សេដ្ឋកិច្ច

ចិនស៊ើបអង្កេតប្រឆាំងការលក់បង្ខូចថ្លៃ លើ ប្លាស្ទិកវិស្វកម្មមកពីប្លុកអឺរ៉ុប អាមេរិក ជប៉ុន តៃវ៉ាន់

បានផុស

៧ ខែ មុន

នៅ

ថ្ងៃចន្ទ ២០ ឧសភា ២០២៤

ដោយ

ក្រសួងពាណិជ្ជកម្មរបស់ប្រទេសចិនកាលពីថ្ងៃអាទិត្យ បានបើកការស៊ើបអង្កេតប្រឆាំងនឹងការលក់បង្ខូចថ្លៃលើបាស្ទិកវិស្វកម្ម ប្រភេទ POM copolymers ដែលនាំចូលពីសហភាពអឺរ៉ុប សហរដ្ឋអាមេរិក ជប៉ុន និងកោះតៃវ៉ាន់។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងនិយាយក្នុងសេចក្តីថ្លែងការណ៍ថា បាស្ទិកវិស្វកម្ម ជាប្រភេទប្លាស្ទិកដែលគេយកទៅប្រើដើម្បីជំនួសលោហៈដូចជាទង់ដែង និងស័ង្កសី ហើយមានខ្លះទៀត វាត្រូវបានប្រាស់ក្នុងគ្រឿងបន្លាស់រថយន្ត គ្រឿងអេឡិចត្រូនិក និងឧបករណ៍ វេជ្ជសាស្ត្រជាដើម។

ក្រសួងបន្តថា ការស៊ើបអង្កេតអាចបញ្ចប់ក្នុងរយៈពេល១ឆ្នាំ ប៉ុន្តែក៏អាចនឹងបន្តរយៈពេលប្រាំ៦ខែទៀតផងដែរ។

ជុំវិញបញ្ហានេះ គណៈកម្មការអឺរ៉ុប ដែលត្រួតពិនិត្យគោលនយោបាយពាណិជ្ជកម្មរបស់សហភាពអឺរ៉ុប បាននិយាយថា ខ្លួននឹងសិក្សាដោយប្រុងប្រយ័ត្ននូវខ្លឹមសារនៃការស៊ើបអង្កេតរបស់ចិន មុននឹងសម្រេចចិត្តចាត់វិធានជំហានបន្ទាប់ណាមួយ។

អ្នកនាំពាក្យគណៈកម្មការម្នាក់ បាននិយាយប្រាប់រ៉យទ័រថា៖ «យើងរំពឹងថា ប្រទេសចិននឹងធានាថា ការស៊ើបអង្កេតនេះ គឺស្របតាមច្បាប់ និងកាតព្វកិច្ចទាំងអស់របស់ WTO (អង្គការពាណិជ្ជកម្មពិភពលោក)»។

គួរគូសបញ្ជាក់ថា ការស៊ើបអង្កេតក្នុងវិស័យប្លាស្ទិកវិស្វកម្មរបស់ចិន កើតឡើងចំដែលជម្លោះពាណិជ្ជកម្មរវាងចិន និងសហរដ្ឋអាមេរិក និងអឺរ៉ុប កាន់តែរីកសាយភាយ។ កាលពីថ្ងៃអង្គារសប្ដាហ៍មុន សហរដ្ឋអាមេរិកបានបញ្ចេញកញ្ចប់ពន្ធថ្មីលើទំនិញនាំចូលពីចេញទំហំ ១៨ ប៊ីលានដុល្លារ ដោយគ្របដណ្ដប់លើរថយន្តអគ្គិសនី បន្ទះឈីប ផលិតផលវេជ្ជសាស្ត្រ និងការនាំចូលផ្សេងៗទៀត។

ទន្ទឹមនឹងនោះ កាលពីថ្ងៃសុក្រ សហភាពអឺរ៉ុប បានបើកការស៊ើបអង្កេតពាណិជ្ជកម្មលើបន្ទះដែកសំណប៉ាហាំងរបស់ចិន ដែលជាការស៊ើបអង្កេតចុងក្រោយបង្អស់របស់សហភាពអឺរ៉ុប លើពាណិជ្ជកម្ម និងជំនួយឧបត្ថម្ភធនរបស់ចិនលើការនាំចេញរបស់ខ្លួន។

កាលពីខែកញ្ញា ឆ្នាំមុន គណៈកម្មការអឺរ៉ុបបានបើកការស៊ើបអង្កេត ដើម្បីសម្រេចថាតើត្រូវដាក់ពន្ធទណ្ឌកម្មលើរថយន្តអគ្គិសនីរបស់ចិនឬយ៉ាងណា ដោយសង្ស័យថា តម្លៃផលិតផលចិនទាបប្រហែលបណ្ដាលមកពីក្រុមហ៊ុនចិនទទួលបានអត្ថប្រយោជន៍ពីការឧបត្ថម្ភធនរបស់រដ្ឋ។

យ៉ាងណាមិញ ទីក្រុងប៉េកាំងបានអះអាងកន្លងមកថា ការផ្ដោតរបស់សហរដ្ឋអាមេរិក និងអឺរ៉ុប លើការណ៍ដែលថា ចិនបង្កហានិភ័យសេដ្ឋកិច្ចដល់ប្រទេសផ្សេងៗទៀត គឺជាការយល់ខុស។ មន្ត្រីចិននិយាយថា ការរិះគន់នេះបង្ហាញពីការមើលស្រាលលើភាពច្នៃប្រឌិតរបស់ក្រុមហ៊ុនចិន នៅក្នុងឧស្សាហកម្មសំខាន់ៗ និងបង្ហាញពីការបន្លើសនៃការគាំទ្ររបស់រដ្ឋ ក្នុងការជំរុញកំណើនរបស់ក្រុមហ៊ុនទាំងនោះ៕

Related Topics:ប្រទេសចិន