ជំនន់ទឹកភ្លៀងកាចសាហាវ ឆក់យកជីវិតមនុស្ស ជាង៣០០នាក់ នៅ អាហ្វហ្គានីស្ថាន

ជំនន់ទឹកភ្លៀងបានវាយប្រហារប្រទេសអាហ្វហ្គានីស្ថាន ដល់ថ្នាក់ប្រកាសអាសន្ន  ខណៈគ្រោះធម្មជាតិដ៏កាចសាហាវនេះ ផ្តាច់ជីវិតមនុស្សជាង៣០០នាក់ទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លៀងធ្លាក់ខ្លាំងចាប់តាំងពីថ្ងៃទី១០ខែឧសភា បានបណ្តាលឲ្យកម្ពស់ទឹកទន្លេ ហក់ឡើងខ្ពស់និងពាំនាំលំហូរភក់វាយប្រហារភូមិនិងដីកសិកម្មជាច្រើន នៅតាមបណ្តាខេត្តភាគខាងជើងប្រទេសនេះ។

ស្របពេលជាមួយគ្នានោះដែរ កម្មវិធីស្បៀងអាហាររបស់អង្គការសហប្រជាជាតិ (WFP) បាននិយាយកាលពីថ្ងៃទី១១ខែឧសភាថា Baghlan គឺជាខេត្តដែលរងផលប៉ះពាល់ធ្ងន់ធ្ងរបំផុត ខណៈភ្លៀងធ្លាក់ខ្លាំង ក៏បង្កការខូចខាតដល់ខេត្តភាគខាងលិច Ghor និង Herat ផងដែរ។

លោក Rana Deraz មន្ត្រីទំនាក់ទំនង WFP ប្រចាំប្រទេសអាហ្វហ្គានីស្ថាន បានលើកឡើងថា “គ្រាន់តែត្រឹមមួយខេត្ត Baghlan មានមនុស្សស្លាប់ដល់ទៅ៣១១នាក់ទៅហើយ រីឯផ្ទះចំនួន ២ ០១១ ខ្នងត្រូវបានទឹកហូរនាំយកទៅ ចំណែកផ្ទះ ២ ៨០០ខ្នងទៀត ត្រូវខូចខាត”។

មិនត្រឹមតែសម្លាប់ជីវិតមនុស្សនិងបង្កការខូចខាតដល់ផ្ទះសម្បែងទេ គ្រោះទឹកជំនន់ដ៏មហន្តរាយនេះ ក៏ជន់លិចដីស្រែចម្ការនៅក្នុងប្រទេសមានប្រជាជនជាង ៤០ លាននាក់ដែល ៨០% ពឹងផ្អែកលើវិស័យកសិកម្មមួយនេះផងដែរ។

តាមលក្ខណៈភូមិសាស្រ្ត អាហ្វហ្គានីស្ថាន គឺជាប្រទេសមានរដូវរងារីងស្ងួត ធ្វើឲ្យដីពិបាកស្រូបយកទឹកភ្លៀង ជាហេតុបង្កភាពងាយរងគ្រោះដោយសារបម្រែបម្រួលអាកាសធាតុ។

បន្ទាប់ពីសង្រ្គាមអស់រយៈពេលជាង៤០ឆ្នាំ អាហ្វហ្គានីស្ថាន បានក្លាយជាប្រទេសក្រីក្របំផុតមួយក្នុងពិភពលោក ហើយមិនបានត្រៀមខ្លួនល្អឡើយដើម្បីដោះស្រាយជាមួយនឹងផលវិបាកនៃការឡើងកម្តៅផែនដី៕

អត្ថបទ៖ សុខ សុវណ្ណ

ចុចអាន៖ ទីក្រុងឌូបៃ រងគ្រោះដោយជំនន់ទឹកភ្លៀង