ក្រោយជីកព្រែកហ្វូណនតេជោរួច វៀតណាមនឹងលែងមានឥទ្ធិពលមកលើវិស័យដឹកជញ្ជូនតាមផ្លូវទឹក

សម្ដេចតេជោ បានថ្លែងទទួលស្គាល់ចំ​ពោះការលើកឡើងរបស់អ្នកសារព័ត៌មានបរទេសថា ក្រោយពេលដែលព្រែកជីកហ្វូណនតេជោ ជីករួចរាល់សាងសង់រួចរាល់ទាំងស្រុង ពេលនោះវៀតណាមនឹងលែងមានឥទ្ធិពលមកលើវិស័យដឹកជញ្ជូនតាមផ្លូវទឹករបស់កម្ពុជាតទៅទៀត។ សម្ដេចតេជោ បានថ្លែងបែបនេះ តាមរយៈសារពិសេសជូនជនរួមជាតិកម្ពុជា នារសៀលថ្ងៃទី១៦ ខែឧសភា ឆ្នាំ២០២៤។

សម្ដេចតេជោ បានថ្លែងទទួលស្គាល់បែបនេះថា «ជនបរទេស(អ្នកសារព័ត៌មាន)ចាប់សរសេរហើយ ជនបរទេសចាប់សរសេរ ហើយខ្ញុំគិតថាគេសរសេត្រូវ  គេថាប្រសិនបើកម្ពុជាជីកព្រែកជីកនេះ ឥទ្ធិពលរបស់វៀតណាមមកកម្ពុជានឹងត្រូវបានកាត់បន្ថយ»។

សម្ដេចតេជោ បានអះអាងថា ការលើកឡើងនេះជារឿងត្រឹមត្រូវ ត្បិតថា កាលណាកម្ពុជាខ្ចីដង្ហើមដឹកជញ្ជូនតាមផ្លូវទឹករបស់វៀតណាម កម្ពុជាត្រូវបង់ថ្លៃដឹកជញ្ជូនតាមការកំណត់របស់វៀតណាម ក្រោមលក្ខខណ្ឌបង់ថ្លៃសមរម្យ។

សូមជម្រាបជូនជាថ្មីម្ដងទៀតថា គម្រោងព្រែកជីកហ្វូណនតេជោ គឺជាគម្រោងប្រវត្តិសាស្ត្រថ្មីមួយទៀត ដែលព្រែកជីកនេះមានប្រវែងសរុបប្រមាណជាង១៨០គីឡូម៉ែត្រ។ក្រោយសាងសង់រួច ព្រែកជីក តម្លៃជាង១ ៧០០ លានដុល្លារនេះ នឹងអនុញ្ញាតឱ្យនាវាដឹកទំនិញបានទម្ងន់៣ពាន់តោននៅរដូវប្រាំង និង៤ពាន់តោននៅរដូវវស្សារ។ គម្រោងនេះ​ ក៏នឹងនាំឱ្យកម្ពុជាបង្កើតបានតំបន់ពាណិជ្ជកម្ម និងមជ្ឈមណ្ឌលភស្តភារកម្ម ការអភិវឌ្ឍផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ និងចិញ្ចឹម សត្វ ជាដើម ដែលជាប្រយោជន៍ផ្នែកសេដ្ឋកិច្ចមហាសាល ហើយក៏នឹងនាំឱ្យកម្ពុជាមានឯករាជ្យនយោបាយផ្នែកដឹកជញ្ជូនតាមផ្លូវទឹក៕