សម្ដេចធិបតី ប្រកាសមិនឱ្យកម្ពុជាដើរលើផ្លូវប្រល័យពូជសាសន៍ទៀតឡើយ ពិសេសការបណ្ដុះនយោបាយជ្រុលនិយម

អញ្ជើញបើកសន្និសីទស្តីពី«អនាគតកម្ពុជាគ្មានអំពើប្រល័យពូជសាសន៍» នាព្រឹកថ្ងៃទី២០ ខែឧសភា ឆ្នាំ២០២៤ សម្ដចធិបតី ហ៊ុន ម៉ាណែត បានប្រកាសថា មិនឱ្យកម្ពុជាដើរលើផ្លូវប្រល័យពូជសាសន៍ទៀតឡើយ ពិសេសការបណ្ដុះវប្បធម៌នយោបាយជ្រុលនិយម។

ការប្រកាសបែបនេះរបស់សម្ដេចប្រមុខរាជរដ្ឋាភិបាល គឺស្របពេលទិវា ២០ ឧសភា នៃការចងចាំដ៏ឈឺចាប់បំផុតរបស់ប្រជាជាតិកម្ពុជានៅក្នុងរបបប្រល័យពូជសាសន៍ខ្មែរក្រហម (១៧ មេសា ១៩៧៥ – ៦ មករា ១៩៧៩)។ សម្ដេចធិបតី ហ៊ុន ម៉ាណែត បានថ្លែងក្នុងសន្និសីទនាព្រឹកនេះ ថា សង្គមត្រូវតែក្រើនរម្លឹកជាដរាបអំពីមេរៀនទាំងឡាយ ដើម្បីធានាថា កម្ពុជា មិនដើរលើផ្លូវដដែលនោះទេ ហើយលើសពីនេះ ត្រូវតែកែសម្រួល ឬ សម្របស្ថានភាពសង្គមនៅពេលណាដែលចាំបាច់ ដើម្បីការពារកុំឱ្យមនោគមវិជ្ជាជ្រុលនិយមចាប់ផ្តើមកកើត និងចាក់ឫសក្នុងសង្គមកម្ពុជា។

សម្ដេចធិបតី ប្រកាសយ៉ាងដូច្នេះថា៖ «យើងមិនអាចអនុញ្ញាតឱ្យសមាសធាតុណាមួយនៃសង្គម បណ្តុះពន្លកនៃវប្បធម៌នយោបាយជ្រុលនិយមម្ដងទៀតបានឡើយ តាមរយៈការជំរុញការតស៊ូវណ្ណៈ ការស្អប់ខ្ពើមប្រឆាំងនឹងអាជ្ញាធរ ការផ្លាស់ប្ដូររបបដោយផ្ទុយនឹងគោលការណ៍ប្រជាធិបតេយ្យ និងការរើសអើងពូជសាសន៍»។

សម្ដេចធិបតី បានគូសបញ្ជាក់ថា កំហុសអតីតកាលបានប្រាប់យើងឱ្យចេះបង្រួបបង្រួមជាតិខ្មែរឱ្យបានរឹងមាំ និងជំរុញឱ្យកសាងសង្គមឱ្យកាន់តែប្រសើរ ប្រកបដោយបរិយាប័ន្នសម្រាប់ទាំងអស់គ្នា ដែលនេះ គឺជាកាតព្វកិច្ចរបស់រាជរដ្ឋាភិបាល ក្នុងការលើកកម្ពស់អភិបាលកិច្ចល្អ និងយុត្តិធម៌សង្គម ដើម្បីធានានូវបរិយាប័ន្នភាពនៅក្នុងប្រព័ន្ធគ្រប់គ្រង ក៏ដូចជាការអភិវឌ្ឍជាតិ៕