ព័ត៌មានអន្ដរជាតិ

កងកម្លាំងមិនស្គាល់មុខ មីយ៉ាន់ម៉ា ផ្ទុះការប្រយុទ្ធគ្នា និងបោកគ្រាប់បែកជិតព្រំដែន ថៃ

បានផុស

៩ ខែ មុន

នៅ

ថ្ងៃសៅរ៍ ១១ ឧសភា ២០២៤

ដោយ

ការប្រយុទ្ធគ្នា និងការបំផ្ទុះគ្រាប់បែកនៅតែបន្តកើតមានជាបន្តបន្ទាប់នៅក្នុងប្រទេសមីយ៉ាន់ម៉ាជិតព្រំដែនជាមួយស្រុក Sangkhla Buri នៃខេត្តភាគខាងលិចប្រទេសថៃកាលពីរសៀលថ្ងៃសុក្រ ដោយបង្ខំឲ្យជនស៊ីវិលជាង ១០០ នាក់រត់ភៀសខ្លួនចូលទៅក្នុងប្រទេសថៃ ។ នេះបើយោងតាមការចេញផ្សាយដោយកាសែត Bangkok Post កាលពីថ្ងៃទី១០ ខែឧសភាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងមិនស្គាល់មុខមីយ៉ាន់ម៉ាបានប្រើអាវុធធុនធ្ងន់ និងគ្រាប់បែកក្នុងការប្រយុទ្ធគ្នានៅកងវរសេនាតូចទី ២៨៥ របស់កងទ័ពមីយ៉ាន់ម៉ាក្នុងតំបន់ Payathonzu ភាគខាងត្បូងរដ្ឋ Kayin ដែលមានចម្ងាយប្រហែល ២ គីឡូម៉ែត្រពីព្រំដែន Phra Chedi Sam Ong របស់ថៃកាលពីវេលាម៉ោងប្រហែល ១២ និង ៤០ នាទីថ្ងៃត្រង់ ខណៈប្រភពពីព្រំដែនបានឲ្យដឹងថា ការប្រយុទ្ធគ្នា និងការបោកគ្រាប់បែកបណ្ដាលឲ្យមានផ្សែងហុយខ្មួលខ្មាញឡើងលើមេឃផងដែរ ។

ទន្ទឹមនោះ ការបាញ់តតាំងគ្នានេះក៏បង្ខំឲ្យអ្នកស្រុក Payathonzu ជាង ១០០ នាក់ រួមទាំងកុមារ និងមនុស្សចាស់ផងដែរនោះ រត់ឆ្លងព្រំដែនទៅជ្រកកោនលើដីថៃក្នុងភូមិ Phra Chedi Sam Ong Moo 9 ឃុំ Nong Lu ស្រុក Sangkhla Buri ខេត្ត Kanchanaburi ដោយសារតែការប្រយុទ្ធគ្នាបានអូសបន្លាយប្រហែល ៣០ ទៅ ៤០ នាទីឯណោះ មុនពេលមានការសម្រុះសម្រួលឲ្យឈប់បាញ់គ្នា ។

បន្ទាប់ពីការប្រយុទ្ធគ្នាបានផុតរលត់ អ្នកភូមិមួយចំនួនក៏បានវិលត្រឡប់ទៅតំបន់ Payathonzu វិញ ប៉ុន្តែសល់ប្រហែល ៤០ នាក់នៅតែបន្តស្នាក់នៅក្នុងជម្រកបណ្ដោះអាសន្ន ដោយសារតែពួកគេមិនប្រាកដប្រជាពីសុខសុវត្ថិភាពនៅក្នុងតំបន់ ខណៈក្នុងការបាញ់បោះនោះមិនទាន់មានរបាយការណ៍ពីអ្នកស្លាប់ និងរងរបួសនោះទេ ។

ប្រទេសមីយ៉ាន់ម៉ាធ្លាក់ចូលក្នុងរណ្ដៅនៃវិបត្តិសង្គ្រាមស៊ីវិល ចាប់តាំងពីកងទ័ពធ្វើរដ្ឋប្រហារដណ្តើមអំណាចពីរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ ឆ្នាំ២០២១ ហើយចាប់ពីឡើងកាន់អំណាចមក រដ្ឋាភិបាលយោធាបាននិងកំពុងប្រឈមបញ្ហាដ៏ធំបំផុត ពោលគឺកំពុងព្យាយាមតស៊ូប្រយុទ្ធនៅសមរភូមិជួរមុខជាច្រើនដើម្បីទប់ទល់នឹងការបះបោរពីសំណាក់សម្ព័ន្ធក្រុមប្រដាប់អាវុធជនជាតិភាគតិចនៅក្នុងប្រទេស ។

គួរបញ្ជាក់ថា យោងតាមរបាយការណ៍ពី UN មនុស្សជាង ១,៥០០ នាក់ស្លាប់បាត់បង់ជីវិត ចាប់តាំងពីរដ្ឋប្រហារយោធា និងការបង្ក្រាបដោយហិង្សាលើអ្នកគាំទ្រលទ្ធិប្រជាធិបតេយ្យក្នុងរយៈពេល ៣ ឆ្នាំមកនេះ ។ ក្នុងនោះមនុស្សជិត ២៦,000 នាក់ត្រូវបានចាប់ឃុំខ្លួនដោយហេតុផលនយោបាយ និងជិត ២០,០០០ នាក់រងការធ្វើទារុណកម្ម និងការរំលោភបំពាននៅក្នុងមន្ទីរឃុំឃាំង ៕