ព័ត៌មានអន្ដរជាតិ

ប្អូនស្រី គីម ជុងអ៊ុន ចេញមុខបដិសេធរឿងលួចដឹកអាវុធឲ្យរុស្ស៊ី

បានផុស

១ ខែ មុន

នៅ

ថ្ងៃសុក្រ ១៧ ឧសភា ២០២៤

ដោយ

ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង បានចេញមុខប្រកាសក្ដែងៗបដិសេធការចោទប្រកាន់ដែលថា រដ្ឋាភិបាលក្រុងព្យុងយ៉ាងកំពុងដឹកជញ្ជូនសព្វាវុធឲ្យទៅប្រទេសរុស្ស៊ី ដើម្បីយកធ្វើសង្គ្រាមនៅអ៊ុយក្រែន។ អ្នកស្រី គីម យ៉ូជុង បានហៅការចោទប្រកាន់នេះថាជារឿង “មិនសមទំនង” ទាល់តែសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការផ្ដល់បទសម្ភាសន៍ជាមួយសារព័ត៌មានរដ្ឋកូរ៉េខាងជើង KCNA នៅថ្ងៃសុក្រទី១៧ ខែឧសភានេះ អ្នកស្រី គីម យ៉ូជុង បានចាត់ទុកការចោទប្រកាន់របស់សហរដ្ឋអាមេរិក និងកូរ៉េខាងត្បូង ថាជាការបង្កហេតុនាំឲ្យមានការភាន់ច្រឡំចំពោះមតិសាធារណៈមកលើក្រុងព្យុងយ៉ាង ហើយបានប្រឌិតនូវពាក្យចចាមអារ៉ាមមិនពិតអំពីរឿងលួចដឹកអាវុធទៅឲ្យរុស្ស៊ី។ អ្នកស្រី បន្តថា កូរ៉េខាងជើង គ្មានបំណងនាំចេញសមត្ថភាពបច្ចេកទេសយោធារបស់ខ្លួនឲ្យទៅប្រទេសណាមួយនោះទេ។ នារីខ្លាំងនៅកូរ៉េខាងជើងរូបនេះ បាននិយាយទៀតថា “អ្វីដែលបន្ទាន់បំផុតសម្រាប់ពួកយើង គឺមិនត្រូវផ្សព្វផ្សាយ ឬនាំចេញអ្វីមួយនោះទេ ប៉ុន្តែគឺត្រូវត្រៀមប្រយុទ្ធ និងរារាំងសង្គ្រាមរបស់កងទ័ពយើងឲ្យបានកាន់តែល្អឥតខ្ចោះទាំងគុណភាព និងបរិមាណ”។

គួររំឭកថា កូរ៉េខាងត្បូង និងសហរដ្ឋអាមេរិក បាននាំគ្នាចោទប្រកាន់កូរ៉េខាងជើងថា បានលួចផ្គត់ផ្គង់អាវុធឲ្យទៅក្រុងមូស្គូ បើទោះជាប្រទេសទាំង២កំពុងស្ថិតនៅក្រោមទណ្ឌកម្មជាច្រើនករណីពីអង្គការសហប្រជាជាតិក៏ដោយ ជាពិសេសនោះគឺទណ្ឌកម្មហាមឃាត់ការដឹកជញ្ជូនសព្វាវុធតែម្ដង។

កូរ៉េខាងត្បូង ធ្លាប់ប៉ាន់ស្មានថា សព្វាវុធដែលរដ្ឋាភិបាលលោក គីម ជុងអ៊ុន ផ្ដល់ឲ្យក្រុងមូស្គូ មានចំនួនប្រហែល ៧ពាន់កុងតឺន័រឯណោះ ដោយគិតចាប់តាំងពីខែកក្កដា ឆ្នាំ២០២៣មកម៉្លេះ។ ដោយឡែក អាមេរិកវិញ បានប្រាប់ថា ការផ្ដល់ជំនួយឲ្យរុស្ស៊ីនេះ គឺកូរ៉េខាងជើងមានបំណងចង់បានការតបស្នងមកវិញនូវបច្ចេកវិទ្យា និងឧបករណ៍យោធាមួយចំនួនពីរុស្ស៊ី សម្រាប់ពង្រឹងវិស័យការពារជាតិរបស់ខ្លួន៕

ដោយ៖ ឈាង

Related Topics:ប្រទេសកូរ៉េខាងជើង