ក្រសួងអប់រំ កំពុងសិក្សាករណីសិស្សវិទ្យាល័យហ៊ុនសែនវាលរេញ ២នាក់ត្រូវដកមិនឲ្យប្រឡងថ្នាក់ជាតិ និងបាក់ឌុប៣ឆ្នាំ

ក្រសួងអប់រំយុវជន និងកីឡាបានកំពុងពិនិត្យសិក្សាលំអិតករណីសិស្សរៀននៅវិទ្យាល័យហ៊ុនសែនវាលរេញនៅខេត្តព្រះសីហនុ ចំនួន២នាក់ ត្រូវគេដកបេក្ខភាពមិនឱ្យចូលរួមប្រឡងថ្នាក់ជាតិ និងប្រឡងសញ្ញាបត្របាក់ឌុប៣ឆ្នាំ
ដោយមូលហេតុថា គ្មានសញ្ញាបត្រមធ្យមសិក្សាបឋមភូមិ (ឌីប្លូម)។

ការពិនិត្យមើល និងសិក្សាលំអិតករណីសិស្សទាំង២នាក់ខាងលើនេះបន្ទាប់ពីមានគណនីហ្វេសប៊ុក ឈ្មោះ Lay Po ដែលជាគ្រូបង្រៀននៅវិទ្យាល័យ ហ៊ុនសែន វាលរេញ ស្ថិតក្នុងស្រុកព្រៃនប់ ខេត្តព្រះសីហនុ បានបង្ហោះ និងសេរសេររៀបរាប់ថា លោកបានបំរើការជាគ្រូបង្រៀន២០ឆ្នាំ ហើយឆ្នាំនេះជាឆ្នាំទី២១ គឺប្លែកខ្លាំងតែម្ដងមានសិស្សថ្នាក់ទី១២ ចំនួន២រូប ត្រូវបានគេដកបេក្ខភាពមិនឱ្យប្រឡងថ្នាក់ជាតិតាំងពីមុនចូលឆ្នាំខ្មែរ វ៉ាកងតូចទៅទៀតយ៉ាងស្ងាត់ៗគ្មានអ្នកដឹង។ សិស្សទាំង២នាក់ឈ្មោះ លី ប៊ុនលាង និង ធន់ សាន បានរៀន និងប្រឡងប្រចាំខែ និងឆមាសជាប់ជាបន្តបន្ទាប់នៅថ្នាក់ទី១០ និងទី១១ ហើយឆ្នាំនេះចូលរៀនថ្នាក់ទី១២ ជាប់លាប់រហូតដល់ពេលវ៉ាកងតូច។

គណនីហ្វេសប៊ុក ឈ្មោះ Lay Po បានសរសេរទៀតថា ការដកបេក្ខភាពនេះ មិនមែនធម្មតាទេ ឮថា មិនឱ្យគ្នាប្រឡងបាក់ឌុប ៣ឆ្នាំ ឯណោះ ដោយមូលហេតុពួកគេគ្មានសញ្ញាបត្រមធ្យមសិក្សាបឋមភូមិ (ឌីប្លូម)។ លោកគ្រូចង់ឱ្យក្រសួងដោះស្រាយឱ្យពួកគាត់ឱ្យសមរម្យដើម្បីឱ្យមានទំនួលខុសត្រូវ និងមន្ត្រីពាក់ព័ន្ធ គឺថា បើដាក់ទោស ត្រូវដាក់ឱ្យយុត្តិធម៌
ទាំងមន្ត្រីពាក់ព័ន្ធផង កុំឱ្យពលរដ្ឋចំអកថា ធ្វើការយកតែល្អមើល។

ពាក់ព័ន្ធករណីខាងលើនេះ​ដែរ លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជននិងកីឡា បានមានប្រសាសន៍នៅរសៀលថ្ងៃទី១៦ឧសភានេះថា «ករណីនេះ ក្រសួងអប់រំ យុវជន និងកីឡាបានទទួលព័ត៌មានហើយ និងកំពុងពិនិត្យសិក្សាលម្អិត»៕

អត្ថបទ៖ សំអឿន