ព័ត៌មានជាតិ

អ្នកឧកញ៉ា អ៊ឹង ប៊ុនហ៊ូវ ប្រគេនដីទំហំជាង ២ ហិតា នៅតំបន់អភិវឌ្ឍន៍ទីក្រុងរណប អ៊ឹង ស៊ីធី (ING CITY) ជូនពុទ្ធិកសាកលវិទ្យាល័យព្រះសីហនុរាជ

បានផុស

៤ ខែ មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

កាលពីព្រឹកថ្ងៃទី ១៥ ខែឧសភា ឆ្នាំ ២០២៤ មូលនិធិ អ៊ឹង ហ្វោនដេហ្ស៊ិន (ING Foundation) បានប្រារព្ធពិធីប្រគេនដីទំហំសរុប ២២.៤២៨ ម៉ែត្រការ៉េ ដល់ពុទ្ធិកសាកលវិទ្យាល័យព្រះសីហនុរាជ ស្ថិតនៅតាមបណ្ដោយមហាវិថី ឈុន គង់ តំបន់អភិវឌ្ឍន៍ទីក្រុងរណប អ៊ឹង ស៊ីធី (ING CITY) ស្ថិតក្នុងភូមិសាស្ត្រសង្កាត់ចាក់អង្រែក្រោម ខណ្ឌមានជ័យ និង សង្កាត់ជើងឯក ខណ្ឌដង្កោ រាជធានីភ្នំពេញ ក្រោមការយាងនិមន្តជាអធិបតីដោយសម្តេចព្រះពោធិវ័ង្ស កិត្តិបណ្ឌិត អំ លីមហេង អមដោយសម្តេចព្រះរាជាគណៈទាំង ១២ អង្គ និងគណៈសង្ឃអង្គផ្សេងៗ រួមទាំងសាស្ត្រាចារ្យ សាមណេរនិស្សិត និងនិស្សិត នៃពុទ្ធិកសាកលវិទ្យាល័យព្រះសីហនុរាជ សរុបប្រមាណ ៥៥០ អង្គ/នាក់ រួមនឹងក្រុមគ្រួសាររបស់អ្នកឧកញ៉ា អ៊ឹង ប៊ុនហ៊ូវ ផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចព្រះពោធិវ័ង្ស មានសង្ឃដីកាក្នុងពិធីនេះថា សម្ដេចពិតជាមានសេចក្ដីជ្រះថ្លាដែលបានឃើញ និងទទួលយកនូវសទ្ធាជ្រះថ្លារបស់ អ្នកឧកញ៉ា អ៊ឹង ប៊ុនហ៊ូវ ព្រមទាំងក្រុមគ្រួសារ នូវការប្រគេនដីទំហំសរុប ២២.៤២៨ ម៉ែត្រការ៉េ ដល់ពុទ្ធិកសាកលវិទ្យាល័យព្រះសីហនុរាជ ដើម្បីប្រើប្រាស់ជាទីតាំងថ្មីបន្ថែមទៀតរបស់ពុទ្ធិកសាកលវិទ្យាល័យ។ សម្ដេច បានមានសង្ឃដីកា បន្ថែមថា ក្រុមគ្រួសាររបស់អ្នកឧកញ៉ា អ៊ឹង ប៊ុនហ៊ូវ គឺជាពុទ្ធសាសនូបត្ថម្ភក៍ដែលតែងតែគោរព ប្រតិបត្តិ និងមានជំនឿយ៉ាងមុតមាំ ដែលតែងតែបានជួយឧបត្ថម្ភគាំទ្រព្រះពុទ្ធសាសនា និងសង្គមជាតិជារៀងរហូតមក។

សម្តេចព្រះមហាអរិយវង្ស បណ្ឌិត យ៉ន សេងយៀត ព្រះសកលវិទ្យាធិការ នៃពុទ្ធិកសាកលវិទ្យាល័យព្រះសីហនុរាជ ក៏បានមានសង្ឃដីកាសម្ដែងនូវសេចក្ដីរំភើបរីករាយក្រៃលែង ដែលពុទ្ធិកសាកលវិទ្យាល័យ ពិតជាមានភ័ព្វសំណាងជាថ្មីម្ដងទៀត បន្ទាប់ពីធ្លាប់ទទួលបានដីពីព្រះបរមរតនកោដ្ឋ ព្រះករុណា ព្រះបាទ សម្ដេចព្រះ នរោត្តម សីហនុ កាលពីប្រមាណ ៧០ ឆ្នាំមុន ប្រើប្រាស់ជាទីតាំងពុទ្ធិកសាកលវិទ្យាល័យព្រះសីហនុរាជ មកទល់នឹងពេលបច្ចុប្បន្ននេះ។

ក្នុងពិធីនេះដែរ អ្នកឧកញ៉ា អ៊ឹង ប៊ុនហ៊ូវ ប្រធានមូលនិធិ អ៊ឹង ហ្វោនដេហ្ស៊ិន បានបញ្ជាក់ថា រូបលោក និងក្រុមគ្រួសារ តែងតែចូលរួមលើកតម្កើងគាំទ្រក្នុងវិស័យព្រះពុទ្ធសាសនា និងពុទ្ធិកសិក្សា និងបានមើលឃើញពីតម្រូវការក្នុងការអភិវឌ្ឍធនធានមនុស្សកម្រិតពុទ្ធិកឧត្ដមសិក្សាមានការកើនឡើង និងតម្រូវការប្រើប្រាស់របស់ពុទ្ធិកសាកលវិទ្យាល័យព្រះសីហនុរាជ លោកក៏មានសទ្ធាជ្រះថ្លា ប្រគេននូវទីតាំងដី ០១ កន្លែង ខាងលើនេះ ប្រគេនជូន ដើម្បីប្រើប្រាស់ជាទីតាំងពុទ្ធិកសាកលវិទ្យាល័យថ្មីមួយទៀត ដែលអាចប្រើប្រាស់សម្រាប់ការសាងសង់ជាអគារពុទ្ធិកសាកលវិទ្យាល័យ អគារបណ្ណាល័យសិក្សា អគាររដ្ឋបាល អគារសម្រាប់អន្តេវាសិក រួមទាំងសំណង់ សិល្បការ្យ និងសំណង់ស្ថាបត្យកម្មផ្សេងទៀតតាមតម្រូវការរបស់ពុទ្ធិកសាកលវិទ្យាល័យ។ លោកបានបន្ថែមថា ការប្រគេនទីតាំងដីខាងលើនេះ ក៏មិនមែនជាលើកទី ១ នោះដែរ កាលពីក្នុងចន្លោះឆ្នាំ ២០១៥ និង ២០១៧ អ្នកឧកញ៉ា និងក្រុមគ្រួសារ បានផ្តល់ដីចំនួន ០៣ កន្លែង ក្នុងតំបន់អភិវឌ្ឍន៍ទីក្រុងរណប អ៊ឹង ស៊ីធី (ING CITY) ដូចគ្នា ដែលដីទី ១ មានទំហំប្រមាណ ២,០០០ ម៉ែត្រការ៉េ ជូនគណបក្សប្រជាជនកម្ពុជារាជធានីភ្នំពេញ ប្រើប្រាស់សម្រាប់សាងសង់ជាអគារទីស្នាក់ការគណបក្សខណ្ឌមានជ័យ និងដីទី ២ មានទំហំប្រមាណ ៣,០០០ ម៉ែត្រការ៉េ ជូនដល់សាលារាជធានីភ្នំពេញ ដើម្បីសាងសង់ជាអគាររដ្ឋបាលសាលាខណ្ឌមានជ័យ ប្រើប្រាស់នាពេលសព្វថ្ងៃនេះ ដីទាំង ២ កន្លែង ជូនតាមរយៈ ឯកឧត្ដម ប៉ា សុជាតិវង្ស អតីតអភិបាលរាជធានីភ្នំពេញ និងទី ៣ ដីទំហំ ៩,៤៧៩ ម៉ែត្រការ៉េ ជូនសហគមន៍គ្រិស្តសាសនា នៅកម្ពុជា ឈ្មោះថា “ក្រុមជំនុំជីវិតថ្មី” សម្រាប់ប្រើប្រាស់សាងសង់ជាព្រះវិហារគ្រិស្តសាសនាផងដែរ ដែលបានបំពេញបេសកកម្មមនុស្សធម៌ សង្គមធម៌នៅក្នុងប្រទេសកម្ពុជាអស់រយៈពេលប្រមាណជាង ៣០ ឆ្នាំ មកហើយនោះ បានជួយប្រជាជនខ្មែរជាច្រើនម៉ឺននាក់។

អ្នកឧកញ៉ា ក៏បានលើកឡើងពីអភិវឌ្ឍនភាព នៃទីក្រុងរណប អ៊ឹង ស៊ីធី（ING City) នាពេលបច្ចុប្បន្ននេះ និងហេដ្ឋារចនាសម្ព័ន្ធរូបវន្តដទៃទៀត នៅទូទាំងព្រះរាជាណាចក្រកម្ពុជា ដែលបាននិងកំពុងរីកចម្រើន ដោយសារតម្លៃ នៃសន្តិភាព “បើគ្មានសន្តិភាព នោះគ្មានការអភិវឌ្ឍ”។ រយៈពេលជិត ២៦ ឆ្នាំ មកនេះ ប្រទេសកម្ពុជា ទទួលបាននូវសុខសន្តិភាព ឯកភាពជាតិ ឯកភាពទឹកដីពេញបរិបូណ៌តាមរយៈការអនុវត្ត “នយោបាយ ឈ្នះ ឈ្នះ” របស់ សម្តេចតេជោ ប្រធានព្រឹទ្ធសភា ប្រកបដោយប្រសិទ្ធភាព និងប្រសិទ្ធផលខ្ពស់គួរជាទីមោទកភាព។ ហេតុនេះសន្តិភាពពិតជាមានតម្លៃដ៏មហាសាល សម្រាប់មនុស្សជាតិទាំងមូល “យើងត្រូវស្អប់សង្គ្រាម យើងត្រូវស្រលាញ់ និងថែរក្សាសន្តិភាព”។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាកុលបុត្រដ៏ឆ្នើម និងជាអ្នកបន្តវេន ដ៏មានសក្ដានុពល ដើម្បីដឹកនាំបន្តនាវាកម្ពុជា ឆ្ពោះទៅកាន់កោះសន្តិភាព សម្រាប់ប្រជាជាតិកម្ពុជាទាំងមូល។ អ្នកឧកញ៉ា បានប្រកាសគាំទ្រយ៉ាងពេញទំហឹងនូវគម្រោងព្រែកជីក “ហ្វូនណន តេជោ” ជាគម្រោងប្រវត្តិសាស្ត្រ ដែលនឹងផ្តល់អត្ថប្រយោជន៍ជាសារវន្តដល់សង្គមជាតិ នៃព្រះរាជាណាចក្រកម្ពុជាយើងផងដែរ៕