ក្រុមអ្នករត់គេចចេញពី កូរ៉េខាងជើង បង្ហោះប៉េងប៉ោងភ្ជាប់ខិត្តប័ណ្ណប្រឆាំងលោក គីម ជុងអ៊ុន

ក្រុមអ្នករត់គេចចេញពីកូរ៉េខាងជើងមួយក្រុមបានបង្ហោះប៉េងប៉ោងប្លាស្ទិកធំៗប្រហែល ២០ ភ្ជាប់ជាមួយខិត្តប័ណ្ណឃោសនាប្រឆាំងនឹងរដ្ឋាភិបាលកូរ៉េខាងជើង ឆ្លងកាត់ព្រំដែនចូលទៅក្នុងកូរ៉េខាងជើង ។ ​នេះបើយោងតាមការចេញផ្សាយរបស់ទីភ្នាក់ងារព័ត៌មាន Yonhab កាលពីថ្ងៃទី១២ ខែ​ឧសភាកន្លងទៅ ។

ប៉េងប៉ោងដែលផ្ទុកនូវខិត្តប័ណ្ណចំនួន ៣០ ម៉ឺនសន្លឹកដែលរិះគន់ការដឹកនាំរបស់លោក គីម ជុងអ៊ុន ត្រូវបានបង្ហោះចេញពីកោះ Ganghwa ក្បែរព្រំដែនអន្តរកូរ៉េភាគខាងលិច ខណៈបដាដែលចងជាប់នឹងប៉េងប៉ោងនោះសរសេរថា “លោក គីម ជុងអ៊ុន ជាជនក្បត់ជាតិដែលមិនអាចកែប្រែបាន និងជាសត្រូវរបស់ប្រជាជន” ។

ទន្ទឹមនោះ យោងតាមក្រុមអ្នកប្រយុទ្ធដើម្បីសេរីភាពកូរ៉េខាងជើង (FFNK) បានចោទប្រកាន់មេដឹកនាំរូបនេះផងដែរថា ព្យាយាមរារាំងការបង្រួបបង្រួមអន្តរកូរ៉េ និងបន្តការដឹកនាំបែបផ្ដាច់ការរបស់ខ្លួន ។

ក្រុមអ្នករត់គេចចេញពីប្រទេសកូរ៉េខាងជើងដែលនៅក្នុងប្រទេសកូរ៉េខាងត្បូង ដូចជាក្រុម FFNK នេះតែងតែបង្ហោះប៉េងប៉ោងប្លាស្ទិកធំៗភ្ជាប់ជាមួយខិត្តប័ណ្ណទៅកូរ៉េខាងជើង ក្នុងគោលបំណងដើម្បីចរចាររំដោះប្រជាជនកូរ៉េខាងជើងចេញពីកូរ៉េខាងជើង ។

គួរបញ្ជាក់ថា រដ្ឋាភិបាលកូរ៉េខាងត្បូងបានស្នើម្តងហើយម្តងទៀតឲ្យក្រុមទាំងនេះ ចៀសវាងសកម្មភាពមួយនេះតទៅទៀត ដោយសារកូរ៉េខាងជើងអាចប្រើកម្លាំងយោធាណាមួយប្រឆាំងនឹងការបង្ហោះប៉េងប៉ោងបែបនេះ ហើយថែមទាំងអាចគំរាមបាញ់ទម្លាក់ពួកវាថែមទៀតផង ៕

អត្ថបទ៖ ប៊ុន សុភាព