ខេត្តបន្ទាយមានជ័យ ដាក់វិធានការណ៍តឹងរ៉ឹងដើម្បីទប់ស្កាត់ការនាំចូលសាច់បង្កក និងទំនិញខូចគុណភាព

រដ្ឋបាលខេត្តបន្ទាយមានជ័យ កាលពីរសៀលថ្ងៃទី១៥ ខែឧសភា ឆ្នាំ២០២៤ បានកោះប្រជុំជាមួយមន្ទីរជំនាញពាក់ព័ន្ធនិងកម្លាំងទាំងបីប្រភេទ និងសមត្ដកិច្ចនគរបាល យោធាការពារព្រំដែន បង្ការទប់ស្កាត់បទល្មើសតាមព្រំដែន ដូចជាសាច់បង្កក និងទំនិញខូចគុណភាព។

កិច្ចប្រជុំនេះត្រូវបានប្រារព្ធធ្វើឡើងនៅសាលប្រជុំសាលាខេត្តបន្ទាយមានជ័យ ក្រោមការដឹកនាំពីសំណាក់លោក ឃ្លោក នួយ អភិបាលរងខេត្ត ដែលមានការអញ្ជើញចូលរួមពីលោក លោកស្រី មន្ត្រីរាជការ តំណាងមន្ទីរ ស្ថាប័នពាក់ព័ន្ធ លោកមេបញ្ជាការវរសេនាតូចនគរបាលការពារព្រំដែនគោកលេខ ៨០៧,៨១៥,៨៩១,៩១១។

កិច្ចប្រជុំនេះ ពិភាក្សាសំខាន់លើកការងារបង្ការ បង្ក្រាបសាច់បង្កក និងទំនិញខូចគុណភាពនៅតាមតំបន់ព្រំដែនកម្ពុជា ថៃ ក្នុងភូមិសាស្ត្រខេត្តបន្ទាយមានជ័យ។

គួរបញ្ជក់ថា ប៉ុន្មានថ្ងៃចុងក្រោយនេះនៅតាមបន្ទាត់ព្រំដែនកម្ពុជា ថៃ នៃខេត្តបន្ទាយមានជ័យ មានការរឹតបន្តឹងការនាំទំនិញចេញចូល។ តែមុនការរឹតបន្តឹងនេះ សកម្មភាពបទល្មើសតាមព្រំដែនកម្ពុជា ថៃ នៃខេត្តបន្ទាយមានជ័យ បានកើតឡើង ជាពិសេសនៅពេលយប់តាមច្រករបៀង ជោគជ័យ(ណងចចាន់) ច្រករបៀងអូរបីជាន់ ច្រកបៀងតំបន់១ ច្រកសេះងាប់ ដែលច្រករបៀងទាំងនេះភាគច្រើននាំទំនិញជាសត្វពាហនៈ និងសាច់សត្វ។ ក្រៅពីច្រករបៀងក៏នៅមានច្រកតំបន់​បឹងត្រកួនក៏មានការនាំចូលទំនិញគ្រប់ប្រភេទពីប្រទេសថៃតាមរថយន្តកែឆ្នៃដោយមិនមានការបង់ពន្ធត្រឹមត្រូវតាមផ្លូវច្បាប់មិនមានវិក័យបត្រចេញដោយមន្រ្តីគយប្រចាំច្រកឡើយដោយគ្រាន់តែប្រកាសបង់អោយសមត្ថកិច្ចមាត់ច្រក ទំនិញទាំងនោះអាចនាំចូលទាំងយប់ហួសម៉ោងដែលច្រកបើកដំណើរការក៏បាន៕

អត្ថបទ៖ អ ពៅ