភ្នំតូច ឃុំពេជ្រចិន្តា ស្រុកភ្នំព្រឹក ដោយក្នុងនោះមានកសិករ ដាំដំឡូង ពោត សណ្តែកសៀងជាដើម បានចូលរួមជាសហគមន៍កែប្រែការដាំដុះ​ប្រភេទដំណាំពីដំឡូង ពោត សណ្តែក ជំនួសដោយផ្លែឈើហូបផ្លែវិញ ក្នុងនោះមានដូចជា តាង៉ែន និង ស្វាយ វិញ។

ប៉ុន្តែការដាំដំណាំហូបផ្លែទាំងនោះ ក៏មានកត្តាប្រឈមនិងបញ្ហាខ្លះៗមិនអាចដំណើរការតាមការរំពឹងទុក។ ដល់ឆ្នាំ២០១៩ សហគមន៍បានចាប់យកបន្លែសុវត្ថិភាពជំនួសវិញដោយប្រើប្រាស់ផ្ទះសំណាញ់រហូតដល់បច្ចុប្បន្ន។ នេះជាការលើក ឡើងពីលោក ហ៊ុន វត្ថា ប្រធានសហគមន៍បានប្រាប់កម្ពុជាថ្មីឲ្យដឹងនៅថ្ងៃទី៨ ខែឧសភានេះ។

ការផ្ដោតទៅលើបន្លែសុវត្ថិភាពដោយប្រើផ្ទះសំណាញ់តាមស្តង់ដានេះ ប្រជាកសិករក្នុងសហគមន៍អាចផលិតបានប្រសើរពីមួយឆ្នាំទៅមួយឆ្នាំ ខណះទីផ្សារក្នុងស្រុកក៏មិនមានការរាំងស្ទះនោះដែរ។

កសិករអាចផលិត​បន្លែផ្សេងៗបាន តែត្រូវចំណាយថវិកាដើម្បីធ្វើផ្ទះសំណាញ់ជាមុន។ ដោយសារតែបន្លែសុវត្ថិភាពមានទីផ្សារល្អ សហគមន៍ក៏កំពុង​គ្រោង​ពង្រីកផ្ទៃដី​ ៦០ ហិកតាបន្ថែមទៀត។ លោក ហ៊ុន វត្ថា បាន​បន្ថែម។

ប្រធានសហគមន៍រូបនេះមើលឃើញពីការរីកចម្រើន​ឆ្លងពីមួយដំណាក់កាលទៅមួយដំណាក់កាល ចាប់ពីផ្ទះសំណាញ់មានត្រឹម ៣០ ខ្នង រហូតដល់បច្ចុប្បន្នក្នុងសហគមន៍មានផ្ទះសំណាញ់រហូតដល់ ៣៥៥ ខ្នង។

បើតាមលោក វត្ថា បច្ចុប្បន្នសហគមន៍ដាំដុះ​បន្លែសុវត្ថិភាពមានដូចជា ស្ពៃក្ដោប ខាត់ណាដើម ខាត់ណាផ្កាស ផ្កាខាត់ ណាខៀវ ផ្កាខាត់ណាលឿង ផ្កាខាត់ណាស្វាយ និង ផ្កាខាត់ណាទឹកក្រូច ក្នុងនោះក៏មានស្ពៃក្រញាញ់ ប៉េងប៉ោះ ឆឺររី និងម្ទេ សហាវ៉ៃ ជាដើម។ ប៉ុន្តែនៅឆ្នាំនេះ ដោយសារតែរលកកម្តៅបានធ្វើឲ្យទិន្នផលនាំចូលទីផ្សារថយចុះនៅត្រឹម ៨០០ គីឡូក្រាម ប៉ុណ្ណោះក្នុងមួយថ្ងៃ ខណះឆ្នាំកន្លងទៅ ក្នុងមួយថ្ងៃប្រមូលបានចន្លោះពី ​១៥០០-២០០០ គីឡូក្រាម ហើយតម្លៃទីផ្សារក្នុងស្រុករក្សាលំហ្នឹងបានល្អផងដែរ។

មន្ត្រីនៃមន្ទីរកសិកម្មខេត្តបានឲ្យដឹងដែរថា សហគមន៍ពន្លឺថ្មីពេជ្យចិន្តាគឺជាសហគមន៍ឈានមុខគេ​ផ្នែក​ផលិតបន្លែសុវត្ថិភាព តែកសិករក៏ត្រូវទាមទារមានធនធានខ្លះសម្រាប់ជាសមាជិក ដោយសារតែតម្រូវការចំណាយថវិការជាង ១ ពាន់ ដុល្លារ ដល់ជាង ២ ពាន់ដុល្លារ ក្នុងការរៀបចំ​ផ្ទះសំណាញ់ទៅតាមទំហំតូចឬធំ។

មន្ត្រីដដែលបន្តថា ដោយសារតែសហគមន៍បានបោះជំហានល្អ​ប្រសើរពី១ឆ្នាំទៅ១ឆ្នាំ បានទាញកំណើនសេដ្ឋកិច្ចគ្រួសារសមាជិកសហគមន៍​មានភាព​រីកចម្រើន​។

កាលពីថ្ងៃទី៧ ខែឧសភា ឆ្នាំ២០២៤ លោក ឈឹម វជរា ប្រធានមន្ទីរកសិកម្ម រុក្ខាប្រមាញ់ និងនេសាទ​ខេត្តបាត់ដំបង អមដំណើរលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចុះ​ជួបសំណេះសំណាល​និង​ស្វែងយល់​សក្តានុពលសេដ្ឋកិច្ចព្រមទាំងផ្តល់គោលការណ៍បង្កើតសហគមន៍ទំនើបបែបថ្មីដល់សហគមន៍កសិកម្មពន្លឺថ្មីពេជ្រចិន្តាស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។

សហគមន៍លេចធ្លោក្នុង​តំបន់នេះ មានលទ្ធភាពក្នុងការផលិតបន្លែសុវត្ថិភាព មានផែនការច្បាស់លាស់ ផលិតរួម លក់រួម ផលប្រយោជន៍រួម ខណះបច្ចុប្បន្នមានផ្ទះសំណាញ់ចំនួន ៣៥៥ ខ្នង អាចផលិតបានដូចជា ស្ពៃក្តោប ខាត់ណាផ្កាស ផ្កាខៀវ ផ្កាលឿង អាចផ្គត់ផ្គង់លើទីផ្សារពី ១,៥០០គ.ក្រទៅ ២,០០០គ.ក្រ ក្នុង១ថ្ងៃ៕

អត្ថបទ៖ សៅ សារិទ្ធ