ព័ត៌មានអន្ដរជាតិ

តៃវ៉ាន់ ត្រៀមកម្លាំងយោធារួចស្រេច សម្រាប់ថ្ងៃឡើងកាន់តំណែងប្រធានាធិបតីថ្មី

បានផុស

៥ ខែ មុន

នៅ

ថ្ងៃពុធ ៨ ឧសភា ២០២៤

ដោយ

Chheang

យោធាតៃវ៉ាន់ បានប្រកាសពីការត្រៀមខ្លួនរួចជាស្រេច សម្រាប់ពិធីស្បថចូលកាន់តំណែងប្រធានាធិបតីថ្មីរបស់ខ្លួននាថ្ងៃទី២០ ខែឧសភាខាងមុខ។ ការត្រៀមកម្លាំងយោធានេះ ធ្វើឡើងក្នុងគោលបំណងទប់ទល់នឹងសកម្មភាពមិនប្រក្រតីណាមួយរបស់ចិន។ នេះបើយោងតាមការប្រកាសរបស់ក្រសួងការពារជាតិតៃវ៉ាន់ នៅថ្ងៃទី៨ ខែឧសភា។

លោក Lai Ching-te (រូបភាព៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Po Horng-huei រដ្ឋមន្ត្រីក្រសួងការពារជាតិតៃវ៉ាន់ បាននិយាយថា “មុននិងក្រោយថ្ងៃទី២០ឧសភា យោធាជាតិយើងនឹងប្រកាន់ខ្ជាប់នូវតម្រូវការត្រៀមខ្លួនរួចរាល់សម្រាប់ការប្រយុទ្ធ និងយកចិត្តទុកដាក់ជាទីបំផុតលើការបំផ្លាញស្ថិរភាព និងសន្តិភាពក្នុងតំបន់ ដោយភាគីខាងក្រៅ”។ លោកបន្ថែមថា សកម្មភាពយោធាចិននៅក្នុង និងជុំវិញច្រកសមុទ្រតៃវ៉ាន់ កំពុងបង្កជាអស្ថិរភាពចំពោះតំបន់ឥណ្ឌូប៉ាស៊ីហ្វិកទាំងមូល។

ចិន ដែលតែងចាត់ទុកតៃវ៉ាន់ជាអធិបតេយ្យភាពរបស់ខ្លួន មានការមិនពេញជាខ្លាំងចំពោះលោក Lai Ching-te ដែលជាប្រធានាធិបតីជាប់ឆ្នោតថ្មី ហើយជឿជាក់ថា លោកគឺជាជនផ្ដាច់ខ្លួននិយម និងតែងតែជំទាស់នឹងសកម្មភាពរបស់ចិន។

មិនខុសពីលោកស្រី Tsai Ing-wen ដែលជាប្រធានាធិបតីទើបអស់អាណត្តិ លោក Lai ក៏នៅរក្សាជំហរបដិសេធផងដែរនូវការអះអាងរបស់ចិន ដែលចង់បានតៃវ៉ាន់មកកាន់កាប់។ លោក Lai ថា មានតែប្រជាពលរដ្ឋតៃវ៉ាន់ប៉ុណ្ណោះដែលអាចសម្រេចជោគវាសនាខ្លួនឯងបាន។

សូមបញ្ជាក់ថា កំឡុងពេល៤ឆ្នាំចុងក្រោយ យោធាចិនតែងបង្កើនសកម្មភាពរបស់ខ្លួននៅក្បែរកោះតៃវ៉ាន់ជានិច្ច ដូចជា ការបញ្ជូនយន្តហោះចម្បាំងហោះរំលងខ្សែបន្ទាត់ព្រំដែនច្រកសមុទ្រតៃវ៉ាន់ ជាដើម។ បន្ទាត់ព្រំដែនច្រកសមុទ្រនេះ មិនត្រូវបានចិនទទួលស្គាល់នោះឡើយ។

នៅក្នុងឆ្នាំ២០២២ ចិនបានធ្វើសមយុទ្ធយោធាធំមួយ ក្បែរកោះតៃវ៉ាន់ ក្រោយពីលោកស្រី Nancy Pelos ប្រធានសភាអាមេរិក បានធ្វើដំណើរទស្សនកិច្ចនៅក្រុងតៃប៉ិ។ បន្ទាប់មកនៅក្នុងឆ្នាំ២០២៣ ចិនក៏បានធ្វើសមយុទ្ធដូចគ្នានេះមួយទៀត ក្រោយពេលលោកស្រី Tsai Ing-wen បានទៅជួបលោក Kevin McCarthy ដែលឡើងកាន់តំណែងជាប្រធានសភាថ្មី នៅសហរដ្ឋអាមេរិក៕

ដោយ៖ ឈាង